༢༠༡༠ ཕྱི་ཟླ་ ༦ ཚེས་ ༢༢ རེས་གཟའ་མིག་དམར།
༄༅། །འདི་གར་བོད་གཞུང་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་གསལ། སྤྱི་འཐུས་སྐབས་ ༡༥ པ་དང་། བཀའ་ཁྲི་སྐབས་ ༣ པའི་འོས་བསྡུ་བྱེད་ལ་ཉེ་བའི་སྐབས་དེར་བྱང་ཨ་རིའི་ས་གནས་འོས་བསྡུ་ལས་ཁང་གི་འགན་འཛིན་སྐུ་ཚབ་དོན་གཅོད་བློ་བཟང་སྙན་གྲགས་མཆོག་གིས་ས་གནས་འོས་བསྡུ་ལས་ཁང་གི་ཚོགས་འདུ་ཐེངས་དང་པོ་འདི་ཚེས་ ༡༨ དགོང་དྲོ་ཆུ་ཚོད་ ༨ པའི་ཐོག་དོན་གཅོད་ཁང་གི་འོག་ཤོད་དུ་སྐོང་ཚོགས་གནང་ཡོད། ཚོགས་འདུའི་ཐོག་ས་གནས་འོས་བསྡུའི་འགན་འཛིན་མཆོག་གིས་འོས་བསྡུའི་གལ་ཆེའི་རང་བཞིན་དང་། འོས་བསྡུ་དང་འབྲེལ་བའི་ལས་དོན་རྣམས་སྒྲིག་མཐུན་ཚགས་ཚུད་ཡོང་རྒྱུར་ཚང་མས་ཐུགས་འགན་ལྷོད་མེད་བཞེས་དགོས་པའི་ནན་བརྗོད་གནང་ཡོད། དེ་བཞིན་ཚོགས་འདུར་ཚེ་རིང་དཔལ་ལྡན་དང་། གདུགས་དཀར་འབུམ། ཚེ་རིང་བཟང་པོ། བསྟན་འཛིན་སྒྲོལ་མ། ཀརྨ་མཁས་གྲུབ། བཀྲ་ཤིས་དབང་འདུས། ཉི་མ་སྒྲོལ་དཀར། པད་མ་རྒྱལ་པོ། རྣམ་རྒྱལ་སྒྲོལ་མ། བསྟན་འཛིན་བུ་ཁྲིད། སྐལ་བཟང་ཚེ་རིང་བཅས་ས་གནས་འོས་བསྡུ་ལས་ཁང་གི་ཚོགས་མི་ ༡༡ དང་། ཟུར་དཔང་གསུམ་སྟེ། ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་པད་མ་ཚུལ་ཁྲིམས་དང་། ས་གནས་བུད་མེད་ལྷན་ཚོགས་ཀྱི་ཚོགས་གཙོ་ཀུན་བཟང་ཆོས་སྒྲོན། ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ངག་དབང་བཀྲིས་བཅས་མཉམ་ཞུགས་གནང་ཡོད་པ་རེད། བྱང་ཨ་རིའི་ས་གནས་འོས་བསྡུ་ལས་ཁང་གིས་དེ་ཉིན་ད་དུང་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༡༦ པའི་དགོངས་དོན་ལྟར། ས་གནས་འོས་བསྡུ་ལས་ཁང་གི་ཚོགས་མིར་ས་གནས་སོ་སོའི་འོས་ཤོག་བསྡུ་ཡུལ་གྱི་འགན་འཛིན་དུ་བསྐོ་གཞག་གནང་ཡོད་པ་བཅས་སོ།།
