༢༠༡༠ ཕྱི་ཟླ་ ༦ ཚེས་ ༡༡ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༨ ཐོག་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གིས་རྒྱ་གར་ལྷོ་ཕྱོགས་སེར་བྱེས་གྲྭ་ཚང་གི་དཔེ་མཛོད་གསར་པ་དབུ་འབྱེད་གནང་རྒྱུ་ཡིན་འདུག སྐབས་དེར་བཀའ་ཁྲི་མཆོག་གི་གྲྭ་མང་ཚོར་དཔེ་མཛོད་ཀྱི་ཁྱད་ཆོས་དང་ངོ་བོ། ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་ཡིན་འདུག དེ་ཉིན་ཆུ་ཚོད་ ༩ ནས་ ༡༡ ༸གོང་ས་༸སྐྱབས་མགོན་ཆེན་པོ་མཆོག་གི་མཛད་ཁུར་གསུམ་གྱི་ཐོག་བཀའ་ཁྲི་མཆོག་གིས་གསུང་བཤད་གནང་རྒྱུ་ཡིན་པ་དང་། སྐབས་དེར་གདན་ས་ཆེན་པོ་སེར་འབྲས་དགའ་གསུམ་ནས་དགེ་འདུན་གྲངས་ ༡༠ རེ་དང་། དཔལ་ལྡན་རྒྱུད་གྲྭ་སྟོད་སྨད་གཉིས་དང་བཀྲིས་ལྷུན་པོ་བཅས་ནས་དགེ་འདུན་གྲངས་ ༥ རེ་བཅས་ལྷན་ཞུགས་གནང་རྒྱུ་ཡིན་འདུག ཉིན་རྒྱབ་ཆུ་ཚོད་ ༢ ནས་ ༥ བར་གདན་ས་ཁག་གི་ནང་ཚན་རིག་སློབ་ཚན་བཞག་ན་དགེ་སྐྱོན། ཞེས་པའི་བརྗོད་གཞིའི་ཐོག་བཀའ་ཁྲི་མཆོག་གིས་གསུང་བཤད་གནང་རྒྱུ་ཡིན་འདུག
ཕྱི་ཚེས་ ༡༤ སྔ་དྲོ་ཆུ་ཚོད་ ༩ ནས་ ༡༢ བར་གཞུང་ཆེན་བཀའ་པོད་ལྔ་ལ་རིགས་གཅིག་རྐང་འཛིན་བྱེད་ཚུལ། ཞེས་པའི་བརྗོད་གཞིའི་ཐོག་བཀའ་ཁྲི་མཆོག་གིས་གསུང་བཤད་གནང་རྒྱུ་ཡིན་པ་མ་ཟད། དྲི་བ་དྲིས་ལན་ཡང་གནང་འཆར་ཡོད་འདུག ཆུ་ཚོད་ ༢ ནས་ ༥ བར་དུས་རབས་ ༢༡ གི་དགེ་འདུན་པ་ཞིག་གི་གནང་སྒོ་ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་དང་དྲི་བ་དྲིས་ལན་ཡང་གནང་རྒྱུ་ཡིན་པ་སེར་བྱེས་དཔེ་མཛོད་འགན་འཛིན་བསྟན་འཛིན་བྱང་ཆུབ་ཤཱ་སི་ལགས་ཀྱིས་འགྲེལ་བརྗོད་གནང་ཡོད་པ་བཅས།།
