༢༠༡༠ ཕྱི་ཟླ་ ༦ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༣ ཉིན་རྡ་སྟེང་བོད་ཁྱིམ་ཚོགས་ཁང་དུ་བོད་རིགས་གཞོན་སྐྱེས་ཚོར་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཕྱོགས་མཐའ་ཁག་གི་མཐོ་སློབ་སློབ་མ་གཙོ་བོར་འགྱུར་པའི་སློབ་ཕྲུག་བརྒྱ་ཕྲག་མང་པོར་དབུ་མའི་ལམ་གྱི་སྲིད་བྱུས་སོགས་དང་འབྲེལ་བའི་སྐོར་ལ་གསུང་བཤད་གནང་དོན།
དེ་རིང་འདིར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་ནས་བོད་རིགས་ན་གཞོན་ཚོར་ནང་ཆོས་ཀྱི་སློབ་སྟོན་ཞུས་ཏེ་གྲ་སྒྲིག་གནང་མཁན་བཀུར་འོས་སྤྱི་འཐུས་ཀྱི་དབུས་ཚོགས་མི་རྣམ་པ་ཚོ་དང་། བོད་ཕྲུག་ཁྱིམ་སྡེའི་དབུ་འཛིན་ལས་བྱེད་རྣམ་པ་ཚོ། དེ་བཞིན་སློབ་ཕྲུག་ན་གཞོན་མང་པོ་འཛོམས་གནང་བ་དེའི་ཐོག་བོད་མིའི་ཆབ་སྲིད་ཀྱི་གནས་བབ་དབུ་མའི་ལམ་གྱི་སྐོར་ལ་ངོ་སྤྲོད་བྱེད་རྒྱུ་བྱུང་བར་ཧ་ཅང་དགའ་པོ་བྱུང་། འཇིག་རྟེན་གྱི་སྤྱི་ཚོགས་གང་འདྲ་ཞིག་ཡིན་ཡང་ཆབ་སྲིད་ཀྱི་གཞི་རྟེན་མེད་པར་གནས་ཐུབ་རྒྱུ་མེད། གདོད་མའི་མི་ཚོའི་སྐབས་ཡིན་ན་ཆབ་སྲིད་ཀྱི་དགོས་མཁོ་དེ་ཙམ་མེད་ཀྱང་། སྤྱི་ཚོགས་ཀྱི་དཔལ་ཡོན་ཡར་རྒྱས་ཕྱིན་རྗེས་མི་རིགས་དང་རྒྱལ་ཁབ་ཀྱི་ངོ་བོ་བྱུང་བ་ནས་བཟུང་སྟེ་ཆབ་སྲིད་དེ་གལ་གནད་ཆེན་པོ་ཞིག་རང་བཞིན་གྱི་ཆགས་པ་རེད། སྤྱིར་བཏང་ཆབ་སྲིད་རང་གི་ཡར་རྒྱས་འགྲོ་ཕྱོགས་ལ་ཞིབ་འཇུག་གནང་བ་ཡིན་ན། མིའི་སྤྱི་ཚོགས་ཀྱི་དཔལ་ཡོན་དང་མཉམ་དུ་ཆབ་སྲིད་ཀྱི་གནས་བབ་དང། ཆབ་སྲིད་ཀྱི་ལྟ་གྲུབ་རིམ་པས་བྱས་ཏེ་ཡར་རྒྱས་ཕྱིན་པ་ཞིག་རེད། མིའི་སྤྱི་ཚོགས་ནང་ཆོས་ལུགས་དར་རྒྱས་བྱུང་བའི་རྗེས་ལ་ཆབ་སྲིད་དང་ཆོས་གཉིས་དེ་ཧ་ལམ་མཉམ་དུ་འདྲེས་པ་ལྟ་བུ་ཞིག་ཡོད། ཐོག་མར་ཆོས་ཀྱིས་ཆབ་སྲིད་བེད་སྤྱེད་གཏོང་རྒྱུ་དང་ཡུད་ཙམ་ཞིག་ནས་ཆབ་སྲིད་ཀྱིས་ཆོས་བེད་སྤྱོད་གཏོང་རྒྱུ་དེ་འདྲ་བྱས་ཏེ་མིའི་སྤྱི་ཚོགས་ཀྱི་འཕེལ་རིམ་ལ་བལྟས་ན་འདྲ་མིན་སྣ་ཚོགས་ཤིག་བྱུང་ཡོད། དེ་ནས་ནུབ་ཕྱོགས་ཀྱི་སྤྱི་ཚོགས་ལ་ཡེ་ཤུའི་ཆོས་ལུགས་ཤུགས་ཆེན་པོ་དར་བ་ནས་བཟུང་སྟེ་ནུབ་ཕྱོགས་རྒྱལ་ཁབ་མང་ཆེ་བས་ཆབ་སྲིད་ཐོག་ལ་ཡེ་ཤུའི་ཆོས་ཀྱི་ཤུགས་སྣོོན་ཧ་ཅང་ཆེན་པོ་སླེབས་ཏེ་ཆབ་སྲིད་ཀྱི་ཁ་ལོ་ཆ་ཚང་ཆོས་ཀྱི་བསྒྱུར་བ་རེད། ང་རང་ཚོ་བོད་ནང་ཆ་བཞག་ནའང་ནང་པའི་ཆོས་མ་དར་སྔོན་ནས་བོན་གྱི་ཆོས་ལུགས་ཡོད། བོན་གྱི་བོད་ཀྱི་ཆབ་སྲིད་ནང་ཤུགས་སྣོོན་ཧ་ཅང་ཆེན་པོ་ཐེབས་ཡོད་སོགས་དང་། ཡང་བཀའ་ཁྲི་མཆོག་གིས་གསུང་གསལ། བོད་ལ་ནང་པའི་བསྟན་པ་དར་བའི་རྗེས་ནང་ཆོས་ཀྱིས་བོད་པའི་ཆབ་སྲིད་ནང་ཤུགས་སྣོན་ཆེན་པོ་བསླེབས་ཡོད། གཞུང་གི་ཡིག་ཆ་མང་པོའི་ནང་ཆོས་སྲིད་གཉིས་ལྡན་ཞེས་འཁོད་ཡོད། ནུབ་ཕྱོགས་སུ་ཆབ་སྲིད་ཡར་རྒྱས་ཕྱིན་པའི་རྗེས་ཆོས་དང་ཆབ་སྲིད་གཉིས་མཉམ་དུ་འགྲོ་མ་ཐུབ་པར་ཆོས་དང་སྲིད་གཉིས་ཐ་དད་བྱེད་དགོས་པའི་དུས་ཚོད་ཅིག་ཆགས་ཡོད་སོགས་དང་། འདས་པའི་ལོ་ ༢༠༠ ནས་ ༢༥༠ བར་ང་ཚོའི་བོད་སྤྱི་དོན་གྱི་བྱེད་རྩོལ་དང་ཉེས་པ་བསགས་བཞག་པ་དེ་ཚོའི་གྲུབ་འབྲས་ཤིག་ཡིན་པ་ཤོད་མ་དགོས་པ་རེད།
ཆབ་སྲིད་ཀྱི་སྲིད་བྱུས་གང་འདྲ་ཞིག་གཏན་ལ་ཕབ་ནའང་འཕྲལ་ཕུགས་རྒྱང་གསུམ་གྱི་གནས་ཚུལ་མང་པོ་ཞིག་ལ་བསམ་ཤེས་དང་གོ་རྟོགས་ཆེན་པོོ་ཡོད་པའི་ཐོག་ནས་བྱེད་མ་ཐུབ་ན་རྒྱལ་ཁབ་དང་མི་རིགས་ལ་དཀའ་ངལ་འཕྲད་རྒྱུ་ཞིག་ཡིན་པ་དེ་རང་བཞིན་གྱི་ཡོང་གི་ཡོད་པ་ཞིག་རེད། ཅེས་བོད་ཀྱི་ཆབ་སྲིད་གནས་བབ་དེ་དག་ཇི་བཞིན་ཚང་བ་མེད་རྐྱེན་འཐུས་ཤོར་ཕྱིན་སྐོར་སོགས་དང་། ཡང་ཁོང་གིས་གསུང་དོན། ༸རྒྱལ་བ་སྐུ་ཕྲེང་བཅུ་བཞི་པའི་ཆབ་སྲིད་བདག་གིར་བཞེས་པའི་སྐབས་ལ་ཆབ་མདོ་མན་ཆད་རྒྱ་མིས་དབང་སྒྱུར་གྱི་གནས་ཚུལ་མང་པོ་ཞིག་གཞན་དབང་སྟབས་བསྟུན་གྱི་གནས་སྟངས་ཤིག་ཆགས་ཡོད། འོན་ཀྱང་གནད་དོན་སྡུག་ཤོས་དེ་ཚོའི་ནང་ནས་ཕུགས་རྒྱང་རིང་པོར་ཕན་ཐོགས་པའི་གནས་ཚུལ་མང་པོ་ཞིག་གོ་རིམ་སྒྲིག་ཐུབ་ཡོད། དེའི་ནང་ནས་གནད་འགག་ཆེ་ཤོས་ཤིག་ད་ལྟ་ང་ཚོས་བརྩོན་བཞིན་པའི་དབུ་མའི་ལམ་གྱི་སྲིད་བྱུས་འདི་རེད། དབུ་མའི་ལམ་གྱི་སྲིད་བྱུས་འདི་བོད་གཞིས་བྱེས་གཉིས་ཀྱི་ཆབ་སྲིད་ལངས་ཕྱོགས་གལ་གནད་ཆེ་ཤོས་ཆགས་ཡོད། འདིས་མ་འོངས་པ་ལའང་མི་རབས་ནས་མི་རབས་བརྒྱུད་དེ་བོད་མི་རིགས་གི་ཆབ་སྲིད་བདེ་ཐབས་དང་བོད་ཀྱི་ཆོས་དང་རིག་གཞུང་འཛིན་སྐྱོང་ལ་ཕན་ཐོགས་ཡོད་པའི་ཆབ་སྲིད་ཀྱི་ལངས་ཕྱོགས་ཧ་ཅང་ཕུན་སུམ་ཚོགས་པ་ཞིག་རེད་བསམ་གྱི་ཡོད། དེར་བརྟེན་ན་གཞོན་ཚོས་དབུ་མའི་ལམ་གྱི་སྲིད་བྱུས་ཞེས་པ་དེ་གསལ་པོ་མཁྱེན་དགོས་པ་གལ་ཆེན་པོ་རེད། སོགས་དང་། མཐའ་དོན་བཀའ་ཁྲི་མཆོག་གིས་དབུ་མའི་ལམ་གྱི་ལྟ་གྲུབ་དང་གཞི་རྟེན། དབུ་མའི་ལམ་གྱི་སྲིད་བྱུས་ངོ་བོ། དབུ་མའི་ལམ་གྱི་སྲིད་བྱུས་བཟུང་དགོས་པའི་རྒྱུ་མཚན། ད་བར་ཕན་ནུས་ག་རེ་བྱུང་ཡོད་པ། མ་འོངས་བར་ཕན་ཐོགས་ག་རེ་ཡོད་སོགས་ཀྱི་སྐོར་གསུང་བཤད་ཟབ་རྒྱས་གནང་རྗེས་སློབ་ཕྲུག་ཚོའི་དྲི་བར་ལན་འདེབས་ཀྱང་གནང་ཡོད།
