༢༠༡༠ ཕྱི་ཟླ་ ༦ ཚེས་ ༡ རེས་གཟའ་མིག་དམར།
༄༅། ཕྱི་ལོ་ ༢༠༡༠ ཟླ་ ༦ ཚེས་ ༡ ཉིན་རྡ་ས་ཐེག་ཆེན་གཙུག་ལག་ཁང་དུ་བོད་གཞུང་ཆོས་རིག་ལས་ཁུངས་ནས་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་མདོ་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་བྱུང་སྟེ་ཞེ་དགུའི་སྨོན་ལམ་དང་མཆོད་འབུལ་རྒྱ་ཆེ་གནང་ཡོད།
དེ་ཉིན་སྔ་དྲོ་ཆུ་ཚོད་ ༨ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་ཁྲིམས་ཞིབ་པ་ཆེ་བ་མཆོག་དང་། ཆོས་རིག་བཀའ་བློན་ཚེ་རིང་ཕུན་ཚོགས་མཆོག སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག རྡ་ས་ས་གནས་འགོ་འཛིན་ཚེ་རིང་ཕུན་ཚོགས་ལགས་བཅས་ཀྱིས་སྤོས་སྣེ་མངོན་བསུས་ཏེ་གདན་ཞུས་ཀྱིས་
༸གོང་ས་མཆོག་ཐེག་ཆེན་ཆོས་གླིང་གཙུག་ལག་ཁང་དུ་སྨོན་ལམ་མཆོད་འབུལ་གྱི་ཚོགས་མགོན་དུ་དབུ་བཞུགས་ཐོག་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། རྣམ་རྒྱལ་ཕན་བདེ་ལེགས་བཤད་གླིང་གི་མཁན་རིན་པོ་ཆེས་དབུས་རྡ་སའི་ཉེ་འཁོར་དགོན་ས་ཁག་གི་གྲྭ་བཙུན་རྣམ་པ། མང་གཙོའི་ཀ་བ་གསུམ་གྱི་མཛད་གཙོ་རྣམ་པའི་གཙོས་དབུས་ལས་ཁུངས་མ་ལག་དང་བཅས་པའི་ལས་བྱེད་ཆེ་ཕྲ་ཡོངས་དང་། སེར་སྐྱ་མི་མང་བཅས་མི་གྲངས་ ༢༠༠༠ བརྒལ་བ་ཚང་འཛོམས་ཐོག་བོད་གཞུང་ཆོས་རིག་ལས་ཁུངས་ནས་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་བརྒྱ་ཚར་དང་། སྣང་གསལ་མར་མེ་སྟོང་ཚར་བཅས་འབུལ་བཤམས་དང་འབྲེལ་འཕགས་མཆོག་འདུས་པ་རྒྱ་མཆོར་བསྙེན་བཀུར་དགེ་འདུན་སྔགས་གསུམ་ལ་སྐུ་འགྱེད་ཧིན་སྒོར་ ༥༠ རེ་དང་། རྡ་ས་མི་མང་ནས་སྐྱེས་རྟགས་གསེར་ཟངས་ལས་གྲུབ་པའི་སྟོན་པའི་སྐུ་བརྙན་ཕི་ཀྲི་གཉིས་བྱས་པ་ཞིག་དང་། གསོལ་ཇ། གསོལ་ཚོགས། སྐུ་འགྱེད་སྒོར་ ༥༠ རེ་དང་། སྐྱེ་རྒུ་མདོ་ས་ཡོམ་གདུང་སེལ་ཚོགས་ཆུང་གིས་སྐྱེས་རྟགས་སྟོན་པ་ཐུབ་པའི་དབང་པོ་གཙོ་བོར་བཞུགས་པའི་སྐུ་ཐང་གོས་ཤམ་ཅན་དང་། སྐུ་འགྱེད་སྒོར་ ༥༠ བཅས་དད་གདུང་དྲག་པོས་འབུལ་ལམ་ཞུས་ཡོད།ས་ཡོམ་གྱི་འཇིག་པས་རྐྱེན་འདས་སུ་སོང་བ་རྣམས་ཀྱི་མཚོན་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞིའི་རྒྱལ་བའི་གོ་འཕང་རིན་པོ་ཆེ་མྱུར་དུ་འཐོབ་པ་དང་། རྨས་སྐྱོན་གོད་ཆག་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱི་ཚེ་ལྷག་དོན་ལྡན་ཡོང་བ། དེ་བཞིན་བོད་གངས་ཅན་ལྗོངས་ཀྱི་གཙོས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་། བྱེ་བྲག་འབྱུང་བཞིའི་འཇིག་པ་མི་འབྱུང་བར་སྐྱེ་འགྲོ་རྣམས་བདེ་སྐྱིད་རྗོགས་ལྡན་དཔལ་ལ་ལོངས་སུ་སྤྱོད་ཐུབ་ཆེད་སྨོན་ལམ་དང་མཆོད་འབུལ་རྒྱ་ཆེ་གནང་ཡོད།
