༢༠༡༠ ཕྱི་ཟླ་ ༦ ཚེས་ ༡༧ རེས་གཟའ་ཕུར་བུ།
༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ན་རི་ཏྲ་གནམ་ཐང་དུ་༸ཞབས་སོར་འཁོད་བཞིན་པ།
༄༅། །ཕྱི་ལོ་ ༢༠༡༠ ཟླ་ ༦ ཚེས་ ༡༦ ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་ཉི་ཧོང་དུ་ཆིབས་སྒྱུར་སྐྱོང་སྐབས་བོད་མི་གཙོ་བོར་གྱུར་བའི་དད་ལྡན་སེར་སྐྱ་མང་ཚོགས་ཀྱིས་ལག་ཏུ་སྤོས་སྣེ་དང་དཀར་གཙང་གི་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། དེ་ཡང་མགོན་པོ་གང་ཉིད་མཆོག་ཉི་ཧོང་ཁུལ་དུ་ཟླ་ ༦ ཚེས་ ༡༩ ཉིན་ནས་ཚེས་ ༢༨ བར་ཉི་ཧོང་གི་གྲོང་ཁྱེར་ཊོཀ་ཁྱོ། ན་ག་ནོ། ཁ་ན་ཛ་ཝ། ཡོ་ཀོ་ཧ་མ་བཅས་གྲོང་ཁྱེར་ཁག་བཞིའི་ནང་མཛད་འཕྲིན་བསྐྱང་གནང་མཛད་རྒྱུ་ཡིན་འདུག
༸གོང་ས་༸སྐྱབས་མགོན་ཆེན་པོ་མཆོག་ལ་ཉི་ཧོང་ནང་པའི་དགོན་པ་ཛེན་ཀོ་ཇི་དགེ་འདུན་པ་རྣམས་ཀྱིས་ཕེབས་བསུ་ཞུ་བཞིནཔ།
དེ་ཡང་ཐོག་མར་ཕྱི་ཚེས་ ༡༩ ཉིན་༸གོང་ས་མཆོག་ཊོཀ་ཁྱོོ་ནས་ན་ག་ནོ་གྲོང་ཁྱེར་ལ་༸ཞབས་སོར་འཁོད་རྒྱུ་དང་། ཉིན་རྒྱབ་གྲོང་ཁྱེར་དེའི་ནང་རྟེན་གཞི་བྱས་པའི་དུས་རབས་བདུན་པའི་ནང་པའི་དགོན་པ་ཛེན་ཀོ་ཇི་ (Soto) ཞེས་པའི་མཁན་པོ་སྐུ་བགྲེས་གཞོན་གཉིས་ལ་མཇལ་ཁ་སྩལ་གྲུབ་རྗེས་དགོན་པའི་ཚོགས་ཁང་ཆེན་མོའི་ནང་བཀྲིས་ལྷུན་པོའི་དགེ་འདུན་པ་གྲངས་བཅུ་ནས་བཞེངས་པའི་སངས་རྒྱས་འོད་དཔག་མེད་ཀྱི་དཀྱིལ་འཁོར་དེར་རབ་གནས་མཛད་རྒྱུ་དང་། དེ་རྗེས་༸གོང་ས་མཆོག་དབུ་བཞུགས་ཐོག་ཛེན་ཀོ་ཇི་དགོན་པའི་ཚོགས་ཁང་ནང་སྐྱེ་རྒུ་མདོར་ས་ཡོམ་བྱུང་བ་དང་། དེ་བཞིན་འཛམ་གླིང་གི་ས་ཁུལ་གང་སར་འབྱུང་བའི་གོད་ཆག་དང་ཡང་སྒོས་འཛམ་གླིང་ནང་ཞི་བདེ་ཡོང་ཆེད་སྨོན་ལམ་དུས་ཡུན་སྐར་མ་ ༢༠ ནས་ ༣༠ ཙམ་འཚོགས་རྒྱུ་ཡིན་འདུག སྨོན་ལམ་གསོལ་འདེབས་གྲུབ་མཚམས་མགོན་པོ་གང་ཉིད་མཆོག་གིས་གསར་འགོད་པ་ཁག་གཅིག་དང་མཇལ་འཕྲད་ཀྱིས་བཀའ་སློབ་སྩལ་རྒྱུ་ཡིན་འདུག
ཕྱི་ཚེས་ ༢༠ ཉིན་གྱི་སྔ་དྲོ་ཉི་ཧོང་ཆོས་པ་ ༢༠༠ ཙམ་དང་ལྷན་ནང་ཆོས་དང་འབྲེལ་བའི་བགྲོ་གླེང་མཛད་རྒྱུ་ཡིན་པ་མ་ཟད། དེ་རྗེས་ཛེན་ཀོ་ཇི་དགོན་པའི་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ ༧༠༠༠ ཙམ་ལ་ཆོས་འབྲེལ་མཛད་རྒྱུ་ཡིན་འདུག
ཕྱི་ཚེས་ ༢༡ ཉིན་ན་ག་ནོ་གྲོང་ཁྱེར་ནང་རྟེན་གཞི་བྱས་པའི་སའི་ཧོ་ཇི་ (Saihoji) ཞེས་པའི་དགོན་པ་རྙིང་པ་ཞིག་ཡོད་པ་དེའི་ནང་ཆིབས་སྒྱུར་བསྐྱང་སྟེ་བོད་ལུགས་དང་མཐུན་པའི་སྐུ་འདྲ་ཕི་ཊི་བརྒྱད་ཙམ་ཡོད་པ་ཞིག་བཞེངས་ཡོད་པ་དེར་རབ་གནས་མཛད་རྒྱུ་དང་། དགོན་པ་དེའི་ནང་དད་ལྡན་མང་ཚོགས་ ༣༠༠ ཙམ་ལ་བདེན་བཞིའི་སྐོར་བཀའ་ཁྲིད་སྩལ་གནང་མཛད་རྒྱུ་ཡིན་འདུག
དེ་ནས་༸གོང་ས་མཆོག་ཉིན་རྒྱབ་ཏུ་ཁ་ན་ཛ་ཝར་༸ཞབས་སོར་འཁོད་དེེ་ཕྱི་ཚེས་ ༢༢ ཉིན་རྒྱབ་ཤེས་རབ་སྙིང་པོའི་བཀའ་ཁྲིད་སྩལ་གནང་མཛད་རྒྱུ་ཡིན་པ་དང་སྐབས་དེར་མི་གྲངས་ ༡༥༠༠ ནས་ ༢༠༠༠ ཙམ་ཞིག་བཀའ་ཆོས་ཞུ་བར་བཅར་རྒྱུའི་གོ་སྒྲིག་ཞུས་ཡོད་པ་རེད། དེར་གདན་ཞུ་ཕུལ་མཁན་དང་གོ་སྒྲིག་ཞུ་མཁན་ནི་བྷ་ཤུ་ཁ་ཡི་ཞེས་པའི་ཆོས་ཚོགས་ཤིག་ཡོད་པ་དང་། ཆོས་ཚོགས་དེས་བོད་པའི་སློབ་ཕྲུག་གི་ཤེས་ཡོན་དང་རིག་གནས་ཐོག་ལོ་ཡུན་ ༢༥ ཙམ་གྱི་རིང་ཐུགས་འཁུར་ཆེན་པོ་ཞིག་བཞེས་གནང་ཡོད།
ཕྱི་ཚེས་ ༢༣ ལ་སྐུ་ངལ་གསོ་གནང་རྒྱུ།
ཕྱི་ཚེས་ ༢༤ སྔ་དྲོ་གྲོང་ཁྱེར་ཡོ་ཀོ་ཧ་མར་༸ཞབས་སོར་འཁོད་རྒྱུ། ཉིན་རྒྱབ་དེར་མཐོ་རིམ་སློབ་གྲྭ་ ༡༥ ཙམ་ཞིག་ནས་ཁྱོན་བསྡོམས་སློབ་ཕྲུག་གྲངས་ ༡༠༠ ཙམ་ལ་དེང་སང་འཛམ་གླིང་ནང་གི་གནད་དོན་མང་པོ་ཞིག་གི་ཐོག་༸གོང་ས་མཆོག་གིས་ངོ་སྤྲོད་གནས་བསྡུས་ཤིག་བསྐྱང་རྗེས་བསམ་ཚུལ་བརྗེ་ལེན་གནང་རྒྱུའི་མཛད་རིམ་ཞིག་ཀྱང་ཡོད་པ་རེད།
ཕྱི་ཚེས་ ༢༥ ཉིན་གྱི་སྔ་དྲོ་སྐུ་ངལ་གསོ་གནང་རྒྱུ་དང་ཉིན་རྒྱབ་དེར་སོ་ཏོ་ཆོས་ལུགས་ (Soto) ཀྱིས་གོ་སྒྲིག་འོག་༸གོང་ས་མཆོག་གིས་སློབ་ཕྲུག་གྲངས་ ༡༦༠༠ ནས་ ༢༠༠༠ ཙམ་ཞིག་ལ་ཆོས་འབྲེལ་གྱི་བཀའ་སློབ་སྩལ་རྒྱུ་དང་། སློབ་གྲྭ་དེར་ཕྱི་ལོ་ ༢༠༠༨ ལོར་ཆིབས་སྒྱུར་བསྐྱངས་ཡོད།
ཕྱི་ཚེས་ ༢༦ ཉིན་གྱི་སྔ་དྲོ་རྟེན་འབྲེལ་བསྟོད་པ་དང་སེམས་བསྐྱེད་བཀའ་འཁྲིད་སྩལ་རྒྱུ་དང་། ཉིན་རྒྱབ་མི་མང་ལ་ནང་སེམས་ཀྱི་བདེ་སྐྱིད་དང་ཕན་ཚུན་འཆམ་མཐུན་མཉམ་གནས། ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་མཛད་རྒྱུ་ཡིན་པ་དང་། སྐབས་དེར་ནང་པའི་རྒྱལ་ཁབ་ཁག་བཞི་ཙམ་ཞིག་ནས་ལུང་པ་སོསོའི་སྐད་ཡིག་ཐོག་ཤེས་རབ་སྙིང་པོ་གདོན་རྒྱུ་དང་སྐབས་དེར་ཀོ་རི་ཡ་དང་། སོག་པོ། ཨུ་རུ་སུ་སོགས་ནས་མི་སྣ་ཁ་ཤས་དང་གཞུང་ཚབ་ཁག་ནས་བོད་པའི་རིག་གནས་ལ་དོ་སྣང་ཡོད་མཁན་གྱི་མི་སྣ་ཁག་གཅིག་དེ་བཞིན་ཕེབས་རྒྱུ་ཡིན། དེར་ཁྱོན་བསྡོམས་མི་གྲངས་ ༡༠༠༠༠ ཙམ་ཕེབས་རྒྱུའི་གོ་སྒྲིག་དང་འཆར་གཞི་ཡོད་པ་རེད།
ཕྱི་ཚེས་ ༢༧ ཉིན་སོ་ཏོ་ཆོས་ལུགས་ཀྱི་མ་དགོན་གཙོ་བོ་ཞིག་ཡོད་པ་དེ་གནས་གཞན་ནས་ད་ལྟའི་གནས་དེར་སྤོས་ཏེ་ལོ་ ༡༠༠ འཁོར་བའི་དུས་ཆེན་ཉིན་༸གོང་ས་མཆོག་ལ་གདན་ཞུ་ཕུལ་བ་ལྟར་ཆིབས་སྒྱུར་བསྐྱང་སྟེ་འབྲེལ་ཡོད་ཚོགས་མི་ ༢༠༠༠ ནས་ ༢༥༠༠ ཙམ་ལ་ཆོས་འབྲེལ་བཀའ་སློབ་སྩལ་འཆར་ཡོད་པ་རེད། ཕྱི་ཚེས་ ༢༧ ཉིན་རྒྱབ་དེར་རྒྱ་རིགས་གསར་འགོད་པ་དང་མཁས་པ་ཁག་གཅིག་མཉམ་དུ་མཇལ་ཕྲད་དང་། ཀོ་རི་ཡའི་མི་གྲངས་ ༦༠༠ ཙམ་ཞིག་ལ་མཇལ་འཕྲད་མཛད་འཆར་ཡོད།
ཕྱི་ཚེས་ ༢༨ སྔ་དྲོ་བོད་པ་ཚོར་མཇལ་ཁ་དང་དེའི་རྗེས་སིང་ག་པུར་བརྒྱུད་རྒྱ་གར་དུ་ཆིབས་ཞལ་བསྒྱུར་རྒྱུ་ཡིན་འདུག་པ་བཅས།།
