༢༠༡༠ ཕྱི་ཟླ་ ༥ ཚེས་ ༢༩ རེས་གཟའ་སྤེན་པ།
༄༅། །བོད་ཀྱི་གནད་དོན་ཐོག་མཁས་པ་དང་། སྙན་གྲགས་ཅན་གྱི་རྩོམ་པ་པོ་ཝང་ལི་ཞུང་གིས་གོ་སྒྲིག་འོག་བཙན་བྱོལ་དུ་བཞུགས་པའི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ཕྱི་ཟླ་ ༥ ཚེས་ ༢༡ ཉིན་ཊི་ཝི་ཊར་དྲ་ཐོག་ནས་རྒྱ་ཡིག་དྲ་གྲོགས་རྣམས་དང་ཆུ་ཚོད་གཅིག་རིང་སྐུའི་ཡང་སྲིད་ཕེབས་ཕྱོགས་དང་། པེ་ཅིང་དང་བཀའ་མོལ་གནང་བའི་སྐོར། རྒྱ་བོད་འབྲེལ་བའི་སྐོར་སོགས་ལ་དྲི་ལན་གནང་ཡོད། དྲ་ངོས་སུ་འགྲིམ་བཞིན་པ་རྣམས་འཐུས་ཚང་དེ་ཙམ་མེད་རུང་བླངས་བས་སྒྲ་བཅུག་བྱས་པ་རྣམས་བསྐྱར་དུ་རྩོམ་སྒྲིག་བྱས་རྗེས་ཀྲོའུ་ཡན་ནས་སྦོའུ་ཤུན་དྲ་ཐོག་ཏུ་བཏང་བའི་གཏམ་གླེང་ཆ་ཚང་གཤམ་དུ་ཕབ་སྒྱུར་ཞུས་ཡོད།
ཝང་ལི་ཞུང་གིས། ཐོག་མར་གུས་པར་འོས་པའི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཉིན་རེའི་བྲེལ་ཟིང་གི་མཛད་རིམ་ནས་དུས་ཚོད་བཏོན་ཏེ་རྒྱ་ཡིག་དྲ་གྲོགས་དང་གཏམ་གླེང་གནང་བ་ཐུགས་རྗེ་བཀའ་དྲིན་ཆེ་ཞུ་རྒྱུ་ཡིན།
པེ་ཅིང་གི་དུས་ཚོད་ཟླ་བ་ ༥ པའི་ཚེས་ ༡༧ སྔ་དྲོ་ཆུ་ཚོད་ ༡༠།༣༠ ནས་མགོ་བརྩམས་ཏེ་རྒྱ་ཡིག་དྲ་གྲོགས་རྣམས་ཀྱི་ ” ཊི་ཝི་ཊར་དྲ་ཐོག་ནས་བོད་ཀྱི་ཏཱ་ལའི་བླ་མ་མཆོག་དང་གཏམ་གླེང་ ” ཞུ་རྒྱུའི་དྲི་བ་རྣམས་གྷུ་གྷལ་ནང་ཕྱོགས་སྒྲིག་བྱས་པ་རྣམས་སྐུ་ཉིད་ལ་འབུལ་རྒྱུ་ཡིན། ཉིན་ ༤ ཙམ་གྱི་དུས་ཚོད་ནང་གྷུ་གྷལ་གྱིས་མ་གཞི་བར་མཚམས་རེར་ལས་ཀ་མ་བྱས་པར་བཀག་ཀྱང་། དེ་དང་བསྟུན་ནས་རྒྱ་ནག་གི་ངོས་ནས་གྷུ་གྷལ་ནང་ཕྱོགས་སྒྲིག་གི་དྲི་བ་ཁག་བཀག་སྡོམ་བྱས་པ་སོགས་བྱུང་ཡོད་ནའང་། མི་གྲངས་ ༡༢༥༣ ཙམ་ནས་དྲི་བ་ ༢༨༩ ཙམ་ཕུལ་འདུག་པ་དང་། འོས་ཤོག་གྲངས་ ༡༢༤༧༣ ཙམ་གཡུགས་ནས་དྲི་བ་བདམས་གསེས་བྱས་པ་རེད། ད་རེས་སྐུ་ཉིད་མཛད་བྲེལ་ཆེ་སྟབས་གླེང་མོལ་གྱི་དུས་ཚོད་འཐུས་ཚང་ཞིག་ཡོང་དཀའ་བས་དྲི་བ་གང་མང་ཞིག་ལ་ལེན་འདེབས་ཞུ་རྒྱུ་རེ་བའང་རྒྱག་གི་མེད། ད་ཐེངས་ནི་མགོ་བཙུགས་ཙམ་ཞིག་ཡིན། ལམ་ཁ་འདི་ལྟ་བུ་ཞིག་གསར་བསྐྲུན་བྱས་པས་ད་ནས་བཟུང་བྱ་ཐབས་འདི་ལ་བརྟེན་ནས་སྐུ་ཉིད་དང་རྒྱ་ནག་དམངས་ཁྲོད་སྤྱི་ཚོགས་དབར་མུ་མཐུད་རང་དབང་ངང་ཕན་ཚུན་དགོངས་འཆར་བརྗེ་རེས་གནང་ཆོག་པས་ཕྱོགས་གཉིས་ཀྱི་དངོས་ཡོད་གནས་ཚུལ་རྒྱུས་ལོན་ཐུབ་རྒྱུར་ཕན་པ་ངེས་ཅན་ཡོད། གནད་དོན་འདིར་དྲ་ཐོག་ཏུ་མཉམ་ཞུགས་གནང་མཁན་ཡོངས་ནས་གྷུ་གྷལ་ནང་དྲི་བ་རེ་རེ་བཞིན་ ༼འགྲིག་གི་འདུག༽ ཡང་ན་ ༼དེ་ཙམ་ཡག་པོ་མི་འདུག༽ ཅེས་པའི་འདེམས་སྒྲུག་ཐོག་འོས་འཕེན་བྱས་ཡོད། དེ་ནས་འོས་གྲངས་གོ་རིམ་གཞིར་བཟུང་གི་སྐུ་ཉིད་ལ་དྲི་བ་ཁག་འབུལ་རྒྱུ་ཡིན།
༸གོང་ས་མཆོག་གིས། ཧ་ཅང་ཡག་པོ་འདུག
ཝང་ལི་ཞུང་གིས། གཤམ་དུ་ངས་ཊི་ཝི་ཊར་དྲ་ཐོག་ནས་གྷུ་གྷལ་ནང་ཕྱོགས་སྒྲིག་བྱས་པའི་དྲི་བ་ཁག་རྒྱབ་སྐྱོར་གྱི་ཨང་རིམ་གཞིགས་ཏེ་སྐུ་ཉིད་ལ་དྲ་གྲོགས་ཚོའི་དགོངས་འཆར་བརྒྱུད་འབུལ་ཞུ་རྒྱུ་ཡིན། མཆན། དྲི་བ་འདོན་མཁན་ཕལ་མོ་ཆེས་བཅོས་མིང་བེད་སྤྱོད་བྱས་འདུག་པས་རེ་རེ་བཞིན་ངོ་སྤྲོད་བྱ་རྒྱུ་མིན་ལ་རྒྱབ་སྐྱོར་ཚད་རིམ་འདི་དག་གིས་དྲ་གྲོགས་སྤྱིའི་རྣམ་འགྱུུར་ཚབ་མཚོན་བྱེད་ཐུབ་ཀྱི་ཡོད།
༸གོང་ས་མཆོག་གིས། འགྲིག་གི་རེད།
༸གོང་ས་མཆོག་གིས། དེ་རིང་སྐུ་ཞབས་ཝང་ལི་ཞུང་གིས་འདི་ལྟ་བུའི་གལ་གནད་ཆེ་བའི་གཏམ་གླེང་གི་གར་སྟེགས་ཤིག་བསྐྲུན་རྐྱེན། ང་ཚོར་རྒྱ་ནག་མི་དམངས་དང་སྐད་ཆ་ཤོད་རྒྱུའི་གོ་སྐབས་འདི་འདྲ་ཞིག་བྱུང་བར་ཤིན་ཏུ་དགའ་པོ་བྱུང་། འོན་ཀྱང་། བློ་ཕམ་སྐྱེས་དགོས་པ་ཞིག་ལ། འདས་པའི་ལོ་མང་རིང་ང་ཚོས་རྒྱ་ནག་གཞུང་དང་འབྲེལ་ལམ་བཟང་དུ་འགྲོ་ཆེད་དཀའ་ལས་བརྒྱབ་པ་དག་ལ་དངོས་ཡོད་ཀྱི་གྲུབ་འབྲས་ཐོན་མེད། ཡིན་ནའང་། ངོས་ནས་རྒྱ་ནག་མི་དམངས་ལ་སྔར་བཞིན་རེ་བ་ཆེན་པོ་རྒྱག་བཞིན་ཡོད་ལ་ཡིད་ཆེས་གཏིང་ཚུགས་བྱེད་ཀྱི་ཡོད། དེར་བརྟེན། ད་ཐེངས་རྒྱ་ནག་མི་དམངས་དང་འབྲེལ་ལམ་བྱེད་རྒྱུ་བྱུང་བ་འདི་ཧ་ཅང་དགའ་པོ་བྱུང་།
ཝང་ལི་ཞུང་གིས། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སྐུ་ཁམས་བཟང་། སྐུ་ཉིད་ལ་ངས་ཐད་ཀར་བཀའ་འདྲི་ཞུ་རྒྱུ་འདི་དག་ལ་དགོངས་ཡངས་གནང་རོགས། ད་རེས་རྒྱབ་སྐྱོར་གྱི་འོས་གྲངས་ཆེས་མང་ཤོས་ཐོབ་པའི་དྲི་བ་ཁག་གཉིས་ཡོད་པ་སྟེ།
དང་པོ། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སྐུ་ཁམས་བཟང་། ངས་ཁྱེད་ལ་འབྱུང་འགྱུར་བོད་ཀྱི་ཆོས་ལུགས་དབུ་ཁྲིད་སྐོར་བཀའ་འདྲི་ཞུ་རྒྱུ་ཡིན། སྐུ་ཉིད་འཚོ་བཞུགས་མེད་པའི་གནས་སྐབས་སུ་ད་ལྟའི་པཌྷ་ཆེན་སྐུ་ཕྲེང་བཅུ་གཅིག་པ་གཉིས་ཡོད་པ་ནང་བཞིན་ཆགས་སྲིད་པས། དེའི་ཐད་གང་ཉིད་མཆོག་ལ་དགོངས་འཆར་ག་རེ་ཡོད་དམ། འདི་ཐད་ཁ་སྣོན་བྱེད་རྒྱུ་ཞིག་ལ། རྒྱབ་སྐྱོར་གྱི་གྲངས་ཚད་ཨང་དགུ་པར་སླེབས་པའི་དྲི་བར་ཏཱ་ལའི་བླ་མ་མཆོག་སྐུ་འཚོ་བཞུགས་མེད་སྐབས་རྒྱ་གཞུང་གིས་རྒྱལ་ནང་དུ་སྤྲུལ་སྐུ་ཞིག་འདེམས་རྒྱུ་གཏན་འཁེལ་བ་ཟེར་བའི་དྲི་བ་འདི་གཉིས་སྤྱིའི་ཆ་ནས་གཅིག་མཚུངས་རེད། དྲི་བ་འདི་གཉིས་བསྡོམས་པའི་རྒྱབ་སྐྱོར་བའི་མི་གྲངས་ ༥༥༦ ཟིན་ཡོད། མིག་སྔའི་ནང་རྒྱབ་སྐྱོར་ཚད་གྲངས་ཆེས་མང་ཤོས་སླེབས་ཡོད། འདི་ཐད་ནས་སྐུ་ཉིད་ལ་དགོངས་ཚུལ་ག་རེ་ཡོད་དམ།
༸གོང་ས་མཆོག་གིས། ཕྱི་ལོ་ ༡༩༦༩ ལོར་ངོས་ནས་ཕྱི་ཕྱོགས་སུ་དངོས་གཞིའི་ཁྱབ་བསྒྲགས་ཤིག་བྱས་ཡོད། དེ་ནི་ཏཱ་ལའི་བླ་མའི་སྐུ་སྐྱེ་ངོས་འཛིན་བྱེད་ཕྱོགས་ཀྱི་སྒྲིག་གཞི་འདི་ཕྱིས་འབྱུང་རྒྱུན་སྐྱོང་བྱེད་རྒྱུ་ཡིན་དང་མིན་ཟེར་བ་འདི་རེད། ཨ་ཅང་ཅང་དོན་གནད་འདི་བོད་མི་དམངས་ལ་སྐད་ཆ་འདྲི་དགོས་པ་རེད་ལ་བོད་མི་དམངས་ཀྱི་ཐག་གཅོད་ལ་རག་ལུས་ཡོད། གཞན་ཡང་ཕྱི་ལོ་ ༡༩༩༢ ལོར་ངོས་ནས་གཞུང་འབྲེལ་ཐོག་དངོས་སུ་ཁྱབ་བསྒྲགས་ཀྱང་བྱས་ཡོད། དེའི་ནང་དུ་འབྱུང་འགྱུར་བོད་ཀྱི་གནད་དོན་ཐག་གཅོད་བྱུང་མཚམས། བོད་གཞུང་གི་གོ་གནས་ཀྱང་འཁུར་རྒྱུ་མིན་པར་ངོས་ནས་གསལ་བརྗོད་བྱས་ཡོད། བོད་ཀྱི་ལས་དོན་མཐའ་དག་བོད་ནང་དུ་གོ་གནས་འཛིན་བཞིན་པའི་དབུ་ཁྲིད་ཚོས་མུ་མཐུད་འགན་འཁུར་བྱས་མཆོག ངོས་ཀྱིས་གོ་དབང་ཡོད་ཚད་མི་དམངས་ཀྱིས་བདམས་ཐོན་བྱུང་བའི་བོད་ཀྱི་དབུ་ཁྲིད་དེར་རྩིས་སྤྲོད་བྱེད་རྒྱུ་ཡིན། ཕྱི་ལོ་ ༢༠༠༡ ནས་བོད་ཀྱི་བཙན་བྱོལ་སྤྱི་ཚོགས་ནང་གཞུང་འཛིན་བཀའ་བློན་ཁྲི་པ་མི་དམངས་ཀྱིས་བདམས་ཐོན་བྱུང་ཡོད། གཞུང་འཛིན་བཀའ་ཁྲིའི་འགན་ཁུར་གྱི་ཡུན་ཚད་ལོ་ལྔ་རེ་ཡིན། དེའི་རྐྱེན་གྱིས་ཏཱ་ལའི་བླ་མའི་ཡང་སྲིད་ཀྱི་སྒྲིག་གཞི་མ་ལག་འདི་དེ་ཙམ་གྱི་གལ་ཆེན་མ་རེད་བསམས་ཀྱི་ཡོད། ངོས་རང་བདེ་ཐང་ངང་གནས་ཡོད་པས་འདིར་ཏཱ་ལའི་བླ་མའི་ཡང་སྲིད་ལམ་ལུགས་སྐོར་ཇི་ལྟར་བྱེད་དགོས་མིན་འབད་བརྩོན་བྱེད་ཀྱི་ཡིན། ཡིན་ནའང་། འདི་ཐད་ནས་རྒྱ་ནག་སྲིད་གཞུང་ལ་ངོས་ལས་ལྷག་པའི་ཐུགས་འཁུར་བྱེད་ཀྱི་ཡོད། ༼བཞད་གད་མཛད༽ རྒྱུ་མཚན་འདི་འདྲར་སོང་པཌྷ་ཆེན་གཉིས་ཐོན་པ་ནང་བཞིན་ཡོང་སྲིད་པ་རེད། འོན་ཀྱང་། འདི་ལྟ་བུས་དངོས་དོན་ལ་དེ་འདྲའི་རོགས་པ་ཐོན་གྱི་མ་རེད།
ཝང་ལི་ཞུང་གིས། རྒྱབ་སྐྱོར་གྲངས་ཚད་དང་པོའི་ཕྱི་མ། རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་སྐུ་ཕྲེང་བཅུ་གཅིག་པ་ཨེར་ཏེ་ནི་ཆོས་ཀྱི་རྒྱལ་མཚན་ལ་ལྟ་ཚུལ་ཅི་འདྲ་ཡོད།
༸གོང་ས་མཆོག་གིས། ངས་ཤེས་པ་ལྟར་ན་ཁོང་སྤྱང་གྲུང་ལྡན་པ་དང་། ནང་ཆོས་སློབ་གཉེར་ལ་ཡང་འབད་བརྩོན་བྱེད་ཀྱི་ཡོད། ཡིན་ནའང་། མི་དམངས་ཀྱི་ཁོང་ལ་ད་དུང་ཡང་དོགས་པའི་རྣམ་འགྱུར་ཞིག་བཟུང་ཡོད། ངས་ཀྱིས་བསམས་པར། གཙོ་བོ་དེ་ཁོ་རང་ལ་ཐུག་ཡོད་པ་རེད་སྙམ་གྱི་ཡོད། ནང་ཆོས་ཉམས་ལེན་ལ་བྱས་རྗེས་ཡོད་མཁན་ཞིག་ཆགས་ཐུབ་དང་མི་ཐུབ་དེ་ཧ་ཅང་གི་གལ་ཆེན་པོ་རེད། འདི་ནི་རང་ཉིད་ལ་བརྟེན་དགོས་པ་ཡིན།
ཝང་ལི་ཞུང་གིས། རྒྱབ་སྐྱོར་ཨང་གཉིས་པའི་དྲི་བ་འདིར་མི་གྲངས་ ༤༤༤ མོས་མཐུན་བྱས་ཡོད། དེ་ཡང་རྒྱ་ཡིག་དྲ་གྲོགས་ཚོས་ཚད་མཐོར་དོ་སྣང་བྱེད་པའི་དྲི་བ་ཞིག་རེད། བཙན་བྱོལ་བོད་གཞུང་གི་སྐུ་ཚབ་དང་རྒྱ་ནག་གཞུང་དབར་གྲོས་མོལ་བྱས་པའི་སྐོར་ཡིན། གྲོས་མོལ་ཐེངས་ག་ཚོད་བྱས་ན་ཡང་མཇུག་འབྲས་མེད་དོན་ཅི་ཞིག་རེད། དོན་དམ་པས་ཕྱོགས་གཉིས་ཀྱི་གནད་དོན་གང་ཞིག་གི་ཐོག་ནས་འདོད་མཐུན་ཡོང་གི་མེད་པ་རེད་དམ། མི་ལོ་བཅུ་ཕྲག་རིང་འདི་དོན་གྲོས་མོལ་བྱས་ནའང་གྲུབ་འབྲས་མེད་དོན་གང་ཡིན་ནམ།
༸གོང་ས་མཆོག་གིས། དོན་དག་གལ་ཆེ་ཤོས་ནི་རྒྱ་ནག་གཞུང་གིས་བོད་ལ་གནད་དོན་ཡོད་པ་མ་རེད་ཅེས་ཤོད་རྐྱང་བྱེད་ཀྱི་ཡོད། ཏཱ་ལའི་བླ་མ་སྒེར་གྱི་གནད་དོན་ཁོ་ན་རེད་ཅེས་ཤོད་ཀྱི་ཡོད་པ་རེད། དོན་དངོས་ཐོག་ང་མི་སྒེར་ལ་གནད་དོན་གང་ཡང་མེད། གཙོ་བོ་བོད་མི་ས་ཡ་དྲུག་གི་རིག་གཞུང་དང་། ཆོས་ལུགས། དེ་བཞིན་ཁོར་ཡུག་བཅས་ཀྱི་གནད་དོན་ལ་ཐུག་ཡོད། དུས་ནམ་ཞིག་ལ། དབུས་གཞུང་གིས་ཤར་ཏུར་ཁི་སི་ཐན་ལ་གནད་དོན་ཡོད་པ་ཁས་ལེན་བྱས་པ་བཞིན། བོད་ཀྱི་གནད་དོན་ཁས་ལེན་བྱེད་རྒྱུ་མ་ཟད། དོན་གནད་འདིར་གདོང་ལེན་ཡང་བྱེད་དགོས། འབད་བརྩོན་གྱིས་གནད་དོན་འདི་ཐག་གཅོད་བྱེད་པ་དེའི་ཚེ། ངོས་ནས་ཕྱར་གྲུ་མཉམ་འདེགས་བྱེད་ཀྱི་ཡིན། ཅིའི་ཕྱིར་ཞེ་ན། དེའི་ཚེ་ང་ཚོའི་དམིགས་འདུན་གཅིག་ཏུ་བབས་ཡོད་པ་ཡིན་ལ། བོད་ཀྱི་འཛུགས་སྐྲུན་དང་ཡར་རྒྱས། མཐུན་སྒྲིལ་བཅས་ཀྱི་སླད་དུའང་ཡིན། མིག་སྔར་རྒྱ་ནག་གཞུང་གི་བྱེད་བབས་བཙན་ཤེད་རང་བཞིན་གྱི་ལག་ཐབས་སྤྱད་ཡོད། ཁོང་ཚོས་བོད་ཀྱི་བརྟན་ལྷིང་ནན་བཤད་བྱེད་ཀྱི་ཡོད་ནའང་། ངོས་ཀྱི་བསམས་པར་བརྟན་ལྷིང་ནི་མིའི་སེམས་གཏིང་ནས་ཡིད་ཆེས་དང་བློ་གཏད་བྱས་ནས་ཡོང་དགོས་པ་ཞིག་རེད་སྙམ་གྱི་ཡོད།
ཝང་ལི་ཞུང་གིས། རྒྱབ་སྐྱོར་ཚད་གཞི་གསུམ་པར་སླེབས་པའི་ནང་དུ་དྲི་བ་གསུམ་ཡོད་པ་སྟེ།
དང་པོ། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སྐུ་ཁམས་བཟང་། མ་འོངས་པར་རྒྱ་ནག་གི་ཆབ་སྲིད་འགྲོ་ཕྱོགས་ཇི་ལྟར་འཕེལ་རྒྱས་ཕྱིན་པ་ཡིན་ནའང་། ད་ལྟའི་རྒྱ་མི་རིགས་དང་བོད་ཀྱི་མི་སེར་དཀྱུས་མའི་དབར་འཁོན་སེམས་ཆེ་རུ་འགྲོ་བཞིན་ཡོད། བོད་མི་གང་མང་གཅིག་ནས་གནད་དོན་དེ་དག་སྟབས་བདེ་བོའི་སྒོ་ནས་རྒྱ་མི་རིགས་ལ་ནག་ཉེས་གཡོག་གི་ཡོད། དོན་ངོ་མར་ང་ཚོ་རྒྱ་མི་ཡིན་ཡང།འདི་ལྟ་བུའི་སྲིད་དབང་གཅིག་སྡུད་ཀྱི་གནོད་འཚེ་མྱོང་མཁན་ཡིན་པ་གཅིག་མཚུངས་ཡིན། ཁྱེད་ཀྱི་གནད་དོན་འདིར་དགོངས་ཚུལ་ག་རེ་ཡོད་དམ།
༸གོང་ས་མཆོག་གིས། རྒྱ་བོད་དབར་གྱི་འབྲེལ་བ་དེ་ཕྱི་ལོ་ ༡༩༤༩ དང་། ཡང་ན། ༡༩༥༠ ནས་བྱུང་བ་ཞིག་མིན། མི་རིགས་གཉིས་ཀྱི་འབྲེལ་བ་དེ་ལོ་ངོ་སྟོང་ཚོ་གཅིག་ལྷག་གོང་ལ་ཁུངས་འདེད་བྱེད་དགོས་ཀྱི་ཡོད། འདི་འདྲའི་འབྲེལ་བ་དེར་ལོ་རྒྱུས་ནང་སྐབས་རེ་ཧ་ཅང་མཐུན་པོ་བྱུང་ཡོད་ལ། ཡང་སྐབས་རེ་རྩོད་འཛིང་ཡང་བྱེད་མྱོངས་ཡོད། ད་ཆ། རྩོད་རྙོག་ཅིག་གི་སྐབས་སུ་གནས་ཡོད་ཅེས་བརྗོད་ཆོག་པ་ཡིན། རྩ་བའི་གནད་དོན་དེ་གཞུང་གི་བཟོས་པ་ཞིག་ཡིན་པ་ལས་མི་དམངས་ཀྱི་བཟོས་པ་མིན། དེས་ན། ང་ཚོ་མི་དམངས་དང་མི་དམངས་དབར་གྱི་འབྲེལ་བ་ནི་ཆེས་ཤིན་ཏུ་གལ་ཆེན་རེད། དེ་དག་ལ་བསམ་ཏེ་ང་ཚོས་རང་དབང་ཅན་གྱི་རྒྱལ་ཁབ་ནང་དུ་རྒྱ་བོད་མི་རིགས་ཀྱི་མཐུན་སྒྲིལ་གསར་སྐྲུན་བྱ་རྒྱུར་འབོད་སྐུལ་དང་བསམ་འཆར་བཏོན་ཡོད་ལ་གྲུབ་འབྲས་ཀྱང་གང་ཙམ་ཐོན་ཡོད། དཀའ་ངལ་ཆེ་ཤོས་ཤིག་ནི། ཏེང་ཞའོ་ཕིང་གིས་བཏོན་པའི་དངོས་ཐོག་བདེན་འཚོལ་ལ་ལག་བསྟར་མ་བྱེད་པ་དེ་རེད། ཧུའུ་ཡོ་པང་ལྟ་བུས་གནད་དོན་དངོས་ལ་རྒྱུས་ལོན་བྱ་ཆེད། འབད་བརྩོན་ཆེན་པོ་བྱས་པ་རེད། ཉེ་བའི་ཆར་སྲིད་བློན་ཝུན་ཅ་པའོ་ཡི་རྩོམ་ཡིག་ཅིག་ནས་ཧུའུ་ཡོ་པང་གི་ལས་ཀའི་སྤྱོད་ཚུལ་ལ་གདེང་འཇོག་གནང་བ་རེད། གཞུང་ཕྱོགས་ཀྱི་ཡིག་ཆ་རྐྱང་རྐྱང་ལ་ཁུངས་འཛིན་མ་བྱས་པར་དོན་དངོས་ལ་རྒྱུས་ཡོད་བྱས་པ་རེད། དེ་བཞིན་དུ། རྒྱ་ནག་ནང་ཁུལ་དུ་དོན་དངོས་གནས་ཚུལ་ཤེས་རྟོགས་མེད་པ་དང་། སྤྱི་ཚོགས་ནང་ཕྱི་གསལ་ནང་གསལ་མེད་པའི་རྐྱེན་གྱིས་གནད་དོན་ཆེན་པོ་ཞིག་བཟོས་པ་རེད། གལ་ཏེ་ཕྱི་གསལ་ནང་གསལ་ཆགས་པ་ཡིན་ན་གནད་དོན་ཐག་གཅོད་བྱ་རྒྱུ་དང་། ལྐོག་བཟའ་རུལ་སུངས་ཉུང་དུ་གཏོང་བ་བཅས་ལ་ཕན་ཆ་ཆེན་པོ་ཡོང་གི་རེད།
ཝང་ལི་ཞུང་གིས། རྒྱབ་སྐྱོར་ཁ་གྲངས་གསུམ་པའི་དྲི་བ་ཕྱི་མ། རྒྱ་བོད་མི་རིགས་དབར་གྱི་མཛའ་མཐུན་འབྲེལ་བ་སྲུང་སྐྱོང་བྱ་རྒྱུར་སྐུ་ཉིད་ལ་ཐབས་ཤེས་གང་ཡོད་དམ།
༸གོང་ས་མཆོག་གིས། མ་གཞི་ངོས་རང་འཛམ་གླིང་འདིའི་སྟེང་གི་རྒྱལ་ཁབ་གང་དུ་སླེབས་པ་ཡིན་ནའང་། མི་ཞིག་གི་སེམས་ཁམས་ཁུར་ནས་ཡོད་དུས། གང་མང་མང་ཞིག་ནས་བརྩི་བཀུར་དང་ངོས་ལེན་ཐོབ་བྱུང་། གལ་ཏེ། རྒྱ་བོད་མི་རིགས་གཉིས་ལ་གཅིག་མཚུངས་ཀྱི་བསམ་པ་དང་། འདྲ་མཉམ་གྱི་རྨང་གཞི་ཞིག་ཡོད་ན། གནད་དོན་མང་པོ་ཞིག་ཐག་གཅོད་བྱེད་ཐུབ་ཀྱི་རེད། ངོས་ནས་རྒྱུན་པར་སྐམ་ས་ཆེན་མོ་ནས་ཡོང་བའི་མི་དམངས་དང་ཐུག་འཕྲད་བྱེད་ཀྱི་ཡོད། ཕྲན་ནས་ཁོང་ཚོ་ཧ་ཅང་བསམ་པ་རྣམ་དག་ཅིག་རེད་བསམ་གྱི་ཡོད། དེའི་རྐྱེན་གྱིས་ང་ཚོ་ཕན་ཚུན་འབྲེལ་གླེང་བྱ་རྒྱུར་དཀའ་ཚེགས་གང་ཡང་འཕྲད་ཀྱི་མེད། མི་དང་མིའི་བར་དུ་དོགས་པ་རྣམ་རྟོག་སྐྱེས་པ་འདི་ནི་རྒྱ་བོད་མི་རིགས་གཉིས་གཅིག་པུའི་གདོང་དུ་འཕྲད་པ་ཞིག་མ་རེད། འདི་ནི་འཛམ་གླིང་ཡོངས་རྫོགས་གཅིག་མཚུངས་རེད། དེའི་ཕྱིར་ང་ཚོ་ཕན་ཚུན་འབྲེལ་གཏུག་བྱེད་རྒྱུ་ཙམ་མ་ཟད་དོགས་པ་རྣམ་རྟོག་དག་ཀྱང་གསལ་དགོས་པ་རེད། ངོས་ནས་སའི་གོ་ལའི་སྟེང་གི་མི་སུ་འདྲ་ཞིག་ཕྲད་པ་ཡིན་ནའང་། མི་དང་མིའི་དབར་གྱི་འཆམ་མཐུན་ལ་ནན་བརྗོད་བྱེད་ཀྱི་ཡོད། འདི་ལྟར་བརྗོད་དགོས་དོན་རྒྱུ་མཚན་གཉིས་ཡོད། གཅིག་ནི། ང་ཚོ་ཚང་མ་མི་ཡིན་པ་གཅིག་མཚུངས་ཡིན་པས་རེད། འདི་ནི་རྨང་གཞི་ལྟ་བུ་ཞིག་རེད་ལ། གལ་འགངས་ཀྱང་ཧ་ཅང་ཆེན་པོ་རེད། གཉིས་སུ། ཆོས་ལུགས་དང་རིག་གནས། སྐད་ཡིག་བཅས་ཐ་དད་དུ་ཡོད་པས་ཡིན། ཕྱི་ལོ་ ༡༩༥༤ དང་ ༡༩༥༥ ལོར་ངོས་རང་པེ་ཅིང་དུ་ཡོད་སྐབས། ཕྲན་གྱིས་མག་ཁེ་སིའི་གཞུང་ལུགས་ནས་རྒྱལ་མཚམས་མེད་པའི་རིང་ལུགས་ནན་བརྗོད་བྱེད་ཀྱི་ཡོད་པ་ཤེས་ཡོད། དེས་མི་ཚང་མ་གཅིག་མཚུངས་ཡིན་པ་བསྟན་པ་རེད། གནད་དོན་དེར་ངོས་ནས་མོས་མཐུན་ཆེན་པོ་ཡོད།
ཝང་ལི་ཞུང་གིས། རྒྱབ་སྐྱོར་ཨང་བཞི་པའི་དྲི་བ་སྔ་མ། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་དང་འབྲེལ་བའི་ཡིག་ཆ་༽ ཞེས་པའི་ཇི་ལྟར་བྱས་ཏེ་བོད་ནང་གི་རྒྱ་མི་རིགས་ཚོའི་ཁེ་དབང་སྲུངསྐྱོབ་བྱ་མིན་སྐོར་བཀོད་མི་འདུག་པས། ཁྱེད་ཀྱི་རང་སྐྱོང་ཐོབ་རྗེས་ད་ལྟ་བོད་ཁུལ་དུ་གནས་སྡོད་བྱེད་བཞིན་ཡོད་པའི་རྒྱ་མི་རིགས་འདི་ཚོ་མུ་ཐུད་གནས་སྡོད་བྱེད་ཆོག་པར་ངོས་འཛིན་གནང་གི་ཡོད་དམ། རྒྱབ་སྐྱོར་ཨང་བཞི་པའི་དྲི་བ་ཕྱི་མ། སྐུ་ཉིད་ཀྱིས་ ༼བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་དང་འབྲེལ་བའི་ཡིག་ཆ༽ ཞེས་པ་ནས་བོད་ཁུལ་དུ་གནས་སྡོད་བྱེད་བཞིན་པའི་རྒྱ་མི་རིགས་ཚོ་ཇི་ལྟར་བྱས་ནས་འདྲ་མཉམ་ངང་ཐོན་སྐྱེད་དང་འཚོ་བ་སྐྱེལ་རྒྱུའི་ཁེ་ དབང་ལ་འགན་ཐེག་ཡོད་མིན་སྐོར་འགྲེལ་བརྗོད་ཅིག་གནང་ཐུབ་བམ། རྒྱ་མི་མང་པོ་ཞིག་གིས་ཁྱེད་ཀྱི་རང་སྐྱོང་ནི་རྣམ་པ་བསྒྱུར་བའི་རང་བཙན་དུ་ངོས་འཛིན་བྱེད་བཞིན་ཡོད། གང་ལགས་ཞེ་ན། རང་སྐྱོང་སྲིད་གཞུང་གིས་རྒྱ་མིར་མཐོང་ཆུང་དང་ཕྱིར་འབུད་བྱ་རྒྱུར་དོགས་པ་ཟ་བཞིན་ཡོད་པ་རེད།
༸གོང་ས་མཆོག་གིས། སྔ་དུས་སམ་ཕྱི་ལོ་ ༡༩༥༠ གོང་དུ་བོད་ཡུལ་ན་རྒྱ་མི་གནས་སྡོད་བྱེད་མཁན་ཡོད། ངོས་རང་གི་སྐྱེས་ཡུལ་ནའང་ཁ་ཆེའི་ཆོས་ལུགས་ལ་དད་མོས་བྱེད་མཁན་གྱི་ཧུའུ་མི་རིགས་ཡོད་ལ་རྒྱ་མི་རིགས་ཀྱང་ཡོད། འབྱུང་འགྱུར་ནང་རྒྱ་མི་རིགས་གནས་སྡོད་བྱེད་མཁན་ཏན་ཏན་ཡོང་གི་རེད། ཡིན་ནའང་། གནད་འགག་ཐུག་ས་ཞིག་ནི་ད་ལྟའི་ནང་སོག་ལྟ་བུ་ཆགས་མི་རུང་བ་དེ་རེད། སོག་རིགས་ཚོ་གྲངས་ཉུང་བ་ཆགས་ཡོད་པ་རེད། འདི་ལྟར་བྱས་ཚེ་རང་སྐྱོང་གི་དོན་སྙིང་བོར་བ་རེད། བོད་ས་འགའ་ཞིག་ཏུ་རྒྱ་མི་རིགས་ཀྱི་མི་འབོར་ཇེེ་མང་ལ་ཕྱིན་སྟབས་བོད་ཀྱི་སྐད་ཡིག་རིག་གཞུང་འཇིག་ཉེན་ཚབས་ཆེན་འཕྲད་ཡོད།
ཝང་ལི་ཞུང་གིས། རྒྱབ་སྐྱོར་ཨང་རིམ་ལྔ་པའི་དྲི་བ། སློབ་དཔོན་ཆེན་མོ་མཆོག སྐུ་ཉིད་ཀྱི་ཕྱག་དེབ་ནང་བཀོད་པ་ལྟར་ན། བོད་ཡུལ་ནི་ཞི་འཇམ་ལྡན་པའི་ནང་པའི་རྒྱལ་ཁབ་ཅིག་ལ་འགྲེལ་བརྗོད་གནང་པ་དང་། རྒྱ་ནག་གཞུང་གིས་མུན་ནག་དང་ཞིང་བྲན་ས་ཁུལ་ཞིག་ཏུ་འགྲེལ་བཤད་བྱས་པ་གཉིས་བར་ཐག་ཧ་ཅང་རིང་པོ་འདུག་པ་མ་ཟད། པར་རིས་དང་བརྙན་ཕབ་མང་པོ་ཞིག་ནས་དེ་སྔོན་གི་ཞིང་བྲན་ལམ་ལུགས་ཀྱི་གདུག་རྩབ་དང་མུན་ནག་དངོས་ར་འཕྲོད་ཡོད། སློབ་དཔོན་ཆེན་མོ་མཆོག་ནས་ཧེ་བག་འདི་ཙམ་ཇི་ལྟར་བྱས་ནས་བྱུང་བ་ཡིན་པ་འགྲེལ་བཤད་ཅིག་གནང་ན་འགྲིག་གམ།
༸གོང་ས་མཆོག་གིས། སྔ་དུས་ཀྱི་བོད་ཟེར་ནའང་འདྲ་ཕྱི་ལོ་ ༡༩༥༠ གོང་དུ་རྗེས་ལུས་ཀྱི་སྤྱི་ཚོགས་ཤིག་ཡིན་པ་རེད། སྒྲིག་ལམ་འཐུས་ཚང་མེད་པ་ང་ཚོས་ངོས་ལེན་བྱེད་ཀྱི་ཡོད། སྔ་མོའི་བོད་ནི་ལྷྷ་ཡུལ་རེད་ཅེས་སུས་ཀྱང་ཤོད་ཀྱི་མེད་པ་རེད། ད་ལྟའི་བོད་ཕྱི་ནང་གི་རྩམ་ཟན་ཁྲོད་དུ། མི་སུ་ཞིག་གིས་ཀྱང་ལམ་ལུགས་རྙིང་པར་བསྐྱར་ལོག་བྱེད་བསམ་གྱི་མེད་པ་རེད། དེ་ནི་རྨི་ལམ་ནང་དུ་ཡང་རྨིས་ཡོད་ཀྱི་མ་རེད་ཅེས་བཤད་ཆོག་པ་ལྟ་བུ་ཡིན། ཕྱོགས་གཞན་ཞིག་ནས་རྒྱ་ནག་སྲིད་གཞུང་གིས་སྔ་མོ་བོད་ཀྱི་སྤྱི་ཚོགས་ནི་དམྱལ་ཁམས་ནང་བཞིན་རེད་ཅེས་དྲིལ་བསྒྲགས་བྱེད་ཀྱི་ཡོད། འདི་ལྟ་བུའི་འགྲེལ་བརྗོད་དང་དངོས་ཡོད་གཉིས་ལའང་བར་འགྱངས་ཧ་ཅང་ཆེན་པོ་ཡོད། དེར་བརྟེན་དེ་སྔོན་རྒྱ་ནག་གིས་ ༼སྐྱེ་མི་མཆོག་པའི་མི༽ ཞེས་པའི་གློག་བརྙན་བཟོ་སྐྲུན་བྱས་པ་དེ་ཡང་ཁྱབ་བསྒྲགས་འབའ་ཞིག་གི་ཆེད་དུ་ཡིན་པ་རེད། བོད་མི་གང་མང་མང་ཞིག་གིས་ཁས་ལེན་བྱེད་ཐབས་ཡོད་པ་མ་རེད། ཅི་ཕྱིར་ཞེ་ན། གློག་བརྙན་གྱི་ནང་དོན་དང་དོན་དངོས་མཐུན་གྱི་མེད་པས་རེད། དཔེར་མཚོན་ན། རིག་གསར་སྐབས་སུ་རིག་གནས་གསར་བརྗེ་བྱས་པས་རྒྱལ་ཁ་ཆེན་པོ་ཐོབ་པ་ནན་བཤད་བྱེད་ཀྱི་ཡོད། ཡིན་ནའང་། དེའི་རྗེས་ནས་དངོས་ཡོད་གནས་ཚུལ་ལ་སྦ་གསང་བྱ་ཐབས་མེད་པ་ཆགས་དུས། དེ་ལྟ་བུའི་དྲིལ་བསྒྲགས་ལ་སྟོབས་ཤུགས་གང་ཡང་ཡོད་པ་མ་རེད། དེ་བཞིན་དྲུག་བཞིའི་གནད་དོན་ཡང་གཅིག་མཚུངས་རེད། འཛམ་གླིང་ཡོངས་ཀྱིས་ཧ་གོ་ནས་ཡོད་པ་རེད། འོན་ཏེ། རྒྱ་ནག་གཞུང་གིས་ཁྱབ་བསྒྲགས་བྱེད་སྐབས་ཕལ་ཆེར་གནས་ཚུལ་ཅི་ཡང་བྱུང་མེད་པ་ལྟར་བརྗོད་ཀྱི་ཡོད། གནད་དོན་ཆེས་གལ་འགངས་ཆེ་ཤོས་ཤིག་ནི། ཁྱེད་ཚོ་མི་རེ་ངོ་རེ་ནས་དྲང་བདེན་དང་། དངོས་ཡོད། ཚན་རིག་བཅས་ཀྱི་སྒོ་ནས་བརྟག་དཔྱད་དང་ཞིབ་འཇུག་བྱེད་དགོས་ངེས་རེད། འདི་ནི་ཧ་ཅང་གཙིགས་ཆེན་རེད། ངོས་ཀྱིས་ནམ་རྒྱུན་བོད་མི་ཚོར་བརྗོད་ཀྱི་ཡོད། ངོས་ཀྱིས་བཤད་པ་ལ་བརྟེན་ནས་ཁྱོད་ཀྱི་ཁས་ལེན་དང་དང་ལེན་བྱེད་མི་དགོས། ཁྱེད་ཀྱིས་རྟོག་ཞིབ་བྱོས་ཞེས་བརྗོད་ཀྱི་ཡོད། ནང་པ་ཞིག་ཡིན་པའི་ཆ་ནས་ཁྱེད་ཚོས་ངོས་ཀྱིས་་བཤད་པའི་བསླབ་བྱ་ལ་ཡང་དབྱེ་ཞིབ་དང་ཤེས་རྟོགས་གཏིང་ཚུགས་བྱ་དགོས།
ཝང་ལི་ཞུང་གིས། རྒྱབ་སྐྱོར་ཨང་རིམ་དྲུག་པའི་དྲི་བ། གལ་ཏེ་རྒྱ་ནག་གཞུང་གིས་སྐུ་ཉིད་ཕྱིར་བོད་དུ་ཕེབས་བཅུག་པ་དང་། བོད་རང་སྐྱོང་བྱ་བཅུག་པ་ཡིན་ན། སྐུ་ཉིད་ཀྱིས་བོད་དུ་ཆབ་སྲིད་ཀྱི་ལམ་ལུགས་གང་འདྲ་ཞིག་བསྣམས་ཕེབས་རྒྱུའི་རེ་བའམ་འཆར་གཞི་ཡོད་དམ།
༸གོང་ས་མཆོག་གིས། འདི་ནི་གཙོ་ཆེ་ཤོས་བོད་ནང་དུ་ཡོད་པའི་བོད་མི་ཚོ་དང་། ལྷག་པར་དུ་ཤེས་ཡོན་པ་ཚོས་དངོས་ཐོག་བདེན་འཚོལ་གྱི་རྣམ་པ་ལ་བལྟས་ནས་ཐག་གཅོད་བྱེད་རྒྱུ་རེད། འདས་པའི་མི་ལོ་ལྔ་བཅུའི་ནང་ང་ཚོས་བཙན་བྱོལ་སྤྱི་ཚོགས་སུ་སྤྱི་ཆོགས་ཀྱི་ལམ་ལུགས་མང་གཙོ་ཅན་དུ་མངོན་གྱུར་ཟིན་པ་རེད།
ཝང་ལི་ཞུང་གིས། རྒྱབ་སྐྱོར་ཨང་རིམ་བདུན་པའི་དྲི་བ་སྔ་མ། དྲི་བ་འདི་ནི་ཕལ་ཆེར་རྣོ་ངར་ཅན་ཞིག་རེད་འདུག ངས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་འབུལ་རྒྱུའི་འདོད་པ་ཆེན་པོ་ཡོད། རྒྱ་ནག་གཞུང་ཕྱོགས་ནས་སྐུ་ཉིད་ལ་སྐྱོན་བརྗོད་ཤུགས་ཆེ་ཤོས་ཤིག་ཀྱང་རེད། དེ་ནི་སྐུ་ཉིད་ཀྱི་བོད་དུ་དམག་དཔུང་བཅའ་འདོད་མི་བྱེད་པའི་རེ་བ་བཏོན་ཡོད་པ་རེད། འདི་ནི་རྣམ་པ་བསྒྱུར་བའི་རང་བཙན་གྱི་རྩ་བའི་སྣང་ཚུལ་ཞིག་རེད་ཟེར་གྱི་ཡོད། སྐུ་ཉིད་ཀྱི་ད་ལྟ་ཡང་འདི་ལྟར་བོད་དུ་དམག་དཔུང་བཅའ་འདོད་མ་བྱེད་རྒྱུའི་ཐུགས་རེ་གནང་གི་ཡོད་དམ། བདུན་པའི་དྲི་བ་ཕྱི་མ། དམག་དཔུང་བཅའ་འདོད་བྱེད་ཆོག་རྒྱུ་ནི་ས་ཁོངས་བདག་དབང་གི་དབང་ཆ་གལ་ཆེན་ཞིག་རེད། བོད་དུ་དམག་དཔུང་སྡོད་མི་ཆོག་པའི་ལངས་ཕྱོགས་འདི་ནི་རྒྱ་ཆེའི་མི་དམངས་ཡོངས་རྫོགས་ཀྱིས་ཕལ་ཆེར་དངས་ལེན་བྱ་ཐུབ་ཀྱི་མ་རེད། སྐུ་ཉིད་ཀྱིས་གཟིགས་ཚུལ་འདི་མཚམས་འཇོག་གནང་སྲིད་ཀྱི་རེད་དམ།
༸གོང་ས་མཆོག་གིས། སྤྱིར་ང་ཚོ་རང་སྐྱོང་ཤོད་ཀྱི་ཡོད། ཡིན་ནའང་ཕྱི་འབྲེལ་དང་རྒྱལ་སྲུང་དབུས་གཞུང་ནས་འགན་འཁུར་དགོས་ཞེས་ནམ་རྒྱུན་ནས་ཁ་གསལ་གཏིང་གསལ་བརྗོད་ཡོད། སྔ་དུས་ནས་ཕྲན་གྱིས་བརྗོད་མྱོང་། རྒྱ་གར་དང་བལ་ཡུལ་བཅས་མཐའ་འཁོར་རྒྱལ་ཁབ་ཁག་དང་མཛའ་གྲོགས་ཆགས་པ་ཡིན་དུས། ཕན་ཚུན་ཡིད་ཆེས་ཡོད་པ་རེད། དེའི་དུས་སུ་བོད་ཞི་བདེའི་ས་ཁུལ་ཞིག་ཆགས་པ་རེད། འདི་ནི་རེ་བ་དང་ཕུགས་བསམ་ཞིག་རེད། གཅིག་པ་རེད། འཛམ་གླིང་ཡོངས་གཅིག་པ་རེད། དེར་བརྟེན་སེམས་ཁྲལ་བྱེད་དགོས་པ་མ་རེད།
ཝང་ལི་ཞུང་གིས། རྒྱབ་སྐྱོར་ཨང་བརྒྱད་པའི་དྲི་། མིག་སྔའི་གནས་བབ་ནས་བལྟས་པ་ཡིན་ན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སྐུ་འཚོ་བཞུགས་རིང་ཞི་བའི་ངང་བོད་ཀྱི་གནད་དོན་ཐག་གཅོད་ཐུབ་རྒྱུ་རེ་བ་མེད་པ་ལྟར་ཆགས་ཡོད། སྐུ་ཉིད་ནས་བོད་ཀྱི་མ་འོངས་པའི་མདུན་ལམ་ལ་ཇི་ལྟར་གཟིགས་ཀྱི་ཡོད་དམ།
༸གོང་ས་མཆོག་གིས། རྒྱ་ནག་དམར་ཤོག་དབུ་བརྙེས་ནས་ལོ་ངོ་དྲུག་ཅུའི་ནང་བལྟས་པ་ཡིན་ན། ཕྲན་ནས་མའོ་ཡི་དུས་རབས་དང་། ཏེང་གི་དུས་རབས། ཅང་གི་དུས་རབས། ཧུའུ་ཡི་དུས་རབས་བཅས་དབྱེ་བ་ཕྱེ་ཀྱི་ཡོད།
འགྱུར་བ་ཧ་ཅང་ཆེན་པོ་ཐེབས་པ་རེད། དེའི་ཕྱིར་མི་རིགས་སྲིད་བྱུས་འགྱུར་བ་འགྲོ་ངེས་ཡིན་པ་ངོས་ལ་ཡིད་ཆེས་བརྟན་པོ་ཡོད། ལྷག་པར་དུ་བོད་ཀྱི་གནད་དོན་ཕན་ཚུན་རོགས་རེས་ཀྱི་རྨང་གཞིའི་ཐོག་ཐག་གཅོད་བྱེད་ཐུབ་ཀྱི་རེད། དེ་སྔོན་བོད་དུ་ལས་ཀ་བྱེད་ནས་ད་ལྟ་ལས་འཁྱུར་ངལ་གསོ་བྱས་ནས་བཞུགས་ཡོད་པའི་ལས་བྱེད་དང་ཏང་ཡོན། དེ་བཞིན་རྒྱ་ནག་གི་ཤེས་ཡོན་པ་ཚོས་མི་རིགས་སྲིད་ཇུས་ལུགས་མཐུན་མེད་པའི་བསམ་འཆར་འདོན་མགོ་བརྩམས་ནས། མི་རིགས་སྲིད་བྱུས་ལ་བསྐྱར་ཞིབ་དང་ཡར་རྒྱས་གཏོང་དགོས་པ་བརྗོད་ཡོད། དེས་ན། ངོས་ཀྱི་བསམ་པར་རིང་མིན་ནང་འགྱུར་བ་ཏན་ཏན་འགྲོ་གི་རེད་ལ། གནད་དོན་ཐག་གཅོད་བྱེད་ཐུབ་ཀྱི་རེད།
ཝང་ལི་ཞུང་གིས། གུས་བཀུར་འོས་པའི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག རྒྱ་ཡིག་དྲ་གྲོགས་ཚོས་བཏོན་གནང་བའི་དྲི་བ་ ༢༧༠ ནས་དེ་རིང་ང་ཚོས་ཉུང་ངུ་ཞིག་བཏོན་ནས་མགོ་བརྩམས་པ་རེད། སྐུ་ཉིད་མཆོག་གི་བཀའ་ལན་གནང་བ་ཁག་ལ་ལྟ་ཚུལ་དང་གནད་དོན་གསར་པ་བཅས་ད་དུང་ཡང ༼ཏཱ་ལའི་བླ་མ་དང་ཊི་ཝི་ཊར་དྲ་ཐོག་གི་གཏམ་གླེང༽ ནང་མུ་མཐུད་འཕར་སྣོན་ཡོང་གི་རེད་དམ། སྐུ་ཉིད་ནས་མུ་མཐུད་ཐུགས་སྣང་ཡོང་བ་ཞུ་རྒྱུ་མ་ཟད། ང་ཚོས་ཐུན་མོང་ནས་འབད་བརྩོན་དང་། དུས་རབས་ལ་འགྱུར་བ་གཏོང་ནུས་ཀྱི་དྲ་རྒྱའི་ལག་རྩལ་འདི་བཀོལ་སྤྱོད་མཐར་ཕྱིན་པ་བྱས་ཏེ། བོད་ཀྱི་གནད་དོན་ཐག་གཅོད་བྱེད་པའི་འབད་བརྩོན་གྱི་ཁ་ཕྱོགས་དེ་དཔོན་རིགས་ཚོའི་བར་གྱི་ལྐོག་གྲོས་ནས་རྒྱ་བོད་མི་དམངས་ཚོས་ལྷག་བསམ་ཟོལ་མེད་དང་དམངས་གཙོའི་གྲོས་མོལ་ནང་རྒྱ་སྐྱེད་བྱེད་དགོས་པ་བཅས། ཐུགས་རྗེ་ཆེ་ཞུ་རྒྱུ་ཡིན།
༸གོང་ས་མཆོག་གིས། སླད་མར་ཡང་འདི་ལྟ་བུའི་གཏམ་གླེང་རྒྱུན་པར་བྱེད་ཐུབ་ན་སྙམ་གྱི་ཡོད། ཅེས་ཐད་ཀར་བཀའ་ལན་སྩལ་བ་བཅས།།
