༢༠༡༠ ཕྱི་ཟླ་ ༥ ཚེས་ ༡༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༡༣ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཨིན་ཌི་ཡཱ་ནའི་ས་ཁུལ་བུ་ལུ་མིང་ཊོན་ནང་རྟེན་གཞི་བྱས་པའི་བོད་སོག་ནང་པའི་རིག་གཞུང་གཅེས་སྐྱོང་བསྟིེ་གནས་ཁང་དུ་བོད་རིགས་དང་སོག་རིགས་རྣམས་ལ་བཀའ་སློབ་སྩལ་ཡོད།
དེ་ཡང་ཨ་རིའི་མངའ་སྡེ་ཨིན་ཌི་ཡ་ན་དང་ཨེ་རི་ཛོ་ན། གྲོང་ཁྱེར་ནིའུ་ཡོཀ ཨིལ་ལི་ནོ་ཨི་སེ། མིན་ནེ་སོ་ཊ། ཁལ་ལི་ཕོར་ནི་ཡ་དང་། དེ་བཞིན་ཁེ་ཎ་ཌ་བཅས་ནས་ཕེབས་པའི་བོད་མི་རྣམས་དང་། གཞན་ཡང་ས་གནས་དད་ལྡན་སོག་པོའི་མི་རིགས་བཅས་ལ་མགོན་པོ་གང་ཉིད་མཆོག་གིས་ཤེས་ཡོན་གལ་ཆེ་ཚུལ་དང་། ལྷག་པར་རང་གི་ཕ་མེས་ནས་དར་བའི་ཆོས་དང་རིག་གཞུང་འཛིན་སྐྱོང་སྤེལ་གསུམ་བྱེད་རྒྱུ། ནང་ཆོས་ཟེར་བ་དེ་ཕྱག་འཚལ་རྒྱུ་དང་། ཞལ་འདོན་གདོན་རྒྱུ་ཙམ་མིན་སྐོར་བཀའ་སྩལ། གཞན་ཡང་༸གོང་ས་མཆོག་གིས་སྔ་མོ་སྐབས་ཤིག་ལ་ནང་ཆོས་སློབ་གཉེར་བྱེད་རྒྱུ་དེ་སྣང་མེད་དུ་བཞག་ནས་ཆོ་ག་ཕྱག་ལེན་དེར་ཧ་ཅང་གལ་ཆེ་འཛིན་པའི་གནས་སྟངས་ཤིག་བོད་ནང་ཡོད་པའི་དུས་ཚོད་དེ་རྫོགས་ཟིན་སྐོར་དང་། ད་ཆ་ནང་ཆོས་ལ་སློབ་གཉེར་བྱས་ཏེ་དུས་རབས་ ༢༡ པའི་ནང་པ་སངས་རྒྱས་པ་ཞིག་ཆགས་ཐུབ་པ་དགོས་གལ་ཆེ་ཚུལ་སྐོར་བཀའ་སྩལ་དོན། གལ་ཏེ་ནང་ཆོས་ལ་སློབ་སྦྱོང་ཡག་པོ་བྱས་ཚེ་དེང་དུས་འཕྲུལ་ཆས་དང་། ཚན་རིག་ཡར་རྒྱས་ཀྱི་ཐོག་ནས་ཆོས་ཀྱི་རིན་ཐང་གོང་མཐོར་འགྲོ་བཞིན་པ་དེ་མཐོང་ཐུབ།
དེང་སང་བོད་པའི་གཞོན་སྐྱེས་དང་ཧི་མཱ་ལ་ཡའི་ཁུལ་གྱི་གཞོན་སྐྱེས་ཚོས་ནང་ཆོས་ལ་དོ་སྣང་གསར་པ་སྤྲོད་མཁན་ཇེ་མང་འགྲོ་བཞིན་པ་དེས་བློ་སྤོབས་སྐྱེས་དགོས་པ་ཞིག་རེད་ཅེས་བཀའ་སྩལ། ཕྱོགས་མཚུངས་མགོན་པོ་གང་ཉིད་མཆོག་གིས་བཀའ་སློབ་ཕེབས་དོན། ངོས་ཀྱིས་ནང་ཆོས་སློབ་གཉེར་བྱེད་དགོས་པའི་འབོད་སྐུལ་ཡང་ཡང་བྱས་པར་བརྟེན་བོད་ནང་དགེ་ལུགས་ཀྱི་དགོན་པ་ཙམ་མིན་པར་ས་སྐྱ་དང་རྙིང་མ། བཀའ་བརྒྱུད་བཅས་ཀྱི་དགོན་སྡེ་སོ་སོའི་ནང་དུ་ནང་ཆོས་སློབ་གཉེར་གཏིང་ཟབ་བྱ་རྒྱུ་རིམ་པས་ཇེ་མང་འགྲོ་བཞིན་ཡོད་པའི་གནས་ཚུལ་གོ་ཐོས་བྱུང་། ནང་ཆོས་ལ་དད་པ་མེད་མཁན་ཞིག་ཡིན་ན་ནང་ཆོས་ལ་སློབ་གཉེར་བྱས་དང་མ་བྱེད་ཀྱི་ཁྱད་པར་གང་ཡང་མེད། འོན་ཀྱང་ནང་པ་ཡིན་ཟེར་ནས་ནང་ཆོས་གོ་དོན་མ་ཤེས་ན་ཡག་པོ་མིན། ནང་ཆོས་སློབ་གཉེར་བྱེད་རྒྱུ་དེ་དགོན་པ་གྲྭ་ཚང་གཅིག་པུའི་འགན་རེད་བསམ་པའི་བསམ་བློ་དེ་ནོར་བ་མ་ཟད། རྗེས་ལུས་ཀྱི་བསམ་བློ་ཞིག་ཀྱང་ཡིན།
ནང་ཆོས་ལ་ནང་པའི་ཚན་རིག ནང་པའི་ལྟ་གྲུབ་ཀྱི་རྣམ་གཞག ནང་ཆོས་དང་འབྲེལ་བའི་ཉམས་ལེན་བཅས་ཆ་གསུམ་ཡོད་པ་ལས་ཆ་དང་པོ་དང་གཉིས་པར་ཀུན་ཁྱབ་ཀྱི་རིན་ཐང་ཞིག་ཡོད། ནང་པ་སངས་རྒྱས་པའི་ཆོས་ལ་ཡིད་ཆེས་མི་བྱེད་མཁན་ཞིག་ཡིན་ནའང་། ནང་པའི་ཚན་རིག་ཀྱི་རྣམ་གཞག་དང་། ལྟ་གྲུབ་ཀྱི་རྣམ་གཞག་ལ་སློབ་སྦྱོང་བྱས་ཚེ་ཕན་ཐོགས་ཆེན་པོ་ཡོད་ཅེས་བཀའ་སྩལ། དེ་བཞིན་༸གོང་ས་མཆོག་གིས་བོད་སོག་རྒྱལ་ཁབ་གཉིས་པོའི་ནང་དུ་ནང་ཆོས་ཐོག་ཐུན་མོང་གི་སློབ་གཉེར་བྱེད་རྒྱུའི་སྲོལ་རྒྱུན་ཞིག་ཡོད་པ་མ་ཟད། ནང་ཆོས་སློབ་གཉེར་བྱ་རྒྱུ་དེས་རང་གི་ངོ་བོ་ཆ་ཚང་བ་ཞིག་ཤེས་རྒྱུར་ཕན་ཐོགས་ཡོད།
གལ་ཏེ་ནང་ཆོས་སློབ་གཉེར་བྱེད་དགོས་ན་བོད་སྐད་ཤེས་རྒྱུ་དེ་གལ་ཆེན་པོ་ཆགས་ཡོད་ཅེས་དང་། དེ་བཞིན་མགོན་པོ་གང་ཉིད་མཆོག་གིས་མདུན་གྲལ་དུ་ཡོད་པའི་བོད་ཕྲུག་ཕོ་མོ་ཁག་གཅིག་ལ་གཟིགས་ནས་གལ་ཏེ་ཁོང་ཚོར་དང་ཐོག་བོད་ཡིག་ཐོག་ནས་ནང་ཆོས་སློབ་གཉེར་བྱ་རྒྱུར་དཀའ་ངལ་འཕྲད་ཚེ་དབྱིན་ཇིའི་སྐད་ཡིག་ནང་བྱས་པ་དང་ལྷན་དུ་བོད་ཡིག་སློབ་སྦྱོང་བྱེད་དགོས་ཞེས་བཀའ་ཕེབས་པ་དང་སྦྲགས། བོད་ཕྲུག་ན་གཞོན་ཚོས་བོད་ཡིག་སྦྱོང་རྒྱུར་འབད་བརྩོན་བྱེད་བཞིན་པ་དེར་བསྔགས་བརྗོད་ཀྱང་མཛད་ཡོད། ཡང་༸གོང་ས་མཆོག་གིས་མུ་མཐུད་བཀའ་སློབ་སྩལ་དོན། གལ་ཏེ་རང་དབང་ལུང་པའི་ནང་དུ་ཡོད་པའི་བོད་རིགས་ན་གཞོན་ཚོས་རང་གི་ཆོས་དང་སྐད་ཡིག་ལ་དོ་སྣང་མ་སྤྲད་ཚེ་དཀའ་ངལ་གྱི་གནས་སྟངས་འོག་རང་གི་རིག་གཞུང་དང་སྐད་ཡིག་ལ་སློབ་གཉེར་བྱ་རྒྱུར་འབད་བརྩོན་བྱེད་བཞིན་པའི་བོད་རྒྱ་ཆེའི་མི་མང་རྣམས་སེམས་ཤུགས་ཆག་རྒྱུའི་ཉེན་ཁ་ཡོད་ཅེས་བཀའ་སྩལ། ཕྱོགས་མཚུངས་༸གོང་ས་མཆོག་གིས་སྔ་མོ་སོག་པོའི་མཁས་དབང་དེ་འདྲ་འགའ་ཤས་བྱུང་ཡོད།
དེང་སང་རྒྱ་གར་ནང་བོད་པའི་དགོན་པ་གྲྭ་ཚང་ཁག་གཅིག་གི་ནང་དུ་ནང་ཆོས་ལ་སློབ་གཉེར་བྱེད་བཞིན་པའི་སོག་རིགས་དེ་འདྲ་ཡོད་པ་བཞིན་སོག་པོ་ཚོས་ཀྱང་མུ་མཐུད་ནང་ཆོས་ལ་དོ་སྣང་བྱེད་དགོས་པ་དང་། བོད་རིགས་ཚོས་ཀྱང་རང་གི་ངོ་བོ་མ་བརྗེད་པའི་ཐོག་བོད་རྒྱ་ཆེའི་མི་མང་གི་ཚབ་བྱས་ནས་འགན་འཁྱེར་དགོས། གལ་ཏེ་རང་གི་ཆོས་དང་རིག་གཞུང་སྐད་ཡིག་བཅས་ཀྱི་གནད་དོན་ཡག་པོ་ཞིག་ཤེས་ན་བོད་མི་ཆ་ཚང་བ་ཞིག་ཆགས་ཐུབ། བོད་མིའི་ཐུན་མིན་ངོ་བོ་མཚོན་པའི་གཞི་རྟེན་ནིི་ཆོས་དང་། རིག་གཞུང་། སྐད་ཡིག་གཅིག་མཚུངས་ཡོད་པ་དེ་ཆགས་ཡོད་ཅེས་བཀའ་སློབ་སྩལ་ཡོད། ཕྱི་ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་ཨིན་ཌི་ཡཱ་ན་པོ་ལི་སིར་མང་ཚོགས་ལ་བཀའ་སློབ་སྩལ་ཆེད་ཆིབས་སྒྱུར་བསྐྱངས་ཡོད་པ་བཅས།།
