༢༠༡༠ ཟླ་ ༤ ཚེས་ ༢༩ རེས་གཟའ་ཕུར་བུ།
༄༅། །༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་གསང་བ་གསུམ་ལ་ཚུལ་བསྟན་བགེགས་བར་གྱི་ཆ་ཕྲ་མོ་ཙམ་ཡང་མི་བཞེས་པར་སྐུ་ཁམས་རྡོ་རྗེའི་ངོ་བོར་བརྟན་ཅིང་། ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་འགྲུབ་ཡོང་ཆེད་ཕྱི་ལོ་ ༢༠༡༠ ཟླ་ ༤ ཚེས་ ༢༧ ཉིན་བོད་གཞིས་བྱེས་གཉིས་སུ་གནས་པའི་ཇོ་ནང་ཆོས་རྒྱུད་འཛིན་པ་རྣམས་དང་། རྡ་སའི་ས་གནས་འཐུས་ཚོགས། ས་གནས་འགོ་འཛིན། རང་བདེན་ཚོགས་ཆུང་དང་ཁྱབ་ཁོངས་སེར་སྐྱ་མི་མང་བཅས་ནས་གོ་སྒྲིག་ཐོག་མགོན་པོ་གང་ཉིད་མཆོག་ལ་རྗེ་བཙུན་ཏཱ་ར་ནཱ་ཐའི་གསུང་བླ་མ་མཆོད་པའི་ཆོ་ག་དགེ་ལེགས་རབ་རྒྱས་ཀྱི་སྒོ་ནས་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་བརྒྱ་ཚར་དང་ཚོགས་མཆོད་འབུལ་བཤམས་ཐོག་བརྟན་བཞུགས་བསྟར་འབུལ་ཞུས་ཡོད།
དེ་ཡང་ཚེས་ ༢༧ ཉིན་གྱི་སྔ་དྲོ་ཆུ་ཚོད་ ༥ ཐོག་ཇོ་ནང་གི་མཁན་པོ་དབུ་བཞུགས་ཐོག་མཁན་བླ་སྤྲུལ་སུམ་ཅུ་ལྷག་གིས་བླ་མཆོད་སྒྲུབ་ཆོག་དང་འབྲེལ་བའི་ཚེ་སྒྲུབ་གནང་བ་དང་། དེ་རྗེས་ཆུ་ཚོད་ ༨།༠༠ ཙམ་ལ་༸གོང་ས་མཆོག་བཞུགས་སྒར་ཕོ་བྲང་ནས་ཇོ་ནང་མཁན་རིན་པོ་ཆེའི་དབུས་རྡ་སའི་ས་གནས་འཐུས་ཚོགས་དང་། ས་གནས་འགོ་འཛིན། རང་བདེན་ཚོགས་ཆུང་གི་ཚོགས་གཙོ་བཅས་ཀྱིས་སྤོས་སྣེས་སྔོན་བསུས་ཏེ་སྐུ་བཅར་རྣམ་གྲྭའི་དགེ་འདུན་པས་སེར་སྦྲེངས་དང་དུང་རྒྱ། ཕྱོགས་མཚུངས་བོད་གཞུང་ཟློས་གར་གྱིས་ཕེབས་བརྡའི་རོལ་ཆ་གཏོང་བཞིན་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་དབུ་བཞུགས་རྡོ་རྗེ་སློབ་དཔོན་ཇོ་ནང་མཁན་པོས་མཇལ་དར་རྐྱང་འབུལ་དང་སྦྲགས་འདུས་ཚོགས་ནས་ཞལ་འདོན་དབུ་བསྐུལ་གྱིས་ཆོས་སྤྱོད་རིམ་པ་རྣམས་གསུང་མུར་གསོལ་ཇ་དང་འབྲས་སིལ་འདེགས་འབུལ་ཞུས། བླ་མཆོད་དབུ་ནས་མཐར་ཆགས་སུ་གསུང་རྗེས་གསོལ་འདེབས་མཎྜལ་སྐབས་དབུ་བཞུགས་མཆོག་ནས་མཎྜལ་ཚོམ་བུ་འབུལ་བཞེས་སྐབས་ཇོ་ནང་ཆོས་དཔོན་དང་། ས་གནས་འགོ་འཛིན་རྣམ་གཉིས་ནས་རམ་འདེགས་ཀྱི་ཞུ་མུར་རིམ་བཞིན་ཞལ་འདོན་ཚིག་བསྟུན་གྱིས་སྐུ་རྟེན་དང་གསུང་རྟེན། ཐུགས་རྟེན། ན་བཟའ། རྣམ་སྦྱར། བླ་གོས། མཐང་གོས། དབུ་ཞྭ། གདིང་བ། ལྷུང་བཟེད། མཁར་སིལ། རྒྱལ་སྲིད་སྣ་བདུན། བཀྲ་ཤི་རྟགས་བརྒྱད། བཀྲ་ཤིས་རྗས་བརྒྱད་རྣམས་ལྗགས་བཤད་དང་བཅས་ཏེ་ཕུལ་མཐར་མཁན་རིན་པོ་ཆེས་མཇལ་ཞུ་དང་། ཚོགས་རོལ་གནང་། ས་གནས་འགོ་འཛིན་ནས་མཎྜལ་རྟེན་གསུམ་འདེགས་འབུལ་དང་། ཇོ་ནང་གནད་ཡོད་མི་འགར་མཇལ་ཁ་སྩལ་རྗེས་རྒྱལ་བའི་ཞབས་བརྟན་གསུང་མུར། འབུལ་དངོས་རྣམས་བསྟར་འབུལ་ཞུས། ཡོན་སྦྱོར་ཚོགས་འགྲེམས་དང་།
དེ་ནས་གཏང་རག་མཎྜལ་སྐབས་ས་གནས་འཐུས་ཚོགས་ཀྱི་ཚོགས་གཙོ་དང་ཇོ་ནང་བརྟན་བཞུགས་ཚོགས་ཆུང་གི་འཐུས་མི་གཉིས་ནས་མཎྜལ་རྟེན་གསུམ་འདེགས་འབུལ་དང་། དེ་རྗེས་སྡེ་ཚན་ཁག་གི་འཐུས་མི་གྲངས་བརྒྱ་སྐོར་ལ་མཇལ་ཁ་སྩལ། དེ་ནས་གསོལ་ཇ་གཉིས་པ་ཕེབས་རྗེས་ཇོ་ནང་བསྟན་རྒྱས་སྨོན་ལམ་དང་། རིས་མེད་བསྟན་རྒྱས་སྨོན་ལམ། དུས་འཁོར་སྨོན་ལམ། བདེན་ཚིག་སྨོན་ལམ་བཅས་གསུངས། མཇུག་ཏུ་བླ་མཆོད་ཀྱི་མཇུག་ཆོག་དང་བཀྲ་ཤིས་གསུང་སྐབས་ཀ་ཁྲི་སྒྲོག་སྟེ་བརྟན་བཞུགས་མཛད་སྒོ་དངོས་གཞི་ལེགས་པར་གྲུབ་རྗེས་༸གོང་ས་མཆོག་གིས་བཀའ་སློབ་སྩལ་དོན། དེ་རིང་བོད་གཞིས་བྱེས་ཇོ་ནང་གི་བསྟན་རྒྱུད་འཛིན་མཁན་ཐུན་མོང་ཐོག་ནས་བརྟན་བཞུགས་གནང་རྒྱུ་གཅིག་དང་རྡ་སའི་བཙན་བྱོལ་གྱི་སྒྲིག་འཛུགས་ཁག་གི་མི་སྣ་ཚོ་བཅས་ཁྱེད་རང་ཚོ་ཐུུན་མོང་ནས་བརྟན་བཞུགས་གནང་བར་ཐུགས་རྗེ་ཆེ་ཞུ་རྒྱུ་ཡིན།
སངས་རྒྱས་ཀྱི་བསྟན་པ་ངོས་ཀྱིས་ནམ་རྒྱུན་ཤོད་བཞིན་པ་ལྟར་དཔལ་ན་ལེཎྡྲའི་ཆོས་བརྒྱུད་སྡེ་སྣོད་གསུམ་དང་རྒྱུད་སྡེ་བཞི། མདོར་ན། ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་ཡོད་པ། དེ་ཡང་རིག་པའི་ལམ་ནས་གཏན་ལ་ཕབ་པ། དེ་འདྲ་ཡོངས་སུ་རྫོགས་པའི་སངས་རྒྱས་ཀྱི་བསྟན་པ་དེ་བོད་ཡུལ་གངས་ཅན་གྱི་ལྗོངས་སུ་དར་བའི་རྗེས་ལ་བོད་རང་ཉིད་ཀྱི་མཁས་སྒྲུབ་ཀྱི་སྐྱེས་བུ་མང་པོ་ཞིག་གིས་བསྟན་པ་ལ་བྱ་བ་རླབས་པོ་ཆེ་མཛད་ཡོད། དེ་བཞིན་བསྟན་པ་འཛིན་པའི་སྨོན་ལམ་གྱི་མཐུ་གྲུབ་མཁན་གྱི་སྐྱེས་བུ་དམ་པ་མང་པོ་ཞིག་གིས་དུས་ནས་དུས་སུ་བསྟན་པ་དང་འགྲོ་བའི་གཞན་དོན་རྒྱ་ཆེར་སྤེལ་ནས། དེ་འདྲའི་ཐོག་ནས་ས་དགེ་བཀའ་རྙིང་ཇོ་ནང་ལ་སོགས་སྒྲུབ་རྒྱུད་ཤིང་རྟ་བརྒྱད་ལ་སོགས་པ་དེ་ཚོའི་གྲས་དེ་བྱུང་ཡོད། དེའི་ནང་ནས་ཀུན་མཁྱེན་ཇོ་ནང་གི་བསྟན་རྒྱུད་འཛིན་མཁན་ཁྱེད་རང་ཚོ་འདི་དག་གིས་དེ་རིང་བརྟན་བཞུགས་གནང་བར་ཧ་ཅང་དགའ་པོ་བྱུང་། བོད་གངས་ཅན་ལྗོངས་ཀྱི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཚོས་རང་རང་གི་ཉམས་མྱོང་དང་དེ་བཞིན་རྣམ་དཔྱོད་ཀྱི་རྩལ་ལས་ཕྲན་བུ་ཕྲན་བུ་གསུང་སྟངས་འདྲ་མི་འདྲ་དང་གཞུང་གི་གོ་བ་ལེན་སྟངས་འདྲ་མི་འདྲ་ཡོང་གི་ཡོད། རྒྱ་གར་མཁས་པའི་གཞུང་ནང་ལའང་ཡོང་གི་ཡོད། མདོར་དོན་སྙིང་པོ་བོད་གངས་ཅན་ལྗོངས་སུ་ཡོད་པའི་སངས་རྒྱས་ཀྱི་བསྟན་པ་གོང་དུ་ཞུས་པ་ལྟར་ས་དགེ་བཀའ་རྙིང་ཇོ་ནང་དང་བཅས་པ་ཚང་མ་དཔལ་ན་ལེཎྡྲ་ཆོས་བརྒྱུད་འཛིན་མཁན་གཅིག་གྱུར་ཡིན་པ་ཧ་ཅང་གསལ་པོ་རེད། ཉམས་ལེན་སྙིང་པོ་སྒྲིལ་ན། ཚོགས་མགོའི་ནང་གི་ཚིག་འདི། སྔོན་མ་འདིར་བརྟན་བཞུགས་ཤིག་གནང་བ་རེད། དེ་དུས་ཚིག་འདི་ངོས་ཀྱི་བློར་ཧ་ཅང་ཟུག་པོ་བྱུང་། ངོས་ཀྱིས་ཚིག་འདི་བཤུས་ཏེ་མཚམས་མཚམས་ལ་ཀློག་གི་ཡོད། སྒྱུ་མའི་རང་སྣང་རྗེན་ནེ་ནེ། །གཏད་མེད་རིག་པ་གསལ་ལ་ལ། །བརྗོད་མེད་དབྱིངས་སུ་ཐལ་ལ་ལ། བདེ་བ་ཆེན་པོ་ཁྲིལ་ལི་ལི།། ཞེས་གསུངས་ཡོད་པ་འདིས་མདོར་ན་ས་དགེ་དཀའ་རྙིང་ཡོངས་སུ་རྫོགས་པའི་ཉམས་ལེན་གྱི་མཐིལ་ལྟ་བུ་དེ་འདིའི་སྒང་ལ་བབ་ཀྱི་ཡོད། ཚང་མ་གཅིག་པ་རེད། ཚིག་གི་བདར་ཤ་གཅོད་སྐབས་རང་སྟོང་དང་གཞན་སྟོང་ཞེས་འདྲ་མི་འདྲ་ཡོད། ཀུན་རྫོབ་རང་སྟོང་། དོན་དམ་གཞན་སྟོང་། གཞན་དབང་ཀུན་བཏགས་ཀྱིས་སྟོང་པའི་ཡོངས་གྲུབ་བདེན་གྲུབ་ཟེར་བ་སོགས་མང་པོ་ཡོད་པ་རེད། སྙིང་པོ་དེ་སེམས་འདུལ་ཐབས་ལ་གཅིག་གྱུར་འགྲོ་དགོས་རྒྱུ་ཞིག་དང་། ལྟ་བ་དེ་དག་སྒོམ་པའི་འབྲས་བུར་ཕྱིའི་སྣོད་ཀྱི་བཀོད་པ་འདི་ཐམས་ཅད་སྒྱུ་མའི་རང་སྣང་རྗེན་ནེ་ནེ་ཞེས་བདེན་སྟོང་སྒྱུ་མ་ལྟ་བུ་ཞིག་མཐོང་རྒྱུ་ཞིག ཡུལ་ཅན་ཤེས་པའི་ངོས་ནས་བཤད་ཀྱང་། གཏད་མེད་རིག་པ་གསལ་ལ་ལ། ཞེས་པ་ཞིག གསལ་རིག་གི་རང་བཞིན་དེ་འགག་ཏུ་ཡོད་པ་མ་རེད། འོན་ཀྱང་གཏད་པ་མེད་པ་ཞིག་ཆགས་ཀྱི་ཡོད།གཏད་མེད་རིག་པ་གསལ་ལ་ལ། །བརྗོད་མེད་དབྱིངས་སུ་ཐལ་ལ་ལ། ཞེས་བརྗོད་སྐབས་ཕྱི་བཟུང་བ་ཡིནའང་རེད། ནང་འཛིན་པ་ཡིན་ཡང་རུང་གང་ལ་ཡིན་ཡང་དམིགས་གཏད་བཤིག་སྟེ་གཏད་བཟོ་མི་བདེ་བ་རེད།།
བརྗོད་མེད་དབྱིངས་སུ་ཐལ་ལ་ལ། ཞེས་དེ་འདྲའི་བསམ་བློ་འཁོར་བ་ཡིན་ན། དུས་ད་ལྟ་བར་དུ་ཉོན་མོངས་དུག་གསུམ་ཚུལ་མིན་ཡིད་བྱེད་ཀྱི་རྣམ་རྟོག་གི་རྐྱེན་པས་སེམས་ཉིད་དུབ་བསྡད་ཡོད་པ་དེ་ཞི་ཞིང་དེ་ལས་བྲལ་བ་ཞིག་ཡོང་གི་རེད། སྤྲོལ་པ་མཐའ་དག་ཉེ་བར་ཞི་བ་ཞིག་བྱུང་བ་ཡིན་ན། བདེ་བ་ཆེན་པོ་ཁྲིལ་ལི་ལི་ཞེས་གསུངས་པ་འདི་རེད་འདུག དེར་བརྟེན་ཤོ་ལོ་ཀ་གཅིག་པུ་འདིར་ཡང་ཡང་བསམ་བློ་བཏང་བ་ཡིན་ན། དཔལ་ནཱ་ལེཎྡྲའི་ཆོས་བརྒྱུད་ཀྱི་དངོས་གནས་ཤེས་པ་འདུལ་ཞེས་རང་སེམས་འདུལ་རྒྱུའི་ཐབས་ཤེས་ཤིག་ཡིན། རང་སེམས་འདུལ་རྒྱུ་ཟེར་བ་དེར་སྨོན་ལམ་བརྒྱབ་ནས་རང་སེམས་འདུལ་བ་ཤོག་ཅེས་བརྗོད་ནས་ཡོང་གི་མེད། ཆོས་རབ་ཏུ་འབྱེད་པའི་རྣམ་དཔྱོད་ཀྱི་རྩལ་ལས་སེམས་མ་འདུལ་བ་བྱེད་མཁན་གྱི་བློ་དེ་དག་རྫུན་ཕུག་རྟོལ་ཏེ་དེ་འདྲ་ཞིག་གི་འོག་ནས་གནས་ལུགས་རྗེན་པ་དེ་མཐོང་བའི་ཐོག་ནས་དེའི་ཉམས་མྱོང་མངོན་དུ་གྱུར་བ་ཡིན་ན་སྤྲོལ་པ་མཐའ་དག་ཉེར་བར་ཞི་བའི་ཉེར་ཞིའི་དབྱིངས་ཞེས་པ་ཐོབ་རྒྱུ་ཞིག་ཡོད། དེར་བརྟེན་དེ་རིང་འདིར་ཀུན་མཁྱེན་ཇོ་ནང་གི་ཆོས་རྒྱུད་འཛིན་མཁན་ཁྱེད་རང་ཚོས་བརྟན་བཞུགས་གནང་བར་ཐུགས་རྗེ་ཆེ་ཞུ་གི་ཡིན། དེ་ནས་ལྟ་བའི་ཆ་ནས་ཇོ་ནང་གི་ལྟ་བ་ཞེས་བོད་ཀྱི་སྔོན་གྱི་མཁས་པ་མང་པོ་ཞིག་གིས་སྐབས་རེ་དགག་གཞག་རིམ་པ་མང་པོ་གནང་ཡོད་པ་རེད། དུས་ཕྱིས་ཀྱི་མཁན་པོ་གཞན་དགའ་ཆ་བཞག་ནའང་དེར་དགག་གཞག་གནང་བཞིན་ཡོད། འདིར་ཆོ་གའི་ནང་ཡོད་པ་བཞིན་རེད། ཡུ་མོ་མི་བསྐྱོད་རྡོ་རྗེ་ནས་བཟུང་དེ་ནས་མར་ཀུན་མཁྱེན་དོལ་བུ་བ་ཡབ་སྲས་དེ་དག་གིས་དུས་ཀྱི་འཁོར་ལོའི་སྦྱོར་དྲུག་གི་ཉམས་བཞེས་དེ་གཙོ་བོ་གནང་བཞིན་ཡོད། དུས་ཀྱི་འཁོར་ལོའི་སྦྱོར་དྲུག་གི་སྐོར་ལ་ཆ་བཞག་ན་ས་དགེ་བཀའ་རྙིང་ཚང་མས་དུས་ཀྱི་འཁོར་ལོར་བསྔགས་བརྗོད་ཆེན་པོ་གནང་གི་ཡོད་པ་རེད། ཡིན་ནའང་དུས་ཀྱི་འཁོར་ལོའི་སྦྱོར་དྲུག་གི་ཉམས་ལེན་རྐང་འདོན་བྱས་ནས་རྩལ་འདོན་བྱེད་མཁན་དེ་ཇོ་ནང་རེད་འདུག དགེ་ལུགས་ན་ཆ་བཞག་ན་དུས་ཀྱི་འཁོར་ལོ་གལ་ཆེན་པོ་རྩི་བཞིན་ཡོད་པ་རེད་དེ་གསང་བདེ་འཇིགས་གསུམ་གཙོ་བོ་རེད།
བཀའ་བརྒྱུད་པས་དུས་ཀྱི་འཁོར་ལོ་གལ་ཆེན་པོ་རྩི་བཞིན་ཡོད། ཡིན་ཡང་གཙོ་བོ་བདེ་མཆོག་ཕག་མོ་དེ་ཚོ་གཙོ་བོ་ཆགས་ཀྱི་ཡོད། ས་སྐྱ་པར་ཆ་བཞག་ན་དུས་ཀྱི་འཁོར་ལོ་གལ་ཆེན་པོ་རྩི་བཞིན་ཡོད། ཡིན་ནའང་ཀྱེ་རྡོར་གཙོ་བོ་རེད། སྔ་འགྱུར་རྙིང་མར་ཆ་བཞག་ན་དུས་ཀྱི་འཁོར་ལོ་གལ་ཆེན་པོ་རྩི་བཞིན་ཡོད། ཡིན་ཡང་དུས་ཀྱི་འཁོར་ལོའི་སྟོང་གཟུགས་ཀྱི་སྣང་བ་དེ་དང་ཐོད་བརྒལ་གྱི་སྣང་བ་དེ་ཚོའི་གྲས་དེ་ཞིབ་ཚགས་པོའི་ཐོག་ནས་བསམ་བློ་བཏང་བ་ཡིན་ན་མི་འདྲ་བའི་ཁྱད་པར་སྐབས་རེ་ཡོད་པ་དང་། སྤྱི་ཡོངས་ཀྱི་ཆ་ནས་འདྲ་པོ་ཡོད་པ་ཞིག་རེད་འདུག གང་ལྟར་སྔ་འགྱུར་གྱི་ཐོག་ནས་ཆ་བཞག་ནའང་དུས་ཀྱི་འཁོར་ལོ་གལ་ཆེན་པོ་རྩི་བཞིན་ཡོད། ཕལ་ཆེར་ཀུན་མཁྱེན་འཇིགས་མེད་གླིང་པས་ཡོན་ཏན་མཛོད་ཀྱི་རང་འགྲེལ་ནང་ས་ལམ་གྱི་རྟོགས་པ་འགྲོ་སྟངས་འདི་དག་དུས་ཀྱི་འཁོར་ལོའི་རྩ་འདབས་སོ་སོ་ནས་བྱང་སེམས་དཀར་དམར་བསྡུས་ནས་རྩ་འགོ་རེ་རེའི་སྟེང་མི་འགྱུར་བའི་བདེ་བ་སྐྱེས་ཡོང་དུས་ས་ལམ་འགྲོ་རྒྱུ་ཞིག་གསུང་གི་འདུག ཀུན་མཁྱེན་འཇིགས་མེད་གླིང་པར་ཆ་བཞག་ནའང་གལ་ཆེན་པོ་རྩི་བཞིན་ཡོད། འོན་ཀྱང་རང་ལུགས་རང་གི་གཙོ་བོ་དེ་མ་ཧཱ་ཨ་ནུ་ཨ་ཏི་ཞེས་མ་ཧཱ་ཡོ་གའི་ནང་ནས་སྒྲུབ་པ་བཀའ་བརྒྱད་ཀྱི་གཙོས་དེ་དག་གཙོ་བོ་གནང་བཞིན་ཡོད། དེ་འདྲ་ཡིན་དུས་སྒོས་སུ་དཔལ་དུས་ཀྱི་འཁོར་ལོའི་ཆོས་འཁོར་དེའི་ནང་ནས་སྦྱོར་དྲུག་གི་ཉམས་ལེན་བདག་པོ་རྒྱག་མཁན་དེ་ཇོ་ནང་པ་རེད་འདུག དེ་འདྲ་ཡིན་དུས་སྔོན་མ་ཇོ་ནང་གི་མཁན་པོ་ཀུན་དགའ་ཤེས་རབ་རྡ་སར་ཕེབས་སྐབས་ཕན་བདེ་ལེགས་བཤད་གླིང་ལ་དུས་འཁོར་གྱི་ཆོ་ག་ཧ་ལས་པའི་ཡག་པོ་ཡོད། གཙོ་བོ་བུ་ལུགས་གཞི་བཞག་རེད། དེའི་སྟེང་སྦྱོར་དྲུག་གི་འཁྲིད་དེ་དག་བྱུང་ན་ཡག་པོ་འདུག་བསམས་ཏེ་ཇོ་ནང་མཁན་པོ་ཀུན་དགའ་ཤེས་རབ་འདིར་ཕེབས་སྐབས་གྲྭ་ཚང་ནས་སྦྱོར་དྲུག་གི་འཁྲིད་ཞུས་ཡོད། ད་ལྟ་སིམ་ལར་ཇོ་ནང་གི་གདན་ས་ཆུང་ཆུང་ཞིག་ཡོད་པ་དེའི་ནང་དུས་འཁོར་སྦྱོར་དྲུག་གི་ལག་ལེན་བྱེད་བཞིན་ཡོད།
དེ་དག་གི་མཐུན་རྐྱེན་འདི་ནས་ངོས་ཀྱིས་ཕྲན་བུ་འབུལ་བཞིན་ཡོད། གང་ལྟར་དུས་ཀྱི་འཁོར་ལོའི་སྦྱོར་དྲུག་ཉམས་ལེན་བྱ་རྒྱུའི་བསྟན་པ་རྐང་ཟིན་མཁན་དེ་ཀུན་མཁྱེན་ཇོ་ནང་གི་ཆོས་རྒྱུན་འཛིན་མཁན་ཚོ་ཆགས་འདུག དེ་འདྲ་ཡིན་དུས་ཁྱེད་རང་ཚོས་ད་ལྟ་བར་དུ་ཧུར་ཐག་བྱས་པ་རེད། ད་དུང་ཡིནའང་ཧུར་ཐག་བྱེད་རོགས་ཞེས་ཞུ་གི་ཡིན། དེ་གཅིག་ཡིན། དེ་ནས་གཞན་སྟོང་གཅིག་པུར་ཨུ་ཚུགས་བརྒྱབ་ནས་མ་བསྡད་པར་རང་སྟོང་གི་གོ་བ་དེ་ཡང་གང་འདྲ་ཞིག་འདུག་ལྟ་དགོས་རེད། རྗེ་རིན་པོ་ཆེས་ལེགས་བཤད་སྙིང་པོའི་ནང་སྐབས་རེ་གཞན་སྟོང་ལ་དགག་པ་ཏོག་ཙམ་ཏོག་ཙམ་འདུག དེ་ཆགས་སྡང་གི་དགག་པར་རྩི་རྒྱུ་མེད། རྗེ་རིན་པོ་ཆེས་གོལ་ས་ཡོང་རྒྱུའི་ཉེན་ཁ་དེ་དག་ཡར་སེལ་གནང་གི་ཡོད། དཔེར་ན། ཟླ་བ་གྲགས་པའི་སློབ་དཔོན་ལེགས་ལྡན་འབྱེད་ཀྱི་རྩ་བ་ཤེས་རབ་ཀྱི་འགྲེལ་པ་ཤེས་རབ་སྒྲོན་མེའི་ནང་གསུངས་ཡོད་པའི་རིགས་འགའ་ཤས་ཕྲན་བུ་མ་བདེ་བ་ཡོད་པ་དེ་ཚོ་དོགས་པ་ཡར་བསླངས་ཏེ་ཐག་བཅད་ཀྱི་འདུག དེ་བཞིན་བྱས་ཏེ་ན་ནིང་ངོས་ཡ་གིར་སླེབས་སྐབས་ཁྱེད་རང་ཚོས་རྟགས་གསལ་གཏོང་དུས་སྐད་ཆ་བྱུང་། དེར་བརྟེན་རྗེ་རིན་པོ་ཆེའི་ལེགས་བཤད་སྙིང་པོ་དེ་ཁྱེད་རང་ཚོས་ལྟ་དགོས་པ་ཞིག་རེད་འདུག ཕྱོགས་ཚང་མའི་གནས་ཚུལ་མཐོང་བར་བྱས། ཀུན་རྫོབ་རང་སྟོང་དང་དོན་དམ་གཞན་སྟོང་ཞེས་གསུངས་ཡོད་པའི་དགོངས་པ་དེ་གང་འདྲ་བཞེས་ཀྱི་འདུག དེ་གཙོ་བོ་སྦྱོར་དྲུག་དང་འདྲེས་ཡོང་གི་ཡོད། གསང་སྔགས་བླ་མེད་དང་འདྲེས་ཡོང་གི་ཡོད། དེ་འདྲ་ཡིན་དུས་རྗེ་རིན་པོ་ཆེའི་གསང་བ་འདུས་པའི་རིམ་ལྔའི་ནང་ལ་གཉུག་མ་ལྷན་གཅིག་སྐྱེས་པའི་འོད་གསལ་གྱི་རྣམ་གཞག་གསུངས་ཡོད་པ་དེ་དང་འདྲེས་ནས། གཉུག་པའི་འོད་གསལ་གློར་བུར་བའི་ཆོས་ཀྱི་སྟོང་པའི་སྒང་ལ་བསམ་བློ་གཏང་བ་ཡིན་ན། གཞན་སྟོང་ལ་གོ་བ་བསླེབ་ཀྱི་ཡོད། བྱས་ཙང་གསང་བ་འདུས་པའི་ཆོས་སྐད་ནང་ལ་ཆ་བཞག་པ་ཡིནའང་། གཞན་སྟོང་གི་གོ་བའི་སྟེང་ནས་སྟོང་པ་དང་པོ་སྟོང་པ་གཉིས་པ་སྟོང་པ་གསུམ་པ་བྱས་ཏེ་སྟོང་པ་བཞིའི་རྣམ་གཞག་གསུངས་ཡོད་པ་དེ་དག་གོ་བ་གཞན་སྟོང་སྒང་ལ་བསླེབས་ཀྱི་འདུག སྔོན་གྱི་བླ་མ་ཚོས་ཐ་སྙད་གསུངས་སྟངས་དེ་དགོངས་པ་གང་འདྲ་ཞིག་ལ་བཞེས་འདུག དེ་གཉིས་གཅིག་བསྡུར་ན་གང་འདྲ་ཞིག་གི་སྒང་ལ་སླེབས་ཀྱི་འདུག བསམ་བློ་གཏོང་རྒྱུ་གལ་ཆེན་པོ་རེད་འདུག ཤེས་སོང་ངམ་། སོ་སོའི་དཔེ་ཆ་གཅིག་པུ་བལྟས་ནས་བསྡད། དཔེ་ཆ་གཞན་དག་མ་མཐོང་ན། ང་ཚོ་བོད་པའི་དཔེ་ལ། གཡག་ཞར་བའི་རྩ་བཟས་ཞེས་བརྗོད་ཀྱི་ཡོད། དེ་འདྲ་ཆགས་རྒྱུའི་ཉེན་ཁ་ཡོད། དཔེ་ཆ་ཚང་མ་མཐོང་ཐུབ་ན། དེ་གནད་འགག་དེ་འདྲ་ཞིག་འདུག བསམ་པ་ཞིག་ཀུན་ལ་དད་པ་དང་གུས་པ་སྐྱེ་རྒྱུ་ཞིག་ཡོང་གི་རེད། དེ་གནད་འགག་ཆེན་པོ་རེད། དེ་དག་ངོས་ནས་ཞོར་ལ་ཞུས་པ་ཡིན། འདི་ག་རྡ་རམ་ས་ལའི་མི་མང་སྤྱིར་ཆ་བཞག་ན་ལོ་འདི་དག་གི་རིང་ལ་ང་ཚོ་བཞུགས་སྒར་གྱི་མི་སྣ་ཆགས་ཏེ་བསྡད་ཡོད། ཁྱེད་རང་ཚོ་འདི་དག་དངོས་གནས་བོད་སྤྱིའི་དོན་ལ་སེམས་ཁུར་བྱེད་རྒྱུ་རེད། དེ་བཞིན་ང་ཚོ་ཚང་མས་དད་དམ་གཡོ་བ་མེད་པ་དེ་འདྲ་ཡིན། དེ་རིང་བརྟན་བཞུགས་གནང་བར་ཐུགས་རྗེ་ཆེ་ཟེར་རྒྱུ་ཡིན། གཞན་དམིགས་བསལ་གང་ཡང་ཞུ་རྒྱུ་མི་འདུག ཅེས་བཀའ་སློབ་སྩལ་ཡོད།
