༢༠༡༠ ཕྱི་ཟླ་ ༤ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༢ ཉིན་ལྡི་ལི་བོད་གཞུང་སྐུ་ཚབ་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་ལགས་ཀྱིས་ཉི་ཧོང་ནང་སློབ་ཕྲུག་དང་མང་ཚོགས་ལ་ཡོ་ཐོ་སུ་ཡའི་མི་མང་ཚོགས་ཁང་ནང་བོད་དོན་དང་འབྲེལ་བའི་གནས་ཚུལ་དྲིལ་བསྒྲགས་རྒྱ་ཆེ་གནང་ཡོད། སྐབས་དེར་བོད་ཀྱི་རྒྱལ་རབས་ལོ་རྒྱུས་་བ་ཉི་ཧོང་གི་ཝ་སེ་ཌ་མཐོ་སློབ་ (Waseda University) ཀྱི་གཙུག་ལག་སློབ་དཔོན་ལྕམ་སྐུ་ཨི་ཤི་ཧཱ་མ་ (Ishihama) ལགས་ཀྱིས་ཚོགས་འདུར་ཕེབས་པའི་མི་གྲངས་བརྒྱ་སྐོར་ཙམ་ཞིག་འདུ་འཛོམས་བྱུང་བ་རྣམས་ལ་བོད་ཀྱི་རྒྱལ་རབས་ཐོག་ཉི་ཧོང་གི་ཤེས་ཡོན་མི་སྣ་ཚོའི་གཟིགས་ཕྱོགས་གང་འདྲ་ཡིན་མིན་གསལ་བཤད་གནང་དོན། དེ་སྔ་བོད་དེ་རང་བཙན་གཙང་མའི་རྒྱལ་ཁབ་གཅིག་རེད། མན་ཇུ་དང་། རྒྱ་ནག སོག་པོའི་རྒྱལ་པོ་སོགས་ལ་བོད་ཀྱི་ནང་ཆོས་ཀྱི་ཤུགས་རྐྱེན་ཐེབས་ཡོད་ཅེས་གསུངས། དེ་བཞིན་ལྕམ་སྐུ་ཨི་ཤི་ཧཱ་མས་དུས་རབས་ ༡༧ ནང་ཡེ་ཤུའི་འགྲུལ་བཞུད་པ་ཞིག་གིས་བོད་ནང་སྐོར་བསྐྱོད་དུ་སོང་ནས་བྲིས་པའི་ལོ་རྒྱུས་ཀྱི་ཐོ་གཞུང་ནང་གསལ་ཡོད་པ་ཞིག་ངོ་སྤྲོད་གནང་དོན། ༸གོང་ས་ཏཱ་ལའི་བླ་མ་མཆོག་ལ་བོད་ཙམ་མ་ཟད། བོད་ཀྱི་ཁྱིམ་མཚེས་རྒྱལ་ཁབ་སོག་ཡུལ་དང་རྒྱ་ནག བལ་ཡུལ་བཅས་ནས་ཀྱང་གུས་བཀུར་ཆེན་པོ་ཞུ་བཞིན་ཡོད་ཅེས་གསུངས་པ་དང་འབྲེལ་ཁོ་མོས་བློ་འགྱོད་ཆེན་པོའི་ཐོག་བོད་ལ་ད་ལྟ་དཀའ་ངལ་འདི་འདྲ་ཞིག་འཕྲད་བཞིན་པ་ནི་འཛམ་གླིང་ཕྱི་ལ་འབྲེལ་བ་བྱེད་མ་ཐུབ་པའི་སྐྱོན་ཆ་ཡིན་སྐོར་བརྗོད་ཡོད། དེ་བཞིན་བཀའ་བློན་བསྟན་པ་ཚེ་རིང་མཆོག་གིས་བོད་ནང་ཡར་རྒྱས་གཏོང་རྒྱུར་བོད་མི་ཚོས་དགག་བྱ་གང་ཡང་བྱེད་ཀྱི་མེད་རུང་། ཡར་རྒྱས་དེས་ས་གནས་བོད་མི་ཚོར་ཕན་པ་ཞིག་དང་བོད་མི་ཚོའི་རིག་གཞུང་ལ་ཐོར་ཞིག་མ་སོང་བ་ཞིག་དགོས་སྐོར་གསུངས་ཡོད། དེ་བཞིན་བཀའ་བློན་མཆོག་གིས་ད་ལྟའི་ཆར་བོད་ནང་གི་གནས་སྟངས་ཛ་དྲག་པོ་ཡོད་སྐོར་འགྲེལ་བརྗོད་གནང་དོན། བོད་མི་ཚོ་རང་གི་ལུང་པའི་ནང་མི་སེར་གཉིས་པའི་གྲལ་རིམ་གྱི་གནས་སྟངས་ནང་ལྷུང་བཞིན་ཡོད། རྒྱ་ནག་གཞུང་གིས་སྤོབས་པ་ཆེན་པོས་བོད་ནང་མེ་འཁོར་ལྕགས་ལམ་དང་། གཞུང་ལམ། གནམ་ཐང་སོགས་ཀྱི་འཛུགས་སྐྲུན་བྱས་ཡོད་སྐོར་བརྗོད་པ་དེ་དག་དོན་དངོས་ཐོག་འཛུགས་སྐྲུན་དེ་དག་གིས་བོད་ནང་མུ་མཐུད་རྒྱ་རིགས་ཀྱི་མི་འབོར་སྤོ་ཤུགས་ཆེ་རུ་གཏོང་རྒྱུ་དེ་ཡིན་ཅེས་གསུངས། དེ་བཞིན་ཚོགས་འདུའི་མཇུག་བསྡོམས་སུ་ཉི་ཧོང་དུ་རྟེན་གཞི་བྱས་པའི་བོད་གཞུང་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་ཉི་ཧོང་མི་མང་ཚོར་མུ་མཐུད་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཡང་ཞུས་ཡོད་པ་བཅས།
