༢༠༡༠ ཕྱི་ཟླ་ ༤ ཚེས་ ༧ རེས་གཟའ་ལྷག་པ།
༄༅། །བོད་གཞུང་འཕྲོད་བསྟེན་ལས་ཁུངས་ནས་འདི་གར་བཏང་གནས་ནང་འཁོད་དོན། བོད་གཞུང་འཕྲོད་བསྟེན་ལས་ཁུངས་ཀྱི་ཁྱབ་ཁོངས་དབུས་སྨན་རྩིས་ཁང་གི་འགན་འཛིན་ཟླ་བ་ལགས་ཀྱིས་ཕྱི་ལོ་ ༢༠༠༤ ནས་དབུས་སྨན་རྩིས་ཁང་གི་འགན་འཛིན་ལས་འགན་ལོ་ལྔའི་རིང་ཆ་ཚང་གནང་རྗེས་འདི་ལོ་སྨན་པ་ཚེ་དབང་རྟ་མགྲིན་ལགས་དབུས་སྨན་རྩིས་ཁང་གི་འགན་འཛིན་གསར་པར་བསྐོ་གཞག་བྱུང་ཡོད། དེ་ཡང་སྨན་པ་ཚེ་དབང་རྟ་མགྲིན་ལགས་ནི། ཕྱི་ལོ་ ༡༩༥༧ ལོར་སྟོད་དིང་རི་ཁུལ་དུ་འཁྲུངས་ཤིང་། ཕྱི་ལོ་ ༡༩༦༠ ལོར་རྒྱ་གར་ལ་བཙན་བྱོལ་དུ་འབྱོར་བ་དང་། རང་ལོ་དགུ་ནས་ཌལ་ཧོར་གཏན་སློབ་ཏུ་གཞི་རིམ་འཛིན་གྲྭ་བདུན་པ་བར་སློབ་སྦྱོང་གནང་བ་དང་། ཕྱི་ལོ་ ༡༩༧༢ ལོར་སྨན་རྩིས་ཁང་གི་མཐོ་སློབ་ཏུ་འཛུལ་ཞུགས་གནང་སྟེ། ཕྱི་ལོ་ ༡༩༧༨ ལོར་སྨན་པ་དཀའ་བཅུ་པ་ཐོན་ཏེ་ལས་བྱེད་དུ་འཛུལ་ཞུགས་ཀྱིས་མའེ་སོར་བོད་མིའི་གཞིས་ཆགས་སུ་ལོ་གཅིག་ཉམས་གསོག་དང་འབྲེལ་སྨན་པའི་འགན་བཞེས། ཕྱི་ལོ་ ༡༩༧༩ ནས་ ༡༩༨༣ བར་རྡ་ས་དབུས་སྨན་རྩིས་ཁང་ནང་སྨན་གཉེར་ཕྱིར་གཏོང་སྨན་དྲུང་དང་སྐབས་མཚམས་ས་གནས་སྨན་པའི་རྐང་ཚབ་ཀྱིས་སྔ་དགོང་ནད་གསོ་ཁང་ནང་ནད་པར་བརྟག་དཔྱད་དང་༸གོང་ས་མཆོག་གི་བླ་སྨན་པ་རྣམ་པའི་ཞབས་ཞུ་དང་། ཕྱི་ལོ་ ༡༩༨༤ ལོར་སྨན་རམས་པ་ཆུང་བར་གནས་སྤར་གྱིས་ལྡི་ལི་གསར་པའི་ཡན་ལག་སྨན་ཁང་གི་སྨན་པར་བསྐོ་གཞག་གནང་སྟེ་ལོ་བཅུ་བདུན་ས་གནས་ནི་ཛམ་མུ་ཏིན་དུ་སྨན་པ་དང་ལོ་བདུན་སྨན་པའི་འགན་འཛིན་གྱི་འགན་བཞེས། ཕྱི་ལོ་ ༡༩༩༨ ནས་སྨན་རམས་པ་འབྲིང་བར་གནས་སྤར་དང་། ཕྱི་ལོ་ ༢༠༠༡ ནས་སྐུའི་སྨན་ཞབས་ཁོངས་སུ་བསྐོ་གཞག་དང་སྨན་སྦྱོར་ཁང་གི་འགན་འཛིན་གནང་། ཕྱི་ལོ་ ༢༠༠༤ ནས་དབུས་སྨན་རྩིས་ཁང་གི་འགན་འཛིན་གཞོན་པར་བསྐོ་གཞག་དང་། ཕྱི་ལོ་ ༢༠༠༧ མཐོ་སློབ་ཀྱི་སློབ་སྤྱིའི་འགན་བཞེས། ཕྱི་ལོ་ ༢༠༠༨ མཁས་པའི་སློབ་སྟོན་ཚོགས་ཆུང་གི་སློབ་སྟོན་པའི་ལས་འགན་བཞེས་མུས་དང་འབྲེལ་སྔ་རྗེས་སུ་ཕྱི་ནང་མི་རིགས་དུ་མར་བོད་ཀྱི་གསོ་རིག་ངོ་སྤྲོད་དང་ཉམ་ཐག་འགྲོ་བ་ནད་ཀྱི་མནར་བ་རྣམས་སྡུག་བསྔལ་ལས་སེལ་བ་སོགས་གསོ་རིག་བསྟན་པ་འཛིན་སྐྱོང་སྤེལ་གསུམ་ཐད་ཕྱག་རྗེས་བླ་མེད་བཞག་གནང་ཡོད། ཕྱི་ལོ་ ༢༠༡༠ ཟླ་ ༣ ཚེས་ ༢༢ ཉིན་བོད་གཞུང་སྨན་རྩིས་ཁང་གི་སྐབས་བཅུ་བཞི་པའི་འགན་འཛིན་དུ་བསྐོ་གཞག་གནང་བ་གཞིར་བཟུང་ཕྱི་ཟླ་ ༤ ཚེས་ ༡ ནས་ལས་འགན་དངོས་སུ་བཞེས་ཡོད་པ་བཅས།
