༢༠༡༠ ཕྱི་ཟླ་ ༤ ཚེས་ ༢ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༣༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཕོ་བྲང་དུ་མགོན་པོ་གང་ཉིད་མཆོག་མཇལ་ཞུར་བཅར་བའི་ཕྱི་རྒྱལ་ཡུལ་གྲུ་ཁག་གི་ནང་པ་ ༡༥༠ ཙམ་ལ་བྱམས་བརྩེ་དང་ལྡན་པའི་སྤྱི་ཚོགས་ཤིག་དགོས་སྐོར་ལམ་སྟོན་བཀའ་སློབ་སྩལ་དོན།
ཆོས་ཉམས་ལེན་བྱེད་མཁན་ཡིན་མིན་ལ་མ་ལྟོས་པར་དུས་ཇི་སྲིད་བར་དུ་ང་ཚོ་འཛམ་གླིང་འདིའི་ནང་གནས་པ་དེ་སྲིད་དུ་སྤྱི་ཚོགས་འདི་བྱམས་བརྩེ་དང་ལྡན་པ་ཞིག་དགོས། དོན་དམ་པའི་ཐོག་ནས་བལྟས་ན། ང་ཚོ་ཚང་མ་འགྲོ་བ་མིའི་ཁྱིམ་ཚང་གཅིག་གི་མི་ཡིན་པ་གནས་སྟངས་ཀྱིས་བསྐྲུན་ཡོད། གཞི་རྩའི་ཕན་ཚུན་དབར་དཔལ་འབྱོར་གྱི་ཆ་ནས་གཅིག་གིས་གཅིག་ལ་ཤུགས་ཆེན་པོ་བརྟེན་དགོས་ཀྱི་ཡོད། དེ་བཞིན་ཁོར་ཡུག་གི་ཆ་ལའང་ཚང་མས་དོ་སྣང་བྱེད་དགོས་པ་ཞིག་རེད་མ་གཏོགས་རྒྱལ་ཁབ་གཅིག་གི་ཁོར་ཡུག་ལ་དོ་སྣང་བྱེད་དགོས་པ་དང་རྒྱལ་ཁབ་གཞན་ནས་ཁོར་ཡུག་ལ་དོ་སྣང་བྱེད་མི་དགོས་པ་དེ་འདྲ་བརྗོད་རྒྱུ་མེད། དེར་བརྟེན་ང་ཚོ་ཕན་ཚུན་དབར་དོན་དམ་བུ་སྤུན་གྱི་འདུ་ཤེས་ངེས་པར་དུ་དགོས་པ་ཞིག་ཡིན། དེ་བརྒྱུད་ནས་གོ་ལའི་ཐོག་འཁྲིས་པའི་ལས་འགན་ལ་བསམ་བློ་གཏོང་དགོས་པ་རེད། སེམས་ཅན་ཐམས་ཅད་ཀྱི་དོན་དུ་བསམ་བློ་གཏོང་རྒྱུ་དེ་ཡང་ལག་ལེན་དུ་འཁེལ་རྒྱུ་ཡོད་མེད་ལ་མ་ལྟོས་པར། ཁྱིམ་ཚང་དང་སྤྱི་ཚོགས་བཟང་པོ་ཞིག་སྐྲུན་ཆེད་ཕན་ཐོགས་ཆེན་པོ་ཡོད་པ་རེད། ཡང་རྙོག་གྲ་ཆུང་ཆུང་དེ་འདྲ་གང་དུའང་ཡོད་སྲིད་ཀྱང་ཁོར་ཡུག་དེའི་འོག་ཉེན་ཁ་ཆུང་བ་ཡོད། དཀའ་ངལ་གཅིག་ལ་བལྟས་ནས་ང་ཚོ་དང་ཁྱེད་ཚོ་ཞེས་དབྱེ་འབྱེད་ཆེན་པོ་བྱས་ན། དེ་བརྒྱུད་ནས་གཞན་ལ་གནོད་འཚེ་གཏོང་རྒྱུ་དང་སྲོག་གཅོད་རྒྱུའི་ཀུན་སློང་སླེབས་ཀྱི་རེད། གལ་སྲིད་ང་ཚོས་འགྲོ་བ་མི་རིགས་ཐེར་འབུམ་དྲུག་ཡོད་པ་དེ་ཚོ་ང་ཚོ་ཞེས་པའི་འདུ་ཤེས་ཤིག་གི་ནང་དུ་བཞག་པ་ཡིན་ན། རྙོག་གྲ་ཆུང་ཆུང་རིགས་ཡོང་སྲིད་པ་དེ་ཚོ་ཕན་ཚུན་གྲོས་མོལ་དང་། གུས་ཞབས། བསམ་ཤེས་ཀྱི་ཐོག་ནས་སེལ་ཐུབ་རྒྱུ་ཞིག་ཡིན་པ་རེད། ཅེས་བཀའ་སློབ་ཕེབས་ཡོད་པ་མ་ཟད། སྐབས་དེར་༸གོང་ས་༸སྐྱབས་མགོན་པོ་ཆེན་པོ་མཆོག་གིས་ཆོས་ལུགས་ཕན་ཚུན་དབར་མཐུན་སྒྲིལ་དགོས་སྐོར་གྱི་ལམ་སྟོན་བཀའ་སློབ་ཀྱང་སྩལ་ཡོད།
