༢༠༡༠ ཕྱི་ཟླ་ ༣ ཚེས་ ༢༠ རེས་གཟའ་སྤེན་པ།
༄༅། །རྒྱ་གར་གྱི་རྒྱལ་ས་ལྡི་ལིར་ཡོད་པའི་༸གོང་ས་༸སྐྱབས་མགོན་ཆེན་པོ་མཆོག་གི་ཀུན་ཕན་བདེ་རྩ་ཚོགས་པ་ནས་ཇི་ལྟར་གསོལ་འདེབས་ཞུ་དོན་ལྟར་བཀའ་བཞེས་བཟང་པོའི་སྨིན་སྩལ་ཐོབ་སྟེ་ཕྱི་ལོ་ ༢༠༡༠ ཟླ་ ༣ ཚེས་ ༡༩ ཉིན་རྒྱབ་ནས་རྒྱ་གར་རྒྱལ་ས་ལྡི་ལིར་ཡོད་པའི་ཨ་ཤོ་ཀ་ (Ashoka Hotel) སྐར་མ་ལྔ་ཅན་གྱི་མགྲོན་ཁང་དུ་༸གོང་ས་མཆོག་གིས་རྒྱལ་སྲས་ཞི་ལྷས་མཛད་པའི་བྱང་ཆུབ་སེམས་པའི་སྤྱོད་པ་འཇུག་པའི་ཆོས་འབྲེལ་དབུ་འཛུགས་མཛད་ཡོད།དེ་ཡང་རྒྱ་གར་གྱི་གནད་ཡོད་མི་སྣས་གཙོས་ཆོས་བ་ཞུ་གྲངས་ ༢༥༠ བཅར་ཡོད་པ་རྣམས་ལ་༸གོང་ས་མཆོག་གིས་བཀའ་སློབ་ཕེབས་དོན། ལོ་རབས་མང་པོའི་གོང་ནས་བྱོན་པའི་རྒྱ་གར་གྱི་མཁས་པ་མགོན་པོ་ཀླུ་སྒྲུབ་དང་རྒྱལ་སྲས་ཆེན་པོ་ཞི་བ་ལྷ་སོགས་ནས་ལེགས་སྐྱེས་སུ་བཞག་པའི་ལྟ་གྲུབ་དེ་དག་སྔར་རྒྱ་གར་གྱི་ལྟ་གྲུབ་ཡིན་པ་དང་། ལྟ་གྲུབ་དེ་རྣམས་དེང་དུས་ཀྱི་སྤྱི་ཚོགས་ནང་འབྲེལ་བ་གཏིང་ཟབ་ཡོད། དེ་བཞིན་ང་ཚོ་འགྲོ་བ་མིའི་སེམས་འདི་ཞི་བདེ་བག་ཕེབས་ཡོད་ན། ནང་སེམས་རྒྱུད་ལ་ཞི་བདེ་སྐྲུན་ཐུབ། དེས་རྐྱེན་པའི་རང་ཉིད་ཀྱི་ལུས་པོ་བདེ་ཐང་ངང་གནས་ཐུབ་ཀྱི་ཡོད། སེམས་ཞི་བདེ་དང་བག་ཕེབས་བྱུང་ན། དེའི་དབང་གིས་མིའི་བློ་རིག་གསལ་དུ་འགྲོ་རྒྱུར་ཕན་ཐོགས་ཡོད་པ་མ་ཟད། དངོས་ཡོད་ཐོག་ཉམས་ཞིབ་དང་ཞིབ་འཇུག་བྱེད་སྐབས་ཕན་ཐོགས་ཆེན་པོ་ཡོང་གི་ཡོད། གལ་ཏེ་ང་ཚོའི་སེམས་འདི་ཟང་ཟིང་དུ་གནས་ཚེ་དངོས་ཡོད་ཀྱི་གནས་ཚུལ་བློ་གཟུ་བོར་གནས་ནས་ཞིབ་འཇུག་བྱེད་ཐུབ་ཐབས་མེད། ཅེས་བཀའ་སློབ་ཕེབས་ཡོད། དེ་བཞིན་ཕྱི་ཚེས་ ༡༩ ནས་ ༢༡ བར་ཉིན་གྲངས་གསུམ་གྱི་རིང་མགོན་པོ་གང་ཉིད་མཆོག་གིས་ཆོས་ཞུ་བ་རྣམས་ལ་ནང་ཆོས་ངོ་སྤྲོད་དང་། ཉིན་མཐའ་མའི་སྔ་དྲོར་སྤྱན་རས་གཟིགས་ཀྱི་བཀའ་དབང་བཀའ་དྲིན་སྩལ་གནང་མཛད་རྒྱུ་ཡིན་འདུག ཀུན་ཕན་བདེ་རྩ་ནས་༸གོང་ས་༸སྐྱབས་མགོན་ཆེན་པོ་མཆོག་གི་གསུང་ཆོས་དེ་ལྟར་ཨ་ཤོ་ཀ་མགྲོན་ཁང་དུ་གོ་སྒྲིག་ཞུས་ཏེ་ལོ་གསུམ་ཕྱིན་ཡོད་པ་མ་ཟད། གསུང་ཆོས་ཞུ་མཁན་ཕལ་མོ་ཆེ་རྒྱ་གར་གྱི་མི་མང་ཡིན་པ་རེད། ཡང་ཕྱི་ཚེས་ ༢༠ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ལྡི་ལིར་རྟེན་གཞི་བྱས་པའི་ཕྱི་རྒྱལ་གཞུང་ཚབ་ཁང་གི་ལས་བྱེད་པ་ཁག་གཅིག་དང་ལྷན་མཇལ་མོལ་མཛད་འཆར་ཡོད་པ་དང་། ཚེས་ ༢༡ ཉིན་བོད་མི་རྣམས་རྒྱ་གར་ནང་བཙན་བྱོལ་དུ་འབྱོར་ནས་མི་ལོ་ ༥༠ འཁོར་བའི་རྒྱ་གར་གཞུང་མང་ལ་ལོ་གཅིག་རིང་ཐུགས་རྗེ་ཆེ་ཞུའིི་ལས་གཞིའི་མཇུག་བསྡོམས་ཀྱི་མཛད་སྒོར་ལྡི་ལི་སྐུ་ཚབ་དོན་ཁང་དང་རྒྱ་གར་རྒྱལ་ཡོངས་བསྟི་གནས་ India International Centre ཞེས་པ་གཉིས་ཐུན་མོང་གིས་གོ་སྒྲིག་འོག་ཆོས་ལུགས་རིས་མེད་ཀྱི་ཐུགས་སྨོན་མཛད་རྒྱུའི་ལས་རིམ་ཞིག་གོ་སྒྲིག་ཞུས་པ་དེར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱང་འཆར་ཡོད་པ་བཅས་ཀྱི་གནས་བསྡུས་སུ།།
