༢༠༡༠ ཕྱི་ཟླ་ ༡ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་གསུང་ཆོས་བཀའ་དྲིན་སྩོལ་བཞིན་པའི་ཉིན་གསུམ་པའི་སྔ་དྲོར་ཧི་མ་ལ་ཡའི་རི་རྒྱུད་ཀྱི་མི་མང་རྣམས་ལ་ནང་ཆོས་ལ་སློབ་སྦྱོང་བྱ་རྒྱུ་གལ་ཆེན་པོ་ཡིན་པ་དང་། ཅི་སྟེ་བོད་ཀྱི་བདེན་མཐའ་མ་སེལ་བར་དེ་མུར་ཡུན་གནས་དགོས་པ་བྱུང་ཚེ་བོད་གངས་ཅན་ལྗོངས་ཀྱི་ནང་པ་སངས་རྒྱས་པའི་བསྟན་པ་མི་ཉམས་རྒྱུན་འཛིན་བྱེད་དགོས་པ་དང་། དེ་བཞིན་ཧི་མ་ལ་ཡའི་རི་རྒྱུད་ཁུལ་གྱི་ཁོར་ཡུག་སྲུང་སྐྱོབ་བྱ་རྒྱུ་གལ་འགངས་ཆེན་པོ་ཡིན་པའི་བཀའ་སློབ་ཕེབས་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན། དེང་སང་ཧི་མ་ལ་ཡའི་རི་རྒྱུད་ཀྱི་མི་མང་ཚོས་ནང་ཆོས་ལ་སློབ་གཉེར་བྱ་རྒྱུར་དོ་སྣང་ཆེ་རུ་འགྲོ་བཞིན་འདུག ཞེ་དྲག་ཡག་པོ་རེད། ཡིན་ནའང་ནང་ཆོས་སློབ་སྦྱོང་བྱེད་པར་བཀའ་འགྱུར་བསྟན་འགྱུར་གྱི་ཡི་གེ་དེ་ཤེས་རྒྱུ་གལ་ཆེན་པོ་རེད། བཀའ་འགྱུར་བསྟན་འགྱུར་པུ་ཏི་ ༣༠༠ ཙམ་ཡོད་པ་དེ་དག་ཡུལ་སྐད་སོ་སོའི་ནང་བསྒྱུར་ཐུབ་རྒྱུ་ཁག་པོ་རེད། མོན་པ། བྷོ་ཊི་ཡ། རྗོང་ཁ་སོགས་མིང་གང་དང་གང་རྟགས་པ་ཡིན་ཡང་ང་ཚོའི་རིག་གཞུང་རྟེན་ས་དེ་གཙོ་བོ་ནང་ཆོས་རེད། ནང་པའི་ཆོས་དེ་ཡིག་ཆའི་ནང་གཏན་ལ་ཕབ་ནས་ཡོད་དུས་ལོ་སྟོང་ཕྲག་མང་པོ་ཕྱིན་ནའང་རྩ་བ་གཏན་པོ་ཚུགས་ནས་བསྡད་ཡོད་པ་རེད། ཡི་གེ་མེད་ན་ངག་ལབ་བརྒྱབ་ནས་བསྡད་ན་གཏན་པོ་ཡོད་པ་མ་རེད། དེ་འདྲ་སོང་ཙང་བཀའ་འགྱུར་བསྟན་འགྱུར་གྱི་ཡི་གེ་བོད་ཡིག་དེར་སློབ་སྦྱོང་བྱེད་དགོས་རྒྱུ་གལ་ཆེན་པོ་རེད། བཙན་བྱོལ་བོད་མིའི་སློབ་གྲྭ་ཁག་གི་ནང་དེང་སང་སློབ་ཕྲུག་གྲངས་ཚད་ཉུང་དུ་འགྲོ་བཞིན་ཡོད། སློབ་གྲྭ་དེ་དག་གི་ནང་ཧི་མ་ལ་ཡའི་རི་རྒྱུད་དུ་ཡོད་པའི་བོད་ཡིག་སྦྱོང་འདོད་ཡོད་མཁན་ཕྲུ་གུ་ཚོ་སློབ་འཇུག་བྱེད་རྒྱུའི་སྐོར་འབྲེལ་ཡོད་ཚོར་ཞུས་ཡོད། འགྲིག་གི་ཡོད་པའི་བཟོ་འདྲ་པོ་འདུག ཅེས་བཀའ་སློབ་སྩལ་ཡོད།
ཡང་༸གོང་ས་མཆོག་གིས་ཁོར་ཡུག་སྐོར་བཀའ་སློབ་ཕེབས་དོན། ཧི་མ་ལ་ཡའི་རི་རྒྱུད་ཀྱི་ས་ཁུལ་དེ་དག་ནི་ཤིང་ནགས་སྟུག་པོ་ཡོད་པའི་ས་གནས་ཤིག་རེད། ས་ཁུལ་དེ་དག་གི་ཁོར་ཡུག་གལ་ཆེན་པོ་ཡིན། ཤིང་གཅོད་རྒྱུ་ཉུང་དུ་གཏོང་རྒྱུ་དེ་གལ་ཆེན་པོ་རེད། དེ་བཞིན་ཤིང་སྡོང་གསར་པ་འདེབས་འཛུགས་བྱ་རྒྱུ་དེ་ཡང་ཧ་ཅང་གལ་ཆེན་པོ་རེད། ངོས་ཀྱིས་རྟག་པར་འདི་ལྟར་བརྗོད་ཀྱི་ཡོད། ཁོར་ཡུག་ཐོག་དམིགས་བསལ་དོ་སྣང་བྱེད་རོགས་ཟེར་རྒྱུ་ཡིན། སྤྱིར་འཛམ་གླིང་ཚ་དྲོད་ཆེ་རུ་འགྲོ་བཞིན་པའི་རྐྱེན་གྱིས་བོད་དང་ཧི་མ་ལ་ཡའི་རི་རྒྱུད། བོད་ཀྱི་གངས་རི་དེ་ཚོ་མྱུར་ཚད་མགྱོགས་པོའི་ཐོག་ནས་ཞུར་འགྲོ་བ་ཤོད་ཀྱི་ཡོད། དེས་རྐྱེན་པས་གློ་བུར་དུ་ཆུ་ལོག་ཆེན་པོ་ཡོང་རྒྱུ་དང་། རིམ་པས་ཆུ་རྩ་བ་ནས་སྐམ་འགྲོ་བའི་ཉེན་ཁ་ཡོང་རྒྱུ་ཡང་ཤོད་ཀྱི་ཡོད། བོད་ཀྱི་ཐོ་སྒང་ཁོར་ཡུག་དེ་དམིགས་བསལ་གྱི་དོ་སྣང་བྱ་རྒྱུ་གལ་ཆེན་པོ་རེད་འདུག་ཅེས་སོགས་ཀྱི་བཀའ་སློབ་བཀའ་དྲིན་ཆེ་བ་སྩལ། དེ་བཞིན་༸གོང་ས་མཆོག་གིས་ཧི་མ་ལ་ཡའི་རི་རྒྱུད་ཀྱི་མི་མང་ཚོས་བོད་གངས་ཅན་ལྗོངས་ཀྱི་ནང་པ་སངས་རྒྱས་པའི་བསྟན་པ་དེ་མི་ཉམས་རྒྱུན་འཛིན་བྱེད་དགོས་པའི་སྐོར་ལ་བཀའ་སློབ་ཕེབས་དོན། བོད་གངས་ཅན་ལྗོངས་ཀྱི་སངས་རྒྱས་བསྟན་པའི་གནས་སྟངས་ཉག་ཕྲ་བའི་སྒང་ལ་གནས་ཡོད། གལ་ཏེ་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་དེ་བཞིན་དེ་མུ་མཐུད་ནས་ཉམས་ཆག་འགྲོ་རྒྱུའི་གནས་སྟངས་ཆགས་ན་འཛམ་གླིང་འདིའི་སྟེང་སངས་རྒྱས་ཀྱི་བསྟན་པ་ཡོངས་སུ་རྫོགས་པ་ཆ་ཚང་བ་ཞིག་ཡོད་པ་འདི་རྒྱུན་འཛིན་བྱེད་མཁན་དེ་ཧི་མ་ལ་ཡའི་རི་རྒྱུད་ཀྱི་མི་མང་ཁྱེད་རང་ཚོ་ཆགས་ཡོད། དེ་འདྲ་ཡིན་དུས་གཞི་རྐང་བོད་ཀྱི་གནས་སྟངས་ལ་ཏན་ཏན་འགྱུར་བ་འགྲོ་གི་རེད། བོད་ཀྱི་བདེན་མཐའ་སེལ་རྒྱུ་ཕལ་ཆེར་ངེས་པ་རེད། ཡིན་ནའང་རེ་བ་བཟང་ས་དང་། གྲ་སྒྲིག་སྡུག་ས་ནས་རྒྱག་དགོས་ཟེར་བ་ལྟར་ཅི་སྟེ་གནས་ཚུལ་ཐབས་སྡུག་པོ་བྱུང་བ་ཡིན་ན། ཕྱིན་ཆད་བོད་གངས་ཅན་ལྗོངས་ཀྱི་བསྟན་པ་འཛིན་མཁན་ཁྱེད་ཚོ་ཆགས་ཡོད་པ་རེད། ཅེས་བཀའ་སློབ་ཟབ་རྒྱས་ཕེབས་ཡོད་པ་བཅས། ས་གནས་ནས་འདི་ག་ཕྱི་དྲིལ་ལས་ཁུངས་ཀྱི་སྒྲ་བརྙན་སྡེ་ཚན་གྱི་གསར་འགོད་པ་རྣམ་རྒྱལ་ཚེ་དབང་ནས་བཏང་འབྱོར་བྱུང་བ་སྙིང་བསྡུས་སུ།།
