༢༠༡༠ ཕྱི་ཟླ་ ༡ ཚེས་ ༢༧ རེས་གཟའ་ལྷག་པ།
༄༅། །དེ་རིང་འདིར་ལྷན་འཛོམས་གནང་བའི་སེར་སྐྱ་མང་ཚོགས་ཚང་མར་དེ་རིང་རྒྱས་ཟླའི་ཚེས་བརྒྱད་ཀྱི་དུས་ཚོད་དང་བསྟུན་ཏེ་འདིར་ཚེ་བསོད་དབང་ལུང་རྒྱས་པའི་རྟེན་འབྲེལ་གྱི་ཆོ་
ག་དང་འབྲེལ་བའི་ཐོག་ནས་འདི་གར་མང་ཚོགས་ཀྱིས་ཞབས་གཞས་གནང་རྒྱུ་བྱུང་བ་རེད། ད་ལྟ་ཞབས་གཞས་འཁྲབ་སྟོན་ཟིན་པ་ཚོ་དང་འཁྲབ་པར་འགྱུར་བ། ད་ལྟ་ཁྱེད་རང་ཚོ་ཁག་མང་པོ་ཞིག་འདུག དེ་དག་ཚང་མར་ཐུགས་རྗེ་ཆེ་ཟེར་གྱི་ཡིན། ང་ཚོ་ཚང་མས་ཤེས་གསལ་རེད། ང་ཚོའི་ངོ་གདོང་སྒང་གི་གནས་ཚུལ་ལ་བལྟས་པ་ཡིན་ན། ང་ཚོ་ཚང་མ་སྣང་བ་སྐྱིད་པོ་དང་བག་ཕེབས་པོ་བྱ་རྒྱུ་ཞིག་ཆགས་ཀྱི་ཡོད། ཡིན་ནའང་གཞི་རྩའི་ང་ཚོའི་གནས་ཚུལ་ལ་བསམ་བློ་བཏང་བ་ཡིན་ན། ང་ཚོ་བོད་མི་རིགས་དངོས་གནས་ལོ་རྒྱུས་ལྡན་པའི་མི་རིགས་ཤིག་དང་། དེ་བཞིན་སོ་སོའི་རིག་གཞུང་རེད་དེ་དང་འབྲེལ་བའི་སངས་རྒྱས་ཀྱི་ཆོས་རེད། དེ་དག་དངོས་གནས་གཉན་འཕྲང་དོག་པོ་ཞིག་གི་སྟེང་གནས་ཡོད། དེ་འདྲ་ཡིན་དུས་ཁྱེད་རང་ཚོ་ཚང་མས་ཉིན་རེ་ཉིན་རེའི་སོ་སོའི་མི་ཚེའི་གནས་སྟངས་གཅིག་པུ་མ་ཡིན་པར་རྩ་བའི་ང་ཚོ་བོད་གངས་ཅན་པ་ཟེར་བ་འདི་གང་འདྲ་ཞིག་གི་ཐོག་གནས་ཡོད་པ་དེ་ནམ་ཡང་བརྗེད་ཐབས་མེད་པ་རེད། གལ་ཆེ་ཤོས་དེ་བོད་ནང་ཡོད་པའི་རྒྱ་ཆེའི་མི་མང་རྒན་གཞོན་མེད་པ་ཚང་མས་དངོས་གནས་ལྷག་བསམ་དང་སྙིང་སྟོབས་གཅིག་ཏུ་བསྒྲིལ་ཏེ་སྡོད་ཀྱི་ཡོད་པ་གསལ་པོ་ཞེ་དྲག་ཡིན། དེར་བརྟེན་ང་ཚོ་བཙན་བྱོལ་དུ་ཡོད་མཁན་ཚོས་བོད་རྒྱ་ཆེའི་མི་མང་གིས་ཚབ་བྱེད་ཀྱི་ཡོད་པ་རེད། ང་ཚོ་རང་མགོ་གང་ཐོན་བྱས་ནས་ཡོང་བ་ཞིག་མ་རེད། རྩ་བའི་ང་ཚོའི་བོད་འདི་སྔར་ཆོས་རྒྱལ་ཚོའི་སྐབས་ནས་བོད་མི་རིགས་ཞེས་རིག་གཞུང་ཕྱུག་པོ་ཡོད་མཁན། རླབས་ཆེན་གྱི་མི་རིགས་ཤིག་ཚུགས་ནས་ཡོད་པ་དེ་ང་ཚོའི་མི་རབས་འདིའི་ཐོག་ལ་ཧ་ཅང་གི་ལས་འགན་ཆེན་པོ་ཞིག་འཁྲིས་ཡོད་པའི་དུས་ཚོད་རེད། དེ་འདྲ་ཡིན་དུས་ཁྱེད་རང་ཚོ་ཚང་མས་བསམ་བློ་རྒྱ་ཆེ་ས་ནས་བཏང་སྟེ་ལྷག་བསམ་དང་སྙིང་སྟོབས་ཞུམ་པ་མེད་པ། སྐབས་སུ་བབ་པའི་ང་ཚོའི་ལས་འགན་གཙོ་བོ་དེ་གང་རེད་དམ་ཞེས་ན། ཤེས་བྱ་ཡོན་ཏན་སྦྱོང་རྒྱུ་དེ་ཧ་ཅང་གལ་ཆེན་པོ་རེད། ང་རང་ཚོ་བོད་རང་ཉིད་ལ་རིག་གཞུང་གཏིང་ཟབ་ཡོད་པ་ཞིག་དང། ལྷག་པར་ནང་ཆོས་དང་འབྲེལ་བའི་ལྟ་གྲུབ་ཟབ་པོ་ཞིག་ཡོད་པ་དེ་དག་སེར་སྐྱ་ཕོ་མོ་དབྱེ་བ་མེད་པ་ཚང་མས་དེར་དོ་སྣང་ཆེ་ཙམ་བྱ་རྒྱུ་དེ་ངོས་ཀྱིས་ནམ་རྒྱུན་དུ་འབོད་སྐུལ་བྱ་རྒྱུ་འདི་རེད། འབོད་སྐུལ་བྱས་པ་ལྟར་ཁྱེད་རང་ཚོ་མང་པོ་ཞིག་གིས་འབོད་སྐུལ་ལ་དང་ལེན་བྱས་ཏེ་གང་ཡོད་ཀྱིས་འབད་བརྩོན་བྱེད་ཀྱི་འདུག ཐུགས་རྗེ་ཆེ་ཟེར་གྱི་ཡིན།
དེ་བཞིན་དེང་དུས་ཤེས་ཡོན་གྱི་ཐོག་ལ་སློབ་གྲྭ་བསྒྲིམས་པའི་གཞི་རྩའི་ཤེས་ཡོན་ཡོད་པ་ཙམ་གྱི་ཆོག་ཤེས་མ་བྱས་པར། དེ་བཞིན་མཐོ་རིམ་གྱི་སློབ་གྲྭར་ཕྱིན་ཏེ་ལག་འཁྱེར་ཡོད་པ་ཙམ་གྱི་ཆོག་ཤེས་མ་བྱས་པ། སོ་སོ་རིག་གནས་ཀྱི་སྡེ་ཚན་གང་ཡིན་ཡང་དེའི་ནང་ལ་རང་སྐྱ་འཕེར་བའི་སློབ་སྦྱོང་བྱ་རྒྱུ་དེ་ཧང་ཅང་གལ་ཆེན་པོ་ཡིན། ང་ཚོ་འདི་གར་རང་དབང་ལུང་པའི་ནང་ལ་གོ་སྐབས་ཡོད་པ་རེད། དེར་བརྟེན་གོ་སྐབས་ཡོད་པ་དེ་ཆུད་ཟོས་སུ་མ་སོང་བ་ཞིག་ཚང་མས་འབད་བརྩོན་བྱ་རྒྱུ་གལ་ཆེན་པོ་ཡིན། བོད་ནང་ལ་ཡོད་པའི་གཞིས་ལུས་རྒྱ་ཆེའི་མི་མང་ལ་ཆ་བཞག་ན། བར་སྐབས་དངོས་གནས་སློབ་སྦྱོང་དང་ཤེས་བྱ་ཡོན་ཏན་གྱི་ཐོག་ལ་དོ་སྣང་གསར་པ་ཞིག་སླེབས་ཏེ་ཚང་མས་དོ་སྣང་ཆེན་པོ་བྱེད་ཀྱི་ཡོད་པ་འདྲ། རྗེས་སུ་ཡི་རང་ཡོད་ཐུགས་རྗེ་ཆེ་ཟེར་གྱི་ཡིན། ད་དུང་ཡིན་ཡང་ཤེས་ཡོན་གྱི་ཐོག་ལ་དེང་དུས་ཀྱི་ཤེས་ཡོན་རེད། དེ་བཞིན་བོད་རང་ཉིད་ལ་ཡོད་པའི་བཟང་པོའི་ཤེས་ཡོན་རྒྱ་ཆེན་པོ་དང་གཏིང་ཟབ་པོ་ཡོད་པ་དེ་ཕྱག་མཆོད་འབུལ་དང་དད་པ་བྱེད་སའི་ཡུལ་ཁོ་ནར་མ་བཞག་པར་རང་ཉིད་ཀྱི་གཤིས་རྒྱུད་ལ་ཚང་བར་བྱ་རྒྱུ་དེ་གལ་ཆེན་པོ་ཡིན། རང་གི་གཤིས་རྒྱུད་ལ་ཚང་བར་བྱེད་པ་ལ་ཤེས་དགོས་པ་རེད། ཐོས་ནས་ཤེས་པར་བྱེད་པའི་དགོས་པ་ཡང་འབྱེད་པར་ཡིན་པས། ཐོས་པའི་ཐོག་ཏུ་ནུས་པ་ལྡན་པའི་ལག་ལེན་དུ་གནས་པར་བྱའོ། ཞེས་གསུངས་པ་ལྟར་སྔོན་ལ་ཤེས་དགོས་པ་རེད། ཤེས་པའི་དོན་དེ་སོ་སོའི་རྣམ་དཔྱོད་ཀྱིས་ཞིབ་འཇུག་བྱས་ཏེ་ངེས་པ་རྙེད་པ་ཞིག་བྱས། ངེས་པའི་རྙེད་པའི་དོན་དེ་སོ་སོའི་སྒོ་གསུམ་ལ་སྱར་ཏེ་འགྲོ་གི་ཡིན་ན། མི་ཚེ་བཟང་པོ་དང་སྐྱིད་པོ་ཞིག་རང་ཉིད་ཡིན་ཡང་སེམས་སྐྱིད་པ་དང་ལུས་བདེ་བ་གཡས་གཡོན་ཁོར་ཡུག་གི་མི་ཚོ་ཡིན་ནའང་། རང་བཞིན་གྱི་སེམས་བག་ཕེབས་པ། དངོས་གནས་གཞན་ལ་འཚེ་བ་མི་བྱེད་པའི་ང་ཚོའི་སྤྱི་ཚོགས་ཤིག་ཡོང་ཐུབ་རྒྱུའི་ང་ཚོར་རྒྱུ་ཆ་དང་ནུས་པ་ཡོད་པ་རེད། དེའི་ནུས་པ་དང་རྒྱུ་དེ་ཤེས་པ་བྱས་ཏེ་མི་རིགས་དང་རྒྱལ་ཁབ་དབྱེ་འབྱེད་མེད་པ་རེད། ང་ཚོ་འཛམ་གླིང་འདིའི་སྟེང་ལ་མི་དུང་ཕྱུར་དྲུག་ཅུ་ལྷག་ཙམ་ཡོད་པ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་གྱུར་ཡིན། དེའི་ཐོག་ལ་ང་ཚོའི་བོད་ཀྱི་ཆོས་དང་རིག་གཞུང་གིས་ཏན་ཏན་ཞབས་འདེགས་ངེས་ཅན་སྒྲུབ་ཐུབ་རྒྱུའི་ང་ཚོར་སྤོབས་པ་ཡོད། སྔོན་ལ་ང་ཚོའི་སྤོབས་པ་དེ་གཞན་ལ་སྟོན་པར་སྔོན་དུ་རང་ཉིད་ལ་ཚང་བ་ཞིག་དགོས། རང་ལ་ཡོད་པའི་ཐོག་ནས་མི་ལ་འགྲེལ་བཤད་རྒྱག་ཐུབ་པ་ཞིག་དགོས་ཀྱི་རེད། དེར་བརྟེན་ང་ཚོ་གཞིས་བྱེས་བོད་མི་སྤྱི་བོ་གནམ་བསྟན་ཚང་མས་སོ་སོའི་ཁྱད་ནོར་དང་གཅེས་ནོར་ཞིག་ཡོད་པ་དེ་ངོ་ཤེས་པ་བྱས་ཏེ་བདག་པོ་རྒྱག་རྒྱུ་ནི་དཔེ་གལ་ཆེན་པོ་རེད་འདུག དེ་ངོས་ཀྱིས་ལབ་འདོད་བྱུང་། བཀྲིས་བདེ་ལེགས། ཞེས་བཀའ་སློབ་ཕེབས་ཡོད།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
