༢༠༠༩ ཕྱི་ཟླ་ ༦ ཚེས་ ༣ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན། ཕྱི་ཟླ་ ༥ པའི་ཟླ་དཀྱིལ་ཙམ་ནས་གྲོང་ཁྱེར་ལྷ་སའི་འབྲེལ་ཡོད་ལས་ཁུངས་ནས་ས་ཁུལ་གྱི་མི་མང་དང་ལས་ཁུངས་སོ་སོར་ཚོགས་འདུ་བསྐོང་རྒྱུའི་བརྡ་ཐོ་བཏང་སྟེ་ལས་བྱེད་དང་སློབ་ཕྲུག་རྣམས་ས་ག་ཟླ་བའི་རིང་མཆོད་མཇལ་དང་གླིང་སྐོར་སོགས་ཆོས་ཕྱོགས་ཀྱི་བྱ་བ་བྱེད་མི་ཆོག་པའི་བཙན་བཀའ་བཏང་ཡོད་པ་མ་ཟད། དྲག་ཆས་དམག་མི་མང་དུ་བཏང་ཡོད་པ་དང་། ལྷག་པར་གསང་བའི་ཚན་པའི་ལས་བྱེད་འབོར་ཆེན་ཞིག་བཀྲམ་སྟེ་མང་ཚོགས་ཚོའི་རྒྱུན་གཏན་གྱི་བྱེད་སྒོར་དམིགས་བསལ་དམ་བསྒྲགས་ཤུགས་ཆེ་བྱེད་བཞིན་ཡོད་པ་དང་། གྲོང་ཁྱེར་ལྷ་སའི་ནང་ཕྱི་ནས་འགྲུལ་པ་ཡོང་མཁན་ཚོར་བསྐྱར་དུ་ཞིབ་འཇུག་བྱས་ཡོད་འདུག་ལ། ཞིབ་འཇུག་བྱེད་རིང་དམིགས་བསལ་ཁྱིམ་ཚང་སོ་སོའི་ནང་རྒྱ་གར་དུ་འགྲོ་མྱོང་ཡོད་པའི་ནང་མི་བུ་ཕྲུག་ཡོད་མེད་དང་། ཡང་ན་རྒྱ་གར་དུ་ཕྱིན་ཏེ་ཕྱིར་ལོག་བྱས་པའི་ནང་མི་ཡོད་མེད། གཙོ་བོ་ཕྱི་རྒྱལ་དང་དམིགས་བསལ་རྒྱ་གར་དུ་སྤུན་མཆེད་དང་ཕྲུ་གུ་ཡོད་མེད། གལ་སྲིད་ཡོད་ཚེ་དེ་དག་གི་འབྲེལ་བ་བྱ་ཡུལ་ཁ་བྱང་དང་ཁ་དཔར་ཨང་གྲངས། ད་ལྟ་གནས་སྟངས་གང་འདྲ་ཡོད་མེད་སོགས་ཞིབ་ཕྲ་ཐོ་ལེན་བྱས་ཡོད་འདུག་ཅིང་། ཞིབ་བཤེར་དེ་རིགས་སྔ་ལོའི་ཟླ་བ་གསུམ་པའི་མཇུག་ནས་ད་བར་ལས་ཁུངས་སོ་སོར་ཐེངས་བརྒྱད་ལྷག་དང་། གྲོང་མི་ཨུ་ཡོན་ལྷན་ཁང་སོ་སོར་ཐེངས་བཅུ་ལྷག་བྱས་ཡོད་པའི་གནས་ཚུལ་འདུག་པ་མ་ཟད། ད་ཆ་ལྷ་སའི་ནང་དམ་བསྒྲགས་བྱེད་ཤུགས་ཆེ་རུ་བཏང་ཡོད་པ་རེད།
དེ་བཞིན་སྨར་ཁམས་རྫོང་མཆོད་རྟེན་ཤང་ཁོངས་སུ་ཕྱི་ལོ་ ༢༠༠༧ ལོ་ཙམ་ནས་མང་ཚོགས་ཚོས་རྒྱ་གཞུང་ནས་གཏེར་ཁ་སྔོག་འདོན་བྱ་རྒྱུར་ངོ་རྒོལ་ཤུགས་ཆེ་བྱས་ཏེ་བོད་རང་སྐྱོང་ལྗོངས་སུ་ཞུ་གཏུགས་བྱས་པར་གྲུབ་འབྲས་སོན་མེད་ནའང་མང་ཚོགས་ཚོས་མཉམ་རུབ་ཐོག་མུ་མཐུད་ཁྲིམས་ཐོག་ནས་ཞུ་གཏུགས་བྱ་རྒྱུའི་འཆར་གཞི་ཡོད་པར་ཆབ་མདོ་ས་ཁུལ་ནས་བཙན་ཤུགས་ཀྱི་ཐོག་ནས་བཀག་འགོག་བྱས་པ་མ་ཟད། ངོ་རྒོལ་བྱེད་མཁན་ལ་སྤྱི་བདེ་མི་སྣས་ཉེས་རྡུང་གཏོང་བ་དང་། འཛིན་བཟུང་བཀག་ཉར་བྱས་པ་སོགས་ཀྱི་གནས་ཚུལ་ཐོན་ཡོད་ལ། ད་ཆ་ས་གནས་སུ་དམག་མི་ཁྱོན་ཆེ་བཀྲམ་སྟེ་དམ་བསྒྲགས་ཤུགས་ཆེ་བྱེད་བཞིན་ཡོད་པ་དང་། ཨ་མདོ་རྔ་པ་ཁུལ་གྱི་ས་ཁུལ་མང་པོ་ཞིག་ལ་ཉི་གློག་སོགས་ཁྱིམ་ཆས་རིགས་རྒྱལ་ཁབ་ཀྱིས་ཞལ་འདེབས་ཡིན་ཚུལ་གྱིས་སྤྲོད་པ་དང་། རྗེས་སུ་མང་ཚོགས་ཀྱི་ལག་ནས་ཅ་དངོས་ཀྱི་རིན་འབབ་བསྡུས་པ།
རྔ་སྲིབ་སྤྲོ་ཚིགས་དང་། ཨ་འདུས་ཐང་། གནམ་ལྕག་དགོན་གྱི་ཉེ་འདབས་བཅས་ལ་སྔ་ལོའི་ཕྱི་ཟླ་ ༣ པ་ནས་དམག་མི་རྒྱུན་སྡོད་བྱས་ཡོད་པ་མ་ཟད། གོང་གསལ་གྱི་ས་གནས་དེ་དག་ལ་མི་མང་གི་རྒས་གསོ་ཁང་ཡིན་ཁུལ་མིང་བཏགས་ཏེ་དོན་དུ་དམག་ཁང་གསར་རྒྱག་བྱས་ཏེ་དམག་མི་གཏན་སྡོད་ཀྱིས་ས་གནས་སུ་དམ་བསྒྲགས་ཆེན་པོ་བྱེད་བཞིན་ཡོད་པའི་གནས་ཚུལ་ཐོན་འདུག་ཅིང་། ཁམས་མི་ཉག་ཁུལ་ཏེ་ཉག་ཆུ་རྫོང་དང་རྟའུ་རྫོང་ཁོངས་སུའང་ཕྱི་ལོ་ ༢༠༠༧ ལོ་ཙམ་ནས་ས་གནས་ཀྱི་གནས་རི་ཁག་གཅིག་ནས་གཏེར་ཁ་སྔོག་འདོན་བྱས་པ་དང་། གློག་ཁང་གསར་རྒྱག་བྱ་རྒྱུ་ཟེར་བར་ཁ་གཡར་ཏེ་ཡུལ་མི་གནས་སྤོ་བྱེད་དུ་བཅུག་པར་ས་གནས་མི་མང་ནས་སྔ་རྗེས་ངོ་རྒོལ་ཤུགས་ཆེ་བྱས་པར་མཚོན་ཆ་བེད་སྤྱད་དེ་མི་མང་ལ་དྲག་གནོན་བྱས་པའི་གནས་ཚུལ་ཐོན་པ་མ་ཟད། ད་ཆ་ས་གནས་སུ་དམག་མི་ཁྱོན་ཆེ་བཀྲམ་སྟེ་དམ་བསྒྲགས་བྱེད་བཞིན་ཡོད་འདུག
ཁམས་འཇོ་མདའ་རྫོང་ཁོངས་སུ་ལྡན་ཆོས་འཁོར་དགོན་གྱི་དགེ་འདུན་པ་ཁག་གཅིག་ལ་ནག་ཉེས་ཁ་གསལ་མེད་པར་ཁྲིམས་ཆད་ལྗིད་པོ་བཏང་བ་དེར་དགོན་པའི་དགེ་འདུན་པ་དང་ས་གནས་མང་ཚོགས་མང་པོས་ངོ་རྒོལ་གྱི་རྣམ་འགྱུར་ཤུགས་ཆེ་བསྟན་པར་བརྟེན་དམག་མི་ཁྱོན་ཆེ་བཏང་བ་དང་ལྕགས་འཁྲབ་འཁོར་ལོ་སོགས་བཏང་སྟེ་ས་གནས་མང་ཚོགས་ལ་དམ་བསྒྲགས་ཤུགས་ཆེ་བྱས་དང་བྱེད་བཞིན་ཡོད་པ་སོགས་རྒྱ་ནག་གཞུང་གི་འབྲེལ་ཡོད་ཚན་པས་བོད་ལུགས་ས་ག་ཟླ་བའི་ནང་ས་གནས་ཁག་ཏུ་དམིགས་བསལ་དམ་བསྒྲགས་ཆེན་པོ་བྱེད་བཞིན་ཡོད་པ་མ་ཟད། ལྷག་པར་ལོ་ཤས་སྔོན་ནས་གཏེར་ཁ་སྔོག་འདོན་དང་ཡུལ་མི་གནས་སྤོ་སོགས་ལ་བོད་ཀྱི་ས་ཁུལ་མང་པོ་ཞིག་ནས་སྔ་རྗེས་སུ་ངོ་རྒོལ་བྱས་ཡོད་པར་ཐག་གཅོད་དྲང་བཞག་མ་བྱས་པ་དང་། ས་གནས་མང་ཚོགས་ཀྱི་དགོས་མཁོ་དང་མ་འཚམ་པའི་ལས་གཞི་མང་དག་ཅིག་སྤེལ་བཞིན་པར་མང་ཚོགས་ཀྱི་ངོ་རྒོལ་མུ་མཐུད་བྱེད་བཞིན་ཡོད་ལ། རྒྱ་ནག་གཞུང་ཕྱོགས་ནས་ཀྱང་དེ་དག་ལ་ཐག་གཅོད་གཙང་སེལ་མ་བྱས་པར་དྲག་ཤུགས་དང་དམ་བསྒྲགས་ཁོ་ན་བྱས་ཏེ་མང་ཚོགས་ཀྱི་བསམ་བློ་འགུག་ཐབས་བྱེད་ཀྱི་ཡོད་པའི་གནས་ཚུལ་དུ།།
