༢༠༠༩ ཕྱི་ཟླ་ ༦ ཚེས་ ༡ རེས་གཟའ་ཟླ་བ།
༄༅། །བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་ཞུས་ཏེ་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་འགྲན་བསྡུར་དེ་བཞིན་ཕྱི་ལོ་ ༢༠༠༩ ཕྱི་ཟླ་ ༥ ཚེས་ ༣༡ ནས་ཕྱི་ཟླ་ ༦ ཚེས་ ༩ བར་ཉིན་གྲངས་ ༡༠ རིང་རྡ་ས་བཞུགས་སྒར་བོད་ཁྱིམ་སློབ་གྲྭའི་རྩེད་ཐང་དུ་འགྲན་བསྡུར་ཞུ་འགོ་ཚུགས་ཡོད།
རྒྱལ་ཡུམ་ཆེན་མོའི་རྐང་རྩེད་སྤོ་ལོ་རྩེད་འགྲན་པའི་རུ་ཁག་བཅུ་དགུ་རྩེད་ཐང་དུ་འཁོད་བཞིན་པ།
དེ་ཡང་ཕྱི་ཟླ་ ༥ ཚེས་ ༣༡ ཉིན་གྱི་ཕྱེད་ཡོལ་ཆུ་ཚོད་ ༡།༤༥ ཐོག་རྡ་ས་བཞུགས་སྒར་རྡ་སྟེང་བོད་ཁྱིམ་རྐང་རྩེད་སྤོ་ལོའི་རྩེད་ཐང་དུ་ཚང་འཛོམས་ཀྱིས་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ཆིབས་སྒྱུར་བསྐྱངས་ཏེ་རྡ་སྟེང་བོད་ཁྱིམ་སློབ་གྲྭའི་རོལ་ཆ་རུ་ཁག་ནས་སྣེ་ཁྲིད་ཐོག་རྩེད་འགྲན་པའི་རུ་ཁག ༡༩ ཡོད་པ་རྣམས་ནས་རུ་སྒྲིག་སྟེ་རྩེད་ཐང་དུ་འཁོད་རྗེས་སེར་སྐྱ་མི་མང་ཚང་མས་སྐུ་བཞེངས་ཐོག་འཕགས་བོད་གཉིས་ཀྱི་རྒྱལ་གླུ་བཏང་བ་དང་དུས་བསྟུན་རྒྱ་ནག་གཞུང་གི་དྲག་གནོན་འོག་རང་མི་རིགས་དང་རྒྱལ་ཁབ་ཀྱི་དོན་དུ་རང་སྲོག་བློས་གཏོང་མཁན་ལྷག་བསམ་ཅན་གྱི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེ་མཚོན་ཆེད་མྱང་ངན་གུས་འདུད་སྐར་མ་གཅིག་ཞུས་མཚམས་རྩེད་འགྲན་པ་དང་གཟིགས་མོ་བས་བདེན་ཚིག་སྨོན་ལམ་འདོན་སྐུལ་གནང་།
དཔལ་རྒྱལ་བ་ཀརྨ་པ་རིན་པོ་ཆེ་མཆོག་ནས་རྩེད་འགྲན་པའི་རུ་ཁག་སོ་སོའི་སྟངས་འཛིན་པར་མཇལ་དར་དང་དུས་དེབ་གནང་བཞིན་པ།
རྩེད་རིགས་ཚོགས་པའི་ཚོགས་གཙོ་སོགས་ནས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་དང་། བོད་རྒྱལ་ཡོངས་རྩེད་འགྲན་ཚོགས་པའི་ཚོགས་གཙོ་སྐལ་བཟང་དོན་གྲུབ་ལགས་ནས་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་རྩེད་འགྲན་གྱི་ངོ་སྤྲོད་གནང་མཚམས་དཔལ་༸རྒྱལ་བ་ཀརྨ་པ་རིན་པོ་ཆེ་མཆོག་ནས་རྩེད་འགྲན་པ་རྣམས་ལ་རྩེད་འགྲན་དང་འབྲེལ་བའི་ལམ་སྟོན་བཀའ་སློབ་གནང་བསྟུན་རྩེད་ཐང་དུ་ཕེབས་ཏེ་རྐང་རྩེད་སྤོ་ལོ་རྩེད་འགྲན་པའི་རུ་ཁག་སོ་སོའི་སྟངས་འཛིན་པར་མཇལ་དར་གནང་སྟེ་སྐུ་དཔར་ཡང་ལྷན་སྒྲོན་གནང་ཡོད། དེ་ནས་རྡ་སྟེང་སློབ་ཕྲུག་ཁག་གཅིག་ནས་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་གླུ་དབྱངས་ཕུལ།
དེ་རྗེས་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་རྩེད་འགྲན་འགོ་འཛུགས་མ་བྱས་སྔོན་མཐུན་ལམ་དང་འབྲེལ་བའི་ཐོག་ནས་རྒྱ་གར་ཧི་མ་ཅལ་མངའ་སྡེ་གཞུང་ཀང་ར་རྫོང་གི་ཉེན་རྟོག་པའི་རུ་ཁག་དང་། བོད་ཁྱིམ་སློབ་གྲྭའི་རུ་ཁག་གཉིས་དབར་མཛའ་མཐུན་མཚོན་ཆེད་ཀྱི་འགྲན་བསྡུར་གྲུབ་མཚམས་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་འགྲན་བསྡུར་དངོས་གཞི་བདེ་སྐྱིད་གླིང་རྐང་རྩེད་སྤོ་ལོའི་རུ་ཁག་དང་། ཏཱ་མིལ་ན་ལྷུ་(Tamil Nadu) མངའ་སྡེའི་ (Trichy ) རུ་ཁག་གཉིས་དབར་འགྲན་བསྡུར་འགོ་བཙུགས་བྱས་ཡོད།
རྒྱ་གར་ཧི་མ་ཅལ་མངའ་གཞུང་ཀང་ར་རྫོང་གི་ཉེན་རྟོག་པའི་རྐང་རྩེད་སྤོ་ལོའི་རུ་ཁག་དང་། བོད་ཁྱིམ་སློབ་གྲྭའི་རྐང་རྩེད་སྤོ་ལོའི་རུ་ཁག་གཉིས་དབར་མཛའ་མཐུན་མཚོན་ཆེད་ཀྱི་འགྲན་བསྡུར་བྱེད་བཞིན་པ།
རྒྱལ་ཡུམ་ཆེན་མོའི་རྐང་རྩེད་སྤོ་ལོའི་རྩེད་འགྲན་ཐེངས་བཅོ་ལྔ་པའི་དབུ་འབྱེད་ཀྱི་མཛད་སྒོར་ཆེད་དུ་གདན་ཞུ་བྱས་པའི་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་གཙོས་ཁྲིམས་ཞིབ་པ་ཐུབ་བསྟན་བཀྲ་ཤིས་མཆོག་དང་། དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག དཔལ་ལྡན་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག དེ་བཞིན་ཤེས་རིག་དྲུང་ཆེ་སོགས་གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་སོགས་ཆེད་ཕེབས་གནང་བ་བཅས་ཀྱི་གནས་བསྡུས་སུ།།
