༢༠༠༩ ཕྱི་ཟླ་ ༦ ཚེས་ ༤ རེས་གཟའ་ལྷག་པ།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱི་ཟླ་ ༥ པའི་ནང་ཆབ་མདོ་ས་ཁུལ་འབྲེལ་ཡོད་ཁྲིམས་ཁང་ནས་འདི་ལོ་ཟླ་ ༤ པའི་ནང་འཇོ་མདའ་རྫོང་ཁོངས་སུ་ངོ་རྒོལ་ལས་འགུལ་ཁྲོད་སྔ་རྗེས་འཛིན་བཟུང་བྱས་པའི་འཇོ་མདའ་རྫོང་ཁོངས་སུ་ཡོད་པའི་ལྡན་མ་ཆོས་འཁོར་དགོན་གྱི་དགེ་འདུན་པ་ཁག་གཅིག་ལ་ཁྲིམས་ཐག་བཅད་པའི་གནས་ཚུལ་ཐོན་འདུག
རང་ལོ་ ༣༧ ལ་སོན་པའི་མཁན་པོ་བསྟན་འཛིན་རྒྱལ་མཚན་ལ་དུས་བཀག་བཙོན་འཇུག་ལོ་ ༡༥ དང་།
རང་ལོ་ ༥༠ ལ་སོན་པའི་དགེ་སྐོས་ཟུར་པ་ཉི་གཅེས་ལ་དུས་བཀག་བཙོན་འཇུག་ལོ་ ༡༥
རང་ལོ་ ༥༡ ལ་སོན་པའི་རྒན་ངག་དབང་བཀྲིས་ལ་དུས་བཀག་བཙོན་འཇུག་ལོ་ ༡༥
རང་ལོ་ ༣༠ ལ་སོན་པའི་གྲྭ་བཀྲ་རྡོར་ལ་དུས་བཀག་བཙོན་འཇུག་ལོ་ ༡༥
རང་ལོ་ ༤༠ ལ་སོན་པའི་དབུ་མཛད་རྒན་འཇམ་དབྱངས་ཤེས་རབ་ལ་དུས་བཀག་བཙོན་འཇུག་བཅུག་ལོ་ ༡༣
རང་ལོ་ ༣༦ སོན་པའི་དགེ་སྐོས་ཟུར་པ་ཚེ་རིང་དཔལ་ལྡན་དུས་བཀག་བཙོན་འཇུག་ལོ་ ༡༢ བཅས་དང་།
ལོ་བཅོ་ལྔ་བཙོན་འཇུག་གི་ཉེས་ཆད་ཕོག་པའི་རྒྱལ་གཅེས་པ་གྲྭ་བཀྲ་རྡོ་ལགས།
དེ་བཞིན་དབུ་མཛད་ལས་ཐོག་ཉི་མ་ཚེ་རིང་དང་། དགེ་སྐོས་ལྷུན་གྲུབ། དགེ་སྐོས་ཟུར་པ་བཀྲ་ཤིས་ཟླ་བ་བཅས་ལ་དུས་བཀག་བཙོན་འཇུག་ལོ ༡ དང་ཕྱེད་ཀའི་བར་བཅད་ཡོད་པ་རེད་འདུག གོང་གསལ་གྱི་དགེ་འདུན་པ་རྣམས་འདི་ལོ་ཕྱི་ཟླ་དང་པོའི་ནང་ལྡན་མ་ཆོས་འཁོར་དགོན་པའི་དགེ་འདུན་པས་རྒྱ་གཞུང་ལ་ངོ་རྒོལ་གྱི་ལས་འགུལ་ཤུགས་ཆེ་སྤེལ་བར་བརྟེན་སྐབས་དེར་དགེ་འདུན་པ་ཁག་གཅིག་འཛིན་བཟུང་བྱས་ཡོད་ཀྱང་། དགེ་འདུན་པ་ཁག་གཅིག་ཉེན་གཡོལ་ཆེད་བྲོས་བྱོལ་དུ་འགྲོ་དགོས་པའི་གནས་ཚུལ་ཐོན་འདུག
ལོ་བཅོ་ལྔ་བཙོན་འཇུག་གི་ཉེས་ཆད་ཕོག་པའིརྒྱལ་གཅེས་པ་མཁན་པོ་བསྟན་འཛིན་རྒྱལ་མཚན་ལགས།
མཁན་པོ་མཆོག་ཀྱང་གནས་སྐབས་ཉེན་གཡོལ་ཆེད་སྐྱེ་རྒུ་མདོར་ཕེབས་བཞུགས་གནང་ཡོད་ཀྱང་ཆབ་མདོ་ས་ཁུལ་ནས་ཆེད་མངགས་སྤྱི་བདེ་མི་སྣ་ ༡༥ ཙམ་བཏང་སྟེ་ས་གནས་དེ་ནས་ཕྱི་ཟླ་ ༤ ཚེས་ ༡ ཉིན་འཛིན་བཟུང་བྱས་ཡོད་པ་མ་ཟད། དེ་མིན་ལྡན་མ་ཆོས་འཁོར་དགོན་གྱི་དགེ་འདུན་པ་གཞན་ཡང་འཛིན་བཟུང་བྱས་ཡོད་པའི་གནས་ཚུལ་ཐོན་འདུག
ལོ་གཅིག་བཙོན་འཇུག་གི་ཉེས་ཆད་ཕོག་པའིརྒྱལ་གཅེས་པ་དགེ་སྐོས་ལྷུན་གྲུབ་ལགས་དང་དབུ་མཛད་ཉི་མ་ཚེ་རིང་ལགས།
