ཟླ་བ་ ༣ ཚེས ༡༢ ༢༠༡༨
Published By ngawang thokmey

༢༠༡༨ ཟླ་ ༣ ཚེས་ ༡༢ རེས་གཟའ་ཟླ་བ།

 

༄༅། །བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༩ ཉིན་མོར་ཨི་སི་ཏོ་ནི་ཡ་ Estonia དང་། ལ་ཏི་ཝི་ཡ། Latvia ལི་ཐུ་ཝེ་ནི་ཡ་ Lithuania བཅས་ཡུ་རོབ་རྒྱལ་ཁབ་གསུམ་གྱི་གྲོས་ཚོགས་འཐུས་མི་ཉི་ཤུ་ཐམ་པས།  བོད་མི་ཚོས་ཞུམ་པ་མེད་པའི་སྙིང་སྟོབས་ཀྱི་ཐོག་ནས་བོད་ཀྱི་ཆོས་དང་རིག་གཞུང་། སྐད་ཡིག  ཁོར་ཡུག་དང་བཅས་པ་སྲུང་སྐྱོབ་བྱ་རྒྱུ་མ་ཟད། ཆབ་སྲིད་དང་སྤྱི་ཚོགས་ཀྱི་རང་དབང་བསྐྱར་གསོ་ཡོང་ཐབས་སླད་ད་བར་འབད་བརྩོན་གནང་དང་གནང་མུས་ལ་རྒྱབ་སྐྱོར་དང་གདུང་སེམས་མཉམ་སྐྱེ་ཞུ་སླད་བོད་དོན་རྒྱབ་སྐྱོར་གྱི་བསྒྲགས་གཏམ་ཞིག་སྤེལ་བའི་ནང་འཁོད་དོན། 

རྒྱ་ནག་གཞུང་གིས་བོད་ནང་མུ་མཐུད་བོད་མི་ཚོའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པ་དེར་ང་ཚོས་མཐའ་གཅིག་ཏུ་ངོ་རྒོལ་ཡོད། རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པར་བརྟེན་བོད་ནང་མུ་མཐུད་རང་ལུས་མེར་སྲེག་གི་ལམ་ནས་བོད་མི་ཚོས་རྒྱ་ནག་གཞུང་ལ་ཞི་རྒལ་རྔམ་སྟོན་བྱེད་བཞིན་ཡོད། གནས་སྟངས་འདི་ནི་ཧ་ཅང་བློ་ཕམ་དང་སེམས་འཚབ་བྱ་དགོས་པ་ཞིག་རེད། 

དཔེར་ན་ཕྱི་ལོ་ ༢༠༡༨ ཟླ་ ༣ ཚེས་ ༧ ཉིན་གྱི་བོད་ནང་གི་ཕྱེད་ཡོལ་ཆུ་ཚོད་ ༣།༣༠ ཡས་མས་སུ་བོད་མདོ་སྨད་རྔ་པ་རྨེའུ་རུ་མ་ཡུལ་ཚོའི་རང་ལོ་ ༤༤ ཡས་མས་ཅན་གྱི་ཚེ་ཁོ་ལགས་ཀྱིས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ལ་ཞི་རྒོལ་རྔམ་སྟོན་ཆེད་རང་ལུས་མེར་བསྲེགས་གནང་སྟེ་འདས་གྲོངས་སུ་ཕྱིན་པ་དེར་ང་ཚོར་སེམས་འཚབ་ཧ་ཅང་ཡོང་བཞིན་འདུག ཅེས་གསུངས།

གཞན་ཡང་བོད་ནང་ཕྱི་རྒྱལ་ཡུལ་མི་སོགས་འགྲོ་བསྐྱོད་བྱ་རྒྱུར་དམ་བསྒྲགས་ཧ་ཅང་བྱེད་བཞིན་པ་དེར་སེམས་འཚབ་ཡོད་སྐོར་དང་སྦྲགས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཆུང་གི་ཚོགས་མི་རྣམས་ལ་རང་དབང་ཐོག་ནས་དངོས་ཐོག་བདེན་འཚོལ་བྱ་རྒྱུའི་མཐུན་འགྱུར་བསྐྲུན་དགོས་པ་འཁོད།

ཕྱོགས་མཚུངས་ཀུན་གཟིགས་པཎ་ཆེན་རིན་པོ་ཆེ་མཆོག་གིས་གཙོས་བོད་མི་ཆབ་སྲིད་བཙོན་པ་ཡོངས་རྫོགས་མགྱོགས་མྱུར་གློད་བཀྲོལ་གཏང་དགོས་པའི་དགོས་འདུན་ཤུགས་ཆེ་བཏོན་འདུག དཔེར་ན་ཆབ་སྲིད་བཙོན་པ་བཀྲ་ཤིས་དབང་ཕྱུག་ལགས་དང་བློ་བཟང་འཇམ་དབྱངས་ལགས། བློ་བཟང་དཀོན་མཆོག་ལགས། སྒྲོལ་མ་སྐྱབས་ལགས། ཀརྨ་བསམ་གྲུབ་ལགས། ཡེ་ཤེས་ཆོས་སྒྲོན་ལགས། བོན་སྒོ་སྐྱིད་བཅས་དངོས་སུ་མིང་འདོན་གནང་བ་མ་ཟད། བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་།   བོད་རྒྱ་གཉིས་ཀྱི་གནད་དོན་སེལ་ཆེད་སྤྱི་ནོར་༸གོས་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དོན་དམ་གྱི་གྲོས་མོལ་གནང་འགོ་འཛུགས་དགོས་པའི་རྒྱ་ནག་གཞུང་ལ་འབོད་སྐུལ་ཡང་ཞུས་འདུག་པ་བཅས། །

 

 

 

Share with your friends










Submit