ཟླ་བ་ ༣ ཚེས ༡༣ ༢༠༡༨
Published By Bhara Yeshi Kundak

ཕྱི་ལོ་ ༢༠༡༨ ཟླ་ ༣ ཚེས་ ༡༣ རེས་གཟའ་མིག་དམར།


༄༅། །བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་སུད་སི་དང་སྦེལ་ཇམ་བཅས་སུ་ཕྱི་ལོ་ ༢༠༡༨ ཟླ་ ༣ ཚེས་ ༢ ནས་ཕྱི་ཚེས་ ༡༡ བར་ཉིན་གྲངས་ ༡༠ རིང་གཞུང་འབྲེལ་ཕྱོགས་ཕེབས་གནང་སྐབས་ལས་དོན་གཙོ་བོ་སུད་སིར་གསུམ་བཅུ་དུས་དྲན་ལས་འགུལ་ཆེན་མོའི་གསར་འགོད་གསལ་བསྒྲགས་དང་། བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༩ ཉིན་མོའི་མཛད་སྒོ་དངོས་གཞིར་མཉམ་ཞུགས། དེ་བཞིན་ཇི་ནི་ཝར་རྒྱལ་ཚོགས་ཀྱི་ཚོགས་འདུ་འཚོགས་བཞིན་པའི་གོ་སྐབས་དང་བསྟུན་རྒྱལ་ཚོགས་ནང་བོད་ཀྱི་སྐོར་ངོ་སྤྲོད་སྤྱི་དང་། ལྷག་པར་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་པ་རྒྱལ་མཚན་ལགས་ཀྱིས་བོད་ཀྱི་ཁོར་ཡུག་སྐོར་གཏམ་བཤད་དང་དྲི་བ་དྲིས་ལན་གྱི་ལས་རིམ་བསྐྱངས་ཐུབ་པ་བྱུང་ཡོད།


ཕྱོགས་མཚུངས་བོད་དོན་རྒྱབ་སྐྱོར་བ་དང་མཇལ་འཕྲད་ཀྱིས་བོད་དོན་ཐོག་ངོ་སྤྲོད་གསུང་བཤད་དང་། བོད་རིགས་མི་མང་འདུ་བསྐོང་གིས་གཉིས་སྨན་དབུ་མའི་ལམ་གྱི་ངོ་བོ་དང་། བྱུང་རིམ། གལ་གནད་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རླབ་ཆེན་གྱི་མཛད་འཕྲིན་ཁག བོད་མི་ནང་ཁུལ་མཐུན་ལམ་དང་ཆིག་སྒྲིལ་དགོས་གལ་སྐོར། བོད་མིའི་སྒྲིག་འཛུགས་ཀྱི་ངོ་བོ་དང་ལས་འགན། ལས་དོན་གནང་ཕྱོགས་སྐོར་སྤྱི་དང་། ལྷག་པར་དཔལ་འབྱོར་ལས་ཁུངས་ཀྱི་ལས་དོན་སྐོར། བོད་མི་ཚང་མས་དཔྱ་ཁྲལ་ལག་དེབ་བཟོ་དགོས་པའི་གནད་འགག་དང་དཔྱ་དངུལ་ཆད་ལྷག་མེད་པར་འབུལ་དགོས་པའི་ལམ་སྟོན། བོད་དོན་ལ་གདུང་སེམས་མཉམ་སྐྱེ་མཚོན་སླད་ཕྱི་རྒྱལ་བ་ངོ་ཤེས་པ་ནང་ཁུལ་ལག་དེབ་སྔོན་པོའི་སྐོར་གོ་རྟོགས་སྤེལ་དགོས་པ་སོགས་ལམ་སྟོན་གནང་བ་དང་ཆབས་ཅིག སུད་སི་དང་སྦེལ་ཇམ་སོ་སོར་ཉིན་གྲངས་གཉིས་རེར་དཔྱ་ཁྲལ་ལག་དེབ་བཟོ་སླད་དཀའ་ངལ་ཡོད་མཁན་རྣམས་དང་ཐུག་འཕྲད་ཀྱིས་དཀའ་ངལ་མང་དག་ཅིག་སེལ་ཐུབ་པ་བྱུང་ཡོད།


དཔྱ་ཁྲལ་ལག་དེབ་དང་འབྲེལ་བའི་ལས་དོན་སླད་དཔལ་འབྱོར་ལས་ཁུངས་ཀྱི་དཔྱ་དེབ་གྲངས་ཐོ་ཚན་པའི་འགན་འཛིན་སྐལ་བཟང་ཆོས་སྒྲོན་ལགས་ལྷན་བཅར་ཞུས་ཡོད་པ་བཅས།།

དཔལ་འབྱོར་བཀའ་བློན་མཆོག་གིས་སྦེལ་ཇམ་ཁུལ་གྱི་བོད་མི་རྣམས་ལ་གསུང་བཤད་གནང་སྐབས།

སུད་སིའི་གྲོང་ཁྱེར་ཇི་ནི་ཝའི་ནང་གཞི་རྒྱ་རྒྱ་ཆེ་བའི་ལས་འགུལ་སྤེལ་སྐབས།

དཔལ་འབྱོར་བཀའ་བློན་མཆོག་གིས་ཇི་ནི་ཝར་རྒྱལ་ཚོགས་ནང་བོད་དོན་སྐོར་ངོ་སྤྲོད་གནང་བཞིན་པ།

Share with your friends










Submit