ཟླ་བ་ ༢ ཚེས ༩ ༢༠༡༨
Published By ngawang thokmey

༢༠༡༨ ཟླ་ ༢ ཚེས་ ༩ རེས་གཟའ་པ་སངས།

དཔལ་ལྡན་སྲིད་སྐྱོང་མཆོག་དང་ཨིན་ཁ་ཐ་རང་དབང་ཆབ་སྲིད་ཚོགས་པའི་ Inkatha Freedom Party ཚོགས་གཙོ་རྒྱལ་སྲས་མོན་གྷོ་སུ་ཐེ་བྷུ་ཐེ་ལེ་ཛི་ Mangosuthu Buthelezi མཆོག

 

༄༅། །དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ཚེས་ ༨ ཉིན་ལྷོ་ཨ་ཕི་རི་ཀའི་གྲོང་ཁྱེར་ཀེབ་ཊའོན་ Cape Town ནང་རྟེན་གཞི་བྱས་པའི་ཨུ་བྷུན་ཏུ་ལུས་སེམས་བདེ་ཐབས་ཀྱི་བསྟི་གནས་ཁང་ Ubuntu Wellness Centre དུ་ཕེབས་ཏེ་ཞི་བདེའི་མེ་ལྕེའི་ Peace Torch གོམ་འགྲོས་ལས་འགུལ་དབུ་འཛུགས་གནང་འདུག

སྐབས་དེར་ལྷོ་ཨ་ཕི་རི་ཀ་ཨིན་ཁ་ཐ་རང་དབང་ཆབ་སྲིད་ཚོགས་པའི་ Inkatha Freedom Party ཚོགས་གཙོ་རྒྱལ་སྲས་མོན་གྷོ་སུ་ཐེ་བྷུ་ཐེ་ལེ་ཛི་ Mangosuthu Buthelezi མཆོག་ཀྱང་ཕེབས་འདུག་པ་མ་ཟད། དབུ་ཁྲིད་རྣམ་གཉིས་ཀྱིས་ཞི་བདེའི་མེ་ལྕེ་ཞལ་ཕྱེ་གནང་གྲུབ་བསྟུན་བོད་མི་རྣམས་ཀྱིས་མེ་ལྕེ་ལག་ཏུ་ཐོགས་ནས་བོད་དོན་ཆེད་ཞི་བའི་གོམ་འགྲོས་ཀྱི་ལས་འགུལ་སྤེལ་འདུག

སྤྱིར་མེ་ལྕེའི་ལས་འགུལ་དབུ་འཛུགས་གནང་མཁན་ཡུལ་དེའི་བོད་དོན་རྒྱབ་སྐྱོར་བ་སྐུ་ཞབས་ཨ་ཡན་མེག་ཕར་ལེན་ Ian MacFarlane ལགས་ཀྱི་གཞུང་འབྲེལ་མིན་པའི་ལྷོ་ཨ་ཕི་རི་ཀའི་བོད་དོན་རྒྱབ་སྐྱོར་ཚོགས་པ་ SA Friends of Tibet ཞེས་པ་དེ་ཡིན་འདུག་ཅིང་། མཛད་སྒོའི་སྐབས་ཨིན་ཁ་ཐ་རང་དབང་ཆབ་སྲིད་ཚོགས་པའི་གྲོས་ཚོགས་འཐུས་མི་སྐུ་ཞབས་ན་རེནྜ་སིངྒ་ Mr Narend Singh མཆོག་དང་། ལྕམ་སྐུ་ལེ་ཛེལ་ཝེན་ཌར་མར་ཝེ་ Ms Liezl van der Merwe མཆོག སྐུ་ཞབས་རུ་སེལ་ Inkosi Russel Cebekhulu མཆོག རང་དབང་ཆབ་སྲིད་ཚོགས་པའི་ཚོགས་གཞོན་སྐུ་ཞབས་ཨིན་ཀོ་སི་བྷུ་ཐེ་ལེ་ཛི་ Inkosi Elphas Buthelezi མཆོག དེ་བཞིན་རྒྱལ་ཡོངས་ན་གཞོན་ཨིན་ཁ་ཐ་རང་དབང་ཆབ་སྲིད་ཚོགས་པའི་ཚོགས་གཙོ་སྐུ་ཞབས་ཁུ་ལེ་ཀོ་ཧེན་གྷ་ Mr Mkhuleko Hlengwa ལགས།  དེ་བཞིན་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་བཅས་ཕེབས་འདུག

སི་ཊེ་ལེན་བྷོཤི་མཐོ་སློབ་ Stellenbosch University ཀྱི་ཁྲིམས་ལུགས་རིག་པའི་སློབ་མ་རྣམས་ལ་གསུང་བཤད་གནང་བ།

 

དེ་ཡང་མཛད་སྒོའི་གསུང་བཤད་གནང་སྐབས་རྒྱལ་སྲས་མོན་གྷོ་སུ་ཐེ་བྷུ་ཐེ་ལེ་ཛི་ Mangosuthu Buthelezi མཆོག་གིས། ལྷོ་ཨ་ཕི་རི་ཀའི་རྩ་ཁྲིམས་ནང་འགྲོ་བ་མིའི་ཐོབ་ཐང་སྲུང་སྐྱོབ་དགོས་པ་གསལ་ཡོད་སྟབས། རྩ་ཁྲིམས་ཀྱི་དགོངས་དོན་ལྟར་ང་ཚོས་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་འགུལ་ལའང་རྒྱབ་སྐྱོར་བྱེད་དགོས་པ་ཞིག་རེད། བོད་མིར་རྒྱབ་སྐྱོར་བྱ་རྒྱུ་ཟེར་བ་ནི་མི་རིགས་ཤིག་རྩ་མེད་དུ་འགྲོ་རྒྱུའི་ཉེན་ཁ་ལས་སྐྱོབ་ཐབས་བྱས་པ་ཞིག་རེད།  འགྲོ་བ་མིའི་ཐོབ་ཐང་གི་གནད་དོན་ནི་རྒྱལ་ཁབ་བྱེ་བྲག་པ་ཞིག་གི་གནད་དོན་ཙམ་མིན་པར་འཛམ་གླིང་སྤྱིའི་མི་རིགས་ཡོངས་ལ་ཁྱབ་པའི་གནད་དོན་ཞིག་ཆགས་ཡོད། དེར་བརྟེན་ང་ཚོ་འགྲོ་བ་མི་རིགས་གཅིག་གྱུར་ཡིན་པའི་ཆ་ནས་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ལ་རྒྱབ་སྐྱོར་བྱ་རྒྱུ་ནི་འགྲོ་བ་མི་རིགས་སྤྱི་ལ་འཁྲིད་པའི་ལས་འགན་ཞིག་ཀྱང་ཆགས་ཡོད། ཅེས་གསུང་བཤད་གནང་།

སྐབས་དེར་དཔལ་ལྡན་སྲིད་སྐྱོང་མཆོག་གིས་ལྷོ་ཨ་ཕི་རི་ཀའི་ཡུལ་གྱི་རང་དབང་དང་འདྲ་མཉམ། དྲང་བདེན་སོགས་གཞི་རྩའི་ལྟ་གྲུབ་ཀྱི་རིན་ཐང་དེ་དག་སྲུང་སྐྱོབ་སླད་ལོ་རྒྱུས་ནང་བློས་གཏོང་ཇི་ཙམ་གནང་ཡོད་པ་དང་། དེ་བཞིན་བོད་ཀྱི་གནད་དོན་སྐོར་གསུང་སྐབས་བོད་མཐོ་སྒང་དེ་ཨེ་ཤིའི་མི་འབོར་ཐེར་འབུམ་མང་པའི་འཚོ་བའི་རྟེན་གཞི་འཐུང་ཆུའི་འབྱུང་ཁུངས་ཆགས་ཡོད་པ་དང་།  ལྷོ་ཨ་ཕི་རི་ཀའི་ནང་དེང་སྐབས་འཐུང་ཆུ་མ་འདང་བའི་དཀའ་ངལ་མགྱོགས་མྱུར་སེལ་ཐུབ་པའི་རེ་སྨོན་ཡོད་སྐོར་གསུངས།

ཉིན་རྒྱབ་ཏུ་དཔལ་ལྡན་སྲིད་སྐྱོང་མཆོག་གིས་སི་ཊེ་ལེན་བྷོཤི་མཐོ་སློབ་ Stellenbosch University ནང་གི་ཁྲིམས་ལུགས་རིག་པའི་ཚན་པ་ནས་མགྲོན་འབོད་ལྟར། དོན་གཉེར་ཅན་གྱི་སློབ་ཕྲུག་ཁག་གཅིག་ལ་གསུང་བཤད་གནང་འདུག སྤྱིར་ཡུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་མཐོ་སློབ་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་ཕེབས་ན་རྩ་བ་ནས་མ་འགྲིག་པའི་ཉེན་བརྡ་བཏང་བ་བརྒྱུད་གནོན་ཤུགས་ཧ་ཅང་སྤྲད་ཡོད་ཀྱང་། མཐོ་སློབ་དེས་རྒྱ་ནག་གཞུང་གི་གནོན་ཤུགས་ལ་བརྩི་མེད་བཏང་ནས་ཐེངས་འདིར་དཔལ་ལྡན་སྲིད་སྐྱོང་མཆོག་མགྲོན་འབོད་ཞུས་པ་མ་ཟད།  དགེ་ལས་སློབ་མ་རྣམས་ལ་གསུང་བཤད་གནང་རྒྱུའི་གོ་སྐབས་ཀྱང་ཕུལ་འདུག  དཔལ་ལྡན་སྲིད་སྐྱོང་མཆོག་གིས་སྐར་མ་ ༣༠ རིང་ཡུལ་དེའི་གཞི་རྩའི་བཟང་པོའི་རིན་ཐང་སྲུང་སྐྱོབ་དགོས་གལ་དང་། ད་ལྟའི་བོད་ནང་གི་ཛ་དྲག་གནས་སྟངས་སྐོར་གསུང་བཤད་དང་དྲི་བ་ཁག་ལ་ལན་འདེབས་གནང་སྐབས་ཚོགས་ཁང་གི་ཕྱི་རོལ་དུ་རྒྱ་ནག་གཞུང་ཚབ་ཁང་གི་གོ་སྒྲིག་འོག་རྒྱ་ནག་སློབ་ཕྲུག་དང་ཁུལ་དེར་གནས་སྡོད་རྒྱ་རིགས་ཁག་གཅིག་གིས་ལག་ཏུ་རྒྱ་ནག་གཅིག་གི་སྲིས་བྱུས་དང་། ཁ་བྲལ་གྱི་ལས་འགུལ་མཚམས་འཇོག་དགོས་ཞེས་སོགས་འཁོད་པའི་འཕྲེད་དར་ལག་ཏུ་འཁྱེར་ནས་གསུང་བཤད་གནང་སའི་ཚོགས་ཁང་གི་ཕྱི་རོལ་དུ་ངོ་བརྒོལ་སྐད་འབོད་ཤུགས་ཆེ་བྱས་འདུག འོན་ཀྱང་བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་གཞིར་བཟུང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞི་འོག་མིང་དོན་མཚུངས་པའི་རང་སྲིད་རང་སྐྱོང་ལས་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད།  དེ་ནི་རྒྱ་ནག་གཅིག་གི་སྲིད་བྱུས་དང་བདག་དབང་ལ་རྒྱབ་འགལ་ཆགས་ཀྱི་མེད།

 

དཔལ་ལྡན་སྲིད་སྐྱོང་མཆོག་གིས་མཐོ་སློབ་ཀྱི་སློབ་དཔོན་དང་དགེ་ལས་ཡོངས་ནས་རྒྱ་ནག་གཞུང་གི་གནོན་ཤུགས་ལ་བརྩི་མེད་ཀྱིས་ཐེངས་འདིར་དཔལ་ལྡན་སྲིད་སྐྱོང་མཆོག་མགྲོན་འབོད་ཞུས་པར་ཐུགས་རྗེ་ཆེ་ཞུས་གནང་ཡོད།

ཕྱི་དྲོར་དཔལ་ལྡན་སྲིད་སྐྱོང་མཆོག་ལྷོ་ཨ་ཕི་རི་ཀའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ནེལ་སོན་མན་ཌེ་ལ་ (Nelson Mandela) མཆོག་གིས་གཙོས་ཆབ་སྲིད་བཙོན་པ་བརྒྱ་ཕྲག་ལྷག་ཀྱིས་ལྷོ་ཨ་ཕི་རི་ཀའི་མི་མང་གི་ཐོབ་ཐང་དང་རང་དབང་སླད་རང་གི་ལུས་སྲོག་དང་ནང་མི་ཚུན་ཆད་བློས་བཏང་གནང་བར་གུས་བཀུར་ཞུ་ཆེད་རོ་བྷེན་ཨ་ཡི་ལེན་ཌིར་  Robben Island ཆེད་ཕེབས་གནང་ཡོད།།

Share with your friends










Submit