ཟླ་བ་ ༡༡ ཚེས ༢༤ ༢༠༡༧
Published By ngawang thokmey

༢༠༡༧ ཟླ་ ༡༡ ཚེས་ ༢༤ རེས་གཟའ་པ་སངས།

༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༢༤ རེས་གཟའ་པ་སངས་ཉིན་གྱི་ཉིན་གུང་ཆུ་ཚོད་ ༡༢ཿ༣༠ ཙམ་ལ་བཞུགས་སྒར་དུ་༸ཞབས་སོར་འཁོད་གནང་མཛད། གྷ་གལ་གནམ་ཐང་དུ་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་།   ཚོགས་གཞོན་ཨཱཅཱརྱ་ཡེ་ཤེས་ཕུན་ཚོགས་མཆོག དེ་བཞིན་སྤྱི་འཐུས་རྒྱུན་ལས་དགེ་བཤེས་སྨོན་ལམ་མཐར་ཕྱིན་ལགས།  རྡ་ས་ས་གནས་འགོ་འཛིན་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག དེ་རྗེས་གནམ་ཐང་ནས་བཞུགས་སྒར་དུ་ཆིབས་སྒྱུར་སྐྱོང་སྐབས་ཕེབས་ལམ་དུ་བོད་མི་གཙོ་བོར་གྱུར་བའི་དད་ལྡན་སེར་སྐྱ་མང་ཚོགས་རྣམས་ཀྱིས་དགའ་དད་སྤྲོ་གསུམ་གྱི་སྒོ་ནས་ཕེབས་བསུ་ཞུས་འདུག

ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཟླ་ ༡༡ ཚེས་ ༡༧ ཉིན་ལྡི་ལིར་༸ཞབས་སོར་འཁོད་རྗེས་ཕྱི་ཚེས་ ༡༨ ཉིན་ཁུལ་དེར་རྟེན་གཞི་བྱས་པའི་སལ་བན་ Gyan Devi Salwan Public School གཞུང་གི་སློབ་གྲྭར་ཀུན་ཁྱབ་འགན་ཁུར་ཐོག་བཀའ་སློབ་སྩལ།

ཕྱི་ཚེས་ ༡༩ ཉིན་ལྷོ་ཕྱོགས་ལྡི་ལིར་རྟེན་གཞི་བྱས་པའི་བྱིས་པ་སྲུང་སྐྱོབ་ཐེབས་རྩ་ཁང་སི་མ་ཡིལ་ Smile Foundation ཞེས་པར་ཆིབས་སྒྱུར་བསྐྱངས་ཏེ་བླང་དོར་བཀའ་སློབ་སྩལ་བ་མ་ཟད། ཐེབས་རྩ་ཁང་ལ་ཧིན་སྒོར་འབུམ་ ༡༢༥ གསོལ་སྩལ་མཛད།

དགའ་ལྡན་ཕོ་བྲང་ཡིག་ཚང་གི་ཨིན་ཡིག་གསར་འགོད་པ་སྐུ་ཞབས་ཇེ་རི་མི་ལགས་དང་ཁོང་གི་ནང་མི་བཅས་ལ་མཇལ་ཁ་སྩལ་བ།

དེ་རྗེས་ཕྱི་ཚེས་ ༢༡ ཉིན་ལྡི་ལི་ནས་མཁའ་ལམ་བརྒྱུད་ཨོ་ཌི་སའི་ Orissa རྒྱལ་ས་བྷུབ་ནེཤྭར་ Bhubaneswar ཆིབས་སྒྱུར་གྱིས་ཁུལ་དེར་རྟེན་གཞི་བྱས་པའི་སྤྱི་ཚོགས་ཚན་རིག་བསྟི་གནས་ཁང་གྲགས་ཅན་ Kalinga Institute of Social Sciences (KISS) དུ་ཆིབས་སྒྱུར་བཀའ་དྲིན་བསྐྱངས་ནས་དགེ་ལས་སློབ་ཕྲུག་ ༢༥༠༠༠ བརྒལ་བར་བཀའ་སློབ་སྩལ་བ་མ་ཟད། བསྟི་གནས་ཁང་གི་འཕྲུལ་རིགས་སློབ་གྲྭའི་དགེ་ལས་སློབ་མ་རྣམས་ལ་རྒྱ་གར་གནའ་རབས་ལེགས་བཤད་བསླར་གསོའི་སྐོར་བཀའ་སློབ་སྩལ། དེ་བཞིན་ཕུན་ཚོགས་གླིང་བོད་མིའི་གཞིས་ཆགས་ཀྱི་བོད་མི་མཇལ་བཅར་བ་རྣམས་ལ་བཀའ་སློབ་སྩལ།

ཕྱི་ཚེས་ ༢༣ ཉིན་༸གོང་ས་མཆོག་ནུབ་བྷེང་གལ་གྱི་རྒྱལ་ས་ཀོལ་ཀ་ཊར་ Kolkata རྒྱ་གར་ཚོང་པའི་ལྷན་ཚོགས་ Indian Chamber of Commerce ནས་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་རྒྱ་གར་གནའ་རབས་ཀྱི་རིག་གནས་སླར་གསོའི་ Revival of Ancient Indian Knowledge སྐོར་བཀའ་སློབ་སྩལ་གནང་མཛད་པ་མ་ཟད། ས་གནས་བོད་རིགས་ཁ་ཆེའི་སློབ་ཕྲུག་དང་ཚོང་པ་སོགས་ལའང་མཇལ་ཁ་དང་བཀའ་སློབ་སྩལ་བ་སོགས་མཛད་འཕྲིན་ཁག་ཡོངས་སུ་ལེགས་གྲུབ་རྗེས་ཕྱི་ཚེས་ ༢༤ ཉིན་བཞུགས་སྒར་དུ་༸ཞབས་སོར་བདེ་བར་འཁོད་པ་བཅས།།

Share with your friends










Submit