མདུན་ཤོག » Flash Mobile » བརྒྱུད་ལམ་གཞན་གྱི་གསར་གནས། »

རྒྱ་གཞུང་གིས་གསེར་རྟ་ལྔ་རིག་ནང་བསྟན་སློབ་གླིང་དུམ་བུ་གཉིས་སུ་ཕྱེ་ནས་འགན་འཛིན་དམར་ཤོག་ལས་བྱེད་བསྐོ་གཞག་བྱ་རྒྱུའི་གསལ་བསྒྲགས་སྤེལ་ཡོད་པའི་གནས་ཚུལ་ཐོན།

Share with your friends










Submit

༢༠༡༧ ཟླ་ ༨ ཚེས་ ༢༥ རེས་གཟའ་པ་སངས།

 

༄༅། །བརྒྱུད་ལམ་གཞན་གྱིས་གནས་ཚུལ་སྤེལ་དོན་ལྟར་ན། ཉེ་ལམ་རྒྱ་གཞུང་གིས་སྔར་ཡོད་བོད་གསེར་རྟ་ལྔ་རིག་ནང་བསྟན་སློབ་གླིང་གི་འཛིན་སྐྱོང་གནང་ཕྱོགས་ལ་སྔར་མེད་བསྒྱུར་བཅོས་ཀྱིས་ལྔ་རིག་ནང་བསྟན་སློབ་གླིང་དང་བླ་རུང་ཆོས་སྒར་གཉིས་པོ་དགོན་པ་ལོགས་སུ་དབྱེ་རྒྱུ་དང་། དོ་ལམ་གྱི་ལས་ཁུངས་ལོགས་སུ་བཟོ་སྟེ་འགན་འཛིན་དམར་ཤོག་ཚོགས་པའི་ལས་བྱེད་བསྐོ་གཞག་བྱ་རྒྱུས་གཙོས་ཕྱོགས་ཡོངས་ནས་དོ་དམ་བྱེད་ཕྱོགས་ཀྱི་སྒྲིག་གཞིའི་དོན་ཚན་ཁག་ཅིག་གཏན་འབེབས་བྱས་འདུག

གླིང་དང་དགོན་པ་གཉིས་ཀྱི་དོ་དམ་ལས་ཁུངས་ཀྱི་འགན་འཛིན་དུ་རྒྱ་ནག་དམར་ཤོག་ཚོགས་པའི་ལས་བྱེད་ཚོགས་མི་དྲུག་བསྐོ་གཞག་བྱ་གཏན་འཁེལ་ཡོད་པ་དེ་ལྟར་ཡང་། ཟླ་བ་འདིའི་ཚེས་ ༢༠ ཉིན་དཀར་མཛེས་ཁུལ་གྱིི་དམར་ཤོག་ཚོགས་པའི་ལས་བྱེད་གོ་སྒྲིག་ཚན་པའི་མིང་ཐོག་ནས་འགོ་ཁྲིད་ལས་བྱེད་དེ་དག་གི་མིང་ཕྱིར་བསྒྲགས་བྱས་འདུག  དེའང་ད་ལྟ་རྒྱ་ནག་དམར་ཤོག་ཚོགས་པའི་ཚོགས་མི་ཡིན་པ་དང་། དཀར་མཛེས་ཁུལ་སྤྱི་བདེ་ལས་ཁུངས་ཀྱི་ཚོགས་མིའི་ཨུ་ཡོན། དཀར་མཛེས་ཁུལ་སྤྱི་བདེ་ལས་ཁུངས་ཀྱི་འགན་འཛིན་གཞོན་པ་བཅས་ཀྱི་འགན་ཁུར་མུས་ཡིན་པ་བོད་མི་བཀྲ་སྦེ་ཟེར་བ་ཞིག་གསེར་རྟ་ལྔ་རིག་ནང་བསྟན་སློབ་གླིང་གི་དམར་ཤོག་ཚོགས་པའི་འགན་འཛིན་དང་སློབ་གླིང་གི་འགན་འཛིན་ལ་བསྐོ་གཞག་བྱ་རྒྱུ་མ་ཟད། རྒྱ་ནག་དམར་ཤོག་ཚོགས་པའི་ཚོགས་མི་དང་ད་ལྟ་གསེར་རྟ་རྫོང་དམར་ཤོག་ཚོགས་པའི་འགོ་ཁྲིད་བོད་མི་བསོད་ནམས་ཆོས་འཕེལ་ཟེར་བ་ཞིག་བླ་རུང་སྒར་དོ་དམ་ཨུ་ཡོན་ལྷན་ཁང་གི་རྩ་འཛུགས་ཀྱི་འགོ་ཁྲིད་དང་ཤེས་ཡོན་འགན་འཛིན་དུ་བསྐོ་གཞག་བྱ་རྒྱུ། དཀར་མཛེས་བོད་རིིགས་རང་སྐྱོང་ཁུལ་འཐབ་ཕྱོགས་གཅིག་གྱུར་གྱི་འགན་འཛིན་གཞོན་པ་དང་མི་རིགས་ཆོས་ལུགས་དོ་དམ་ཨུ་ཡོན་ལྷན་ཁང་ཟེར་བའི་འགན་འཛིན་དོན་གྲུབ་བཀྲ་ཤིས་ཟེར་བ་ཞིག་གསེར་རྟ་ལྔ་རིག་ནང་བསྟན་སློབ་གླིང་གི་དམར་ཤོག་ཚོགས་པའི་འགན་འཛིན་གཞོན་པ་དང་སློབ་གླིང་གི་འགན་འཛིན་གཞོན་པར་བསྐོ་གཞག་བྱ་རྒྱུ། དེ་བཞིན་རྒྱ་ནག་དམར་ཤོག་ཚོགས་པའི་ཚོགས་མི་ཡིན་པ་བཀྲ་ཤིས་ཚེ་རིང་དང་བསོད་ནམས་དབྱངས་འཛོམས་ཟེར་བ་གཉིས་གསེར་རྟ་བླ་རུང་དགོན་པའི་དོ་དམ་ཨུ་ཡོན་ལྷན་ཁང་གི་དམར་ཤོག་ཚོགས་པའི་འགན་འཛིན་གཞོན་པར་བསྐོ་གཞག་བྱ་རྒྱུ། དེ་མིན་ལོ་ཁང་ཕིང་ཟེར་བའི་བོད་མི་ཞིག་གསེར་རྟ་ལྔ་རིག་ནང་བསྟན་སློབ་གླིང་གི་དམར་ཤོག་ཚོགས་པའི་འགན་འཛིན་དང་སློབ་གླིང་གི་འགན་འཛིན་གཞོན་པར་བསྐོ་གཞག་བྱ་རྒྱུ་བཅས་ཀྱི་གསལ་བསྒྲགས་སྤེལ་ཡོད་པ་རེད།

གནས་ཚུལ་སྤེལ་རྗེས་ས་གནས་བོད་མི་དང་ལྷག་དོན་དགོན་པའི་དགེ་འདུན་པ་ཚོའི་ངོས་ནས་མ་འོངས་པར་དགོན་པའི་དབང་ཆ་ཡོངས་རྫོགས་རྒྱ་ནག་དམར་ཤོག་ཚོགས་པའི་ལག་ཏུ་ཤོར་རྒྱུ་དང་གྲྭ་བཙུན་དང་དགོན་པར་རང་དབང་གང་ཡང་མེད་པ་ཆགས་ངེས་ཡིན་པའི་བློ་འཚབ་བྱེད་བཞིན་ཡོད་པ་རེད་འདུག

ད་དུང་དོ་དམ་བྱེད་ཕྱོགས་ཀྱི་སྒྲིག་གཞི་དེའི་ནང་སློབ་གླིང་དང་དགོན་པ་གཉིས་ལོགས་སུ་དབྱེ་དགོས་དོན་ནི་དགོན་པ་དང་གྲྭ་བཙུན་གྱི་ཁེ་ཕན་ལ་དམིགས་ནས་ལག་བསྟར་བྱས་པ་ཡིན་ཚུལ་འཁོད་འདུག  དེ་བཞིན་ནང་བསྟན་སློབ་གྲིང་དུ་ལས་བྱེད་དང་གྲྭ་སློབ་ཁྱོན་ ༡༥༠༠ ལས་བརྒལ་མི་ཆོག་པ་དང་བླ་རུང་དགོན་པའི་ལས་བྱེད་དང་གྲྭ་བཙུན་བསྡོམས་མི་གྲངས་ ༣༥༠༠ ལས་བརྒལ་མི་ཆོག་པ་མ་ཟད། སོ་སོར་མིང་ཐོ་འགོད་པ་དང་ལག་འཁྱེར་བཟོ་རྗེས་རང་ཉིད་ཀྱི་མིང་དང་ལག་འཁྱེར་དཔང་ཡིག་གཅིག་གྱུར་དགོས་པ་སོགས་བཟོ་ནས་ཁྲིམས་ལྟར་ཚད་ལྡན་དང་རྒྱུན་གཏན་ཅན་གྱི་དོ་དམ་བྱས་ཏེ་ཕྱི་ནས་ཡོང་མཁན་མི་སྣ་སྔོན་འགོག་བྱེད་དགོས་པ་སོགས་འཁོད་ཡོད་པ་རེད།

གསེར་རྟ་བླ་རུང་སྒར་དུ་སྔ་ལོའི་ཟླ་ ༧ ཚེས་ ༢༠ ནས་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་གཞི་སྤེལ་བའི་ཁྲོད། ཕ་ཡུལ་ཁྱུང་མཆུ་རྫོང་རྨེ་བ་ཡུལ་ཕྱོགས་ནས་ཡིན་པའི་བཙུན་མ་ཚེ་རིང་སྒྲོལ་མ་ལགས་ཀྱིས་གཙོས་པའི་ད་བར་བཙུན་མ་གསུམ་ནས་རྒྱ་གཞུང་གིས་དགོན་པ་གཏོར་བཤིག་གི་ལས་དོན་སྤེལ་བར་མ་བཟོད་ནས་མི་འདོད་པའི་རྣམ་པ་བསྟན་ཐབས་སུ་རང་སྲོག་བཅད་པའི་གནས་ཚུལ་ཐོན་ཡོད་པ་མ་ཟད། ཉེ་དུས་རང་སྲོག་བཅད་མཁན་བཙུན་མ་ཚེ་རིང་སྒྲོལ་མ་ལགས་ཀྱི་ཞལ་ཆེམས་ཡི་གེ་ཞིག་ཕྱིར་འགྱར་བྱུང་བའི་ནང་། ‘’ངའི་སེམས་པ་འདི་ཧ་ཅང་སྐྱོ། རྒྱུ་མཚན་རྒྱ་ནག་གཞུང་གིས་ཆོས་དཔོན་ལའང་རང་དབང་སྤྲོད་ཀྱི་མི་འདུག སྡོད་ཤག་ཆུང་ཆུང་དེ་ཚོའང་བཤིག་བཞག་ཐལ། ང་ཤི་ན་དགའ་’’ ཞེས་བྲིས་འདུག  ལྷག་དོན་གྲྭ་ཤག་ཁག་གཏོར་བཤིག་བཏང་པའི་ས་ཆ་ཁག་ཏུ་ཡུལ་སྐོར་སྤྲོ་འཆམ་པ་འགྲོ་སའི་རྒྱ་ལམ་སོགས་གསར་རྒྱག་བྱེད་བཞིན་ཡོད་པ་མ་ཟད། རྒྱ་གཞུང་གིས་ཡུལ་སྐོར་སྤྲོ་འཆམ་པར་དམིགས་ཏེ་གཞི་རྒྱ་ཆེ་བའི་མགྲོན་ཁང་ཁག་ཅིག་གསར་རྒྱག་བྱེད་བཞིན་ཡོད་པ་རེད་འདུག ཆོས་སྡེ་དེར་ད་ཆ་ནང་ཆོས་སློབ་གཉེར་བ་ལས་ཡུལ་སྐོར་སྤྲོ་འཆམ་པ་མང་བ་ཆགས་ཡོད་པ་རེད།།

Share with your friends










Submit