མདུན་ཤོག » Featured Mobile » གསར་གནས། » པར་རིས་གནས་ཚུལ། »

བཙན་བྱོལ་བའི་སྤྱི་ཚོགས་ཆུང་ཆུང་ཞིག་ལས་མེད་ཀྱང་མང་གཙོའི་འཕེལ་རིམ་ཐོག་རྒྱ་ནག་སྟོབས་ཆེན་རྒྱལ་ཁབ་ལས་ང་ཚོ་ཡར་ཐོན་ཆེ་བ་བྱུང་ཡོད།

Share with your friends










Submit

༢༠༡༧ ཟླ་ ༨ ཚེས་  ༡༠ རེས་གཟའ་ཕུར་བུ།

 

His Holiness the Dalai Lama paying respects to the audience after being introduced before delivering the Rajendra Mathur Memorial Lecture in New Delhi, India on August 9, 2017. Photo by Tenzin Choejor/OHHDL

༄༅། །ཕྱི་ལོ་ ༢༠༡༧ ཟླ་ ༨ ཚེས་ ༩ ཉིན་བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གསར་འགྱུར་རྩོམ་སྒྲིག་མཐུན་ཚོགས་ Editors’ Guild of India ནས་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ།  དེ་སྔའི་རྒྱ་གར་གྱི་སྲིད་བློན་དམ་པ་སྐུ་ཞབས་པཎྜི་ཏ་ནེ་རུ་ Pandit Jawaharlal Nehru མཆོག་གི་བཞུག་ཏིན་མུརྟི་  Teen Murti Bhavan ཞེས་པ་དེར་ཆིབས་སྒྱུར་བཀའ་དྲིན་བསྐྱངས་ནས་རཱཇེནྡྲ་མཱ་ཐུར་ Rajendra Mathur Memorial Lecture མཆོག་གི་རྗེས་དྲན་མཛད་སྒོར་བཀའ་སློབ་སྩལ་འདུག

མཛད་སྒོའི་ཐོག་མར་རྩོམ་སྒྲིག་མཐུན་ཚོགས་ཀྱི་དངུལ་གཉེར་སྐུ་ཞབས་ཀལ་ཡཱན་ཤངྐར་ Kalyani Shankar ལགས་ཀྱིས་ཚོགས་བཅར་བ་མི་གྲངས་ ༣༥༠ ཕེབས་པ་རྣམས་ལ་ཕེབས་བསུའི་གསུང་བཤད་གནང་བསྟུན་ཚོགས་གཙོ་སྐུ་ཞབས་རཱཇ་ཅེང་གབ་པ་ Raj Chengappa ལགས་ཀྱིས་མཛད་སྒོ་ངོ་སྤྲོད་ཞུས།   སྐབས་དེར་ཁོང་གིས་རྒྱ་གར་རང་བཙན་ཐོབ་ནས་ལོ་ངོ་ ༧༠ འཁོར་ལ་ཉེ་བའི་དུས་ཆེན་སྲུང་བརྩི་ཞུ་ཆེད་གྲ་སྒྲིག་ཚ་ཚ་འུར་འུར་ཐོག་གནང་བཞིན་པའི་སྐབས་འདིར་གསར་འགྱུར་ཚན་པ་རྣམ་མུ་མཐུད་ཚགས་ཚུད་གནས་བཞིན་ཡོད་པ་དང་།  རྒྱ་གར་གསར་འགྱུར་རྩོམ་སྒྲིག་མཐུན་ཚོགས་འདི་ཡང་ཕྱི་ལོ་ ༡༩༧༧ ལོར་ཐོག་མར་གསར་དུ་དབུ་བརྙེས་པ་ཞིག་ཡིན་ཞིང་།   གསར་འགྱུར་རང་གིས་མི་མང་མངོན་འདོད་མཚོན་བཞིན་ཡོད་སྟབས་རྒྱ་གར་མང་གཙོའི་རིང་ལུགས་ནང་གསར་འགྱུར་རང་དབང་ནི་མེད་དུ་མི་རུང་བའི་ཆ་རྐྱེན་ཞིག་ཡིན་སྐོར་དང་།  ཕྱི་ལོ་ ༢༠༠༢ ལོ་ནས་བཟུང་སྐུ་ཞབས་རཱཇེནྡྲ་མཱ་ཐུར་མཆོག་གི་རྗེས་དྲན་མཛད་སྒོ་སྲུང་བརྩི་ཞུ་བཞིན་ཡོད་སྐོར།  སྔ་ལོོར་རྗེས་དྲན་མཛད་སྒོའི་ཐོག་ནོ་བེལ་གཟེངས་རྟགས་བཞེས་མྱོང་མཁན་སྐུ་ཞབས་ཨ་མརྟྱ་སེན་ Amartya Sen མཆོག་གདན་འདྲེན་ཞུས་ཡོད་སྐོར་སོགས་སྙན་སྒྲོན་ཞུས།

དེ་རྗེས་༸གོང་ས་མཆོག་གིས་བཀའ་སློབ་སྩལ་དོན།   དེ་རིང་རྗེས་དྲན་གྱི་མཛད་སྒོའི་ཐོག་ངོས་རང་སྐད་ཆ་ཤོད་རྒྱུའི་གོ་སྐབས་ཐོབ་པར་དགའ་སྤོབས་ཧ་ཅང་བསྐྱེས་བྱུང་།   འཛམ་གླིང་འདི་ནི་ད་ལྟ་འཛམ་གླིང་ནང་འཚོ་བཞིན་པའི་མི་འབོར་ཐེར་འབུམ་བདུན་ཡོད་པ་རྣམས་ལ་བདག་པ་ཞིག་རེད།   རྒྱལ་ཁབ་སུ་འདྲ་ཞིག་ཡིན་རུང་རྒྱལ་ཁབ་དེ་དག་ནང་གནས་པའི་མི་སེར་ཚོར་བདག་ཡོད་ཡོད་པ་ལས་ཆབ་སྲིད་འགོ་ཁྲིད་དང་རྒྱལ་པོ།  བཙུན་མོ།  བླ་ཆེན།  དབང་ཆ་གཅིག་བསྡུས་པ་ཚོར་བདག་མེད།   མི་མང་ལ་བདག་པའི་རྒྱལ་ཁབ་དེ་མི་མང་གིས་འཛིན་སྐྱོང་བྱེད་ཐུབ་པའི་ཐབས་ལམ་བཟང་ཤོས་དེ་ནི་མང་གཙོའི་ལམ་ལུགས་ཐོག་ནས་ཡོང་ཐུབ།

ངོས་རང་ཆུང་དུས་བོད་དུ་ཡོད་སྐབས་བོད་གཞུང་གི་ལམ་སྲོལ་རྙིང་པ་དེར་ཞན་ཆ་མང་པོ་ཡོད་པ་མཐོང་བྱུང་།  དབང་ཆ་ཤུགས་ཆེ་བ་མི་རེ་ཟུང་གི་ལག་ཏུ་ཡོད་པ་དེ་འདྲ་རེད།  གསར་འགྱུར་ལ་མཚོན་ན་ཀ་བློན་སྦུག་ནས་བོད་ཀྱི་མེ་ལོང་། ཞེས་པའི་གསར་ཤོག་གཅིག་མཚམས་རེ་བོད་ནང་འབྱོར་བ་མ་གཏོགས་བོད་ནང་གསར་ཤོག་གཅིག་ཀྱང་མེད།   ངོས་ལ་མཚོན་ན་གནས་ཚུལ་མང་ཆེ་བ་ནོར་གླིང་ཕོ་བྲང་ནང་གི་གད་པ་ཚོ་ནས་ཤེས་ཀྱི་འདུག

ཕྱི་ལོ་ ༡༩༥༠།༥༡ སྐབས་ནས་ངོས་ཀྱིས་བོད་ཀྱི་ཆོས་སྲིད་གཉིས་ཀྱི་འགན་འཁྱེར་བ་ཡིན།  སྐབས་དེར་ངོས་ཀྱིས་བསྐྱར་བཅོས་ལས་ཁུངས་གསར་འཛུགས་བྱས་པ་ཡིན།  འོན་ཀྱང་རྒྱ་ནག་གཞུང་གིས་རང་མོས་ལྟར་བསྐྱར་བཅོས་ལས་གཞིར་འགོག་རྐྱེན་བཟོས་སྟབས་ལམ་ལྷོངས་ལྡན་པ་ཞིག་བྱུང་ཐུབ་མེད།  དེ་ནས་ཕྱི་ལོ་ ༡༩༥༤ ལོར་ངོས་རང་པེ་ཅིང་དུ་ཕྱིན་པ་ཡིན།  ཕྱི་ལོ་ ༡༩༥༦ ལོར་རྒྱ་གར་དུ་འབྱོར་བ་རེད།  སྤྱིར་ཕྱི་ལོ་ ༡༩༥༤ ལོར་པཎྜི་ཏ་ནེ་རུ་མཆོག་དང་ཐོག་མར་མཇལ་འཕྲད་བྱུང་ཡང་ཕྱིས་སུ་ཕྱི་ལོ་ ༡༩༥༦ ལོར་ཁོང་དང་འདྲོག་འདྲིས་ཞུ་རྒྱུའི་དུས་ཚོད་བཟང་བ་བྱུང་།  དེ་ནས་ཕྱི་ལོ་ ༡༩༥༩ ལོར་ང་ཚོས་འཛམ་གླིང་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་གི་ལས་འགུལ་སྤེལ་བ་རེད།  སྤྱིར་པཎྜི་ཏ་ནེ་རུ་མཆོག་གིས་ཞུ་གཏུག་མ་བྱེད་ན་ལེགས་ཚུལ་ལམ་སྟོན་གནང་ཡོད་ཀྱང་ང་ཚོས་ཞུ་གཏུག་བྱས་ཡོད། དེར་བརྟེན་ཕྱིས་སུ་ཁོང་དང་མཇལ་འཕྲད་སྐབས་གང་གསུང་ཡོང་བསམ་པའི་འཚེར་སྣང་ཕྲན་བུ་བྱུང་ཡང་སྟབས་ལེགས་པ་ཞིག་ལ་ཁོང་གིས་དེའི་སྐོར་གང་ཡང་གསུང་མ་བྱུང་།  དེ་ནི་བསམ་བློའི་རང་དབང་གི་མཉམ་མྱོང་ཐོག་མ་བྱུང་།

Members of the audience listening to His Holiness the Dalai Lama delivering the Rajendra Mathur Memorial Lecture in New Delhi, India on August 9, 2017. Photo by Tenzin Choejor/OHHDL

ངོས་རང་མང་གཙོའི་རིང་ལུགས་ལ་ཡིད་རང་བསྔགས་བརྗོད་ཞུ་མཁན་ཞིག་ཡིན་སྟབས་ལམ་ལུགས་དེ་ངེས་པར་དུ་ལག་བསྟར་ཡོང་རྒྱུར་ཆོད་སེམས་བརྟན་པོ་ཡོད།  དེར་བརྟེན་བོད་མི་བཙན་བྱོལ་བ་རྣམས་ཀྱིས་བཙན་བྱོལ་བའི་སྤྱི་ཚོགས་ཆུང་ཆུང་ཞིག་ལས་མེད་ཀྱང་མང་གཙོའི་འཕེལ་རིམ་ཐོག་ནས་བརྗོད་ན་ང་ཚོའི་ཁྱིམ་མཚེས་རྒྱ་ནག་སྟོབས་ཆེན་རྒྱལ་ཁབ་ལས་ང་ཚོ་ཡར་ཐོན་ཆེ་བ་བྱུང་ཡོད།  དེར་བརྟེན་རྒྱ་ནག་ནང་དུའང་མཐར་ང་ཚོ་ལྟར་མང་གཙོའི་ལམ་ལུགས་ལག་བསྟར་བྱ་ཐུབ་རྒྱུ་ཡིན་པའི་རེ་བ་བྱེད་བཞིན་ཡོད།  རྒྱ་གར་ལྟ་བུར་མཚོན་ན་འཛམ་གླིང་ནང་མི་འབོར་མང་ཤོས་ཡོད་པའི་མང་གཙོའི་རྒྱལ་ཁབ་གཅིག་ཆགས་ཡོད།   དེར་བརྟེན་རྒྱ་གར་གྱི་ཁྱིམ་མཚེས་རྒྱལ་ཁབ་གཞན་དང་བསྡུར་བ་ཡིན་ན་རྒྱ་གར་ནང་ཞི་བདེ་བརྟན་ལྷིང་ཆེ་བ་ཡོད།   དེ་བཞིན་རྒྱ་གར་གནའ་རབས་ཀྱི་འཚེ་མེད་ཞི་བ་དང་ཆོས་ལུགས་མཐུན་སྒྲིལ་བྱ་རྒྱུའི་ལམ་སྲོལ་དེ་རྒྱུན་སྐྱོང་བྱེད་པའི་ཉེར་ལེན་ལ་བརྟེན་ནས་ཡུལ་འདིར་ཆོས་ལུགས་འདྲ་མིན་མང་པོ་འཆམ་མཐུན་ངང་ལོ་ངོ་བརྒྱ་ཕྲག་རིང་མཉམ་སྡོད་བྱེད་ཐུབ་བཞིན་ཡོད།

His Holiness the Dalai Lama answering questions from the audience after delivering the Rajendra Mathur Memorial Lecture in New Delhi, India on August 9, 2017. Photo by Tenzin Choejor/OHHDL

རྒྱལ་ཁབ་ཀྱི་འགན་དབང་དེ་མི་མང་ཚོར་ཡོད་སྟབས་གསར་འགྱུར་ཚན་པ་ཁག་ལ་དངོས་ཡོད་གནས་ཚུལ་རྣམས་མང་ཚོགས་ལ་གོ་རྟོགས་སྤེལ་རྒྱུའི་ལས་འགན་ཡོད།   གནས་ཚུལ་དེ་དག་དྲང་བདེན་དང་འཁྱོག་བཤད་མེད་དགོས་རྒྱུ་ཧ་ཅང་གལ་ཆེན་པོ་རེད།   འོན་ཀྱང་གསར་འགྱུར་ལ་དོ་སྣང་བསླེབས་ཆེད་གསར་འགོད་པ་ཚོས་འུད་ཤོབ་བཤད་ནས་བལྟ་ཀློག་བྱེད་མཁན་གང་མང་ཡོང་ཐབས་བྱེད་བཞིན་ཡོད།  མང་ཚོགས་རྣམས་ལ་དུས་རྟག་ཏུ་གནས་ཚུལ་བཀྲ་མི་ཤིས་པ་ཀྱང་ཀྱང་བཤད་པ་ཡིན་ན་མིའི་བསམ་བློའི་ནང་བཟང་ཕྱོགས་ཀྱི་རེ་བ་རྒྱག་ས་མེད་པ་ཆགས་ཉེན་ཡོད།  དེར་བརྟེན་གསར་འགོད་པ་ཚོས་སྐབས་རེ་གནས་ཚུལ་བཟང་པོ་ཡོད་པ་དཔེར་ན།  ཚན་རིག་པ་ཚོས་བརྟག་དཔྱད་ཀྱི་ལམ་ནས་མིའི་ལྷན་སྐྱེས་རང་བཞིན་འབྱམས་བརྩེ་ལྡན་པ་ཡིན་པའི་ར་སྤྲོད་བྱུང་ཡོད་སྐོར་སོགས་གནས་ཚུལ་གདོན་ཐུབ་རྒྱུ་ལྟ་བུ་རེད།  མི་ལ་བཟང་ཕྱོགས་ཀྱི་རེ་བ་སྦྱིན་རྒྱུ་ཧ་ཅང་གལ་ཆེན་པོ་རེད།  ང་ཚོ་སྤྱི་ཚོགས་ལ་བརྟེན་ནས་འཚོ་དགོས་པའི་སེམས་ཅན་ཡིན་སྟབས་ཆུང་དུས་བྱམས་བརྩེའི་མཉམ་མྱོང་དང་བྱམས་བརྩེའི་འཚོ་བས་བསྐྱངས་པ་ཡིན་པར་བརྟེན་རང་བཞིན་གྱི་བྱམས་པ་དང་བརྩེ་བར་རིན་ཐང་སྤྲོད་བཞིན་ཡོད།    བྱམས་བརྩེ་གོང་འཕེལ་བཏང་བ་བརྒྱུད་ང་ཚོས་མིའི་སྤྱི་ཚོགས་བྱམས་བརྩེ་ལྡན་པ་ཞིག་བཟོ་ཐབས་བྱ་དགོས།

A member of the audience asking His Holiness the Dalai Lama a questions at the Editor's Guild's Rajendra Mathur Memorial Lecture in New Delhi, India on August 9, 2017. Photo by Tenzin Choejor/OHHDL

དེ་ནས་ཕྱོགས་གཞན་ཞིག་ནི་དེང་དུས་ཤེས་ཡོན་ལམ་ལུགས་འདིས་མིའི་ནང་གི་རིན་ཐང་གོང་མཐོར་གཏོང་རྒྱུར་ནུས་པ་འདེང་མིན་ཐོག་དཔྱད་དགོས། དེང་སྐབས་ང་ཚོར་འཕྲད་བཞིན་པའི་དཀའ་ངལ་མང་དག་ཅིག་མིས་བཟོས་པ་ཡིན་ཞིང་།  ལྷག་པར་དཀའ་ངལ་དེ་དག་བཟོ་མཁན་ཡང་དེང་དུས་ཀྱི་ཤེས་ཡོན་ཡོད་མཁན་ཚོ་ཡིན།    དེར་བརྟེན་དེང་དུས་ཤེས་ཡོན་ལམ་ལུགས་ནང་ཞན་ཆ་ཡོད་པ་གསལ་པོ་རེད།  ང་ཚོས་བསྐྱར་དུ་ཉམས་ཞིབ་བྱ་དགོས།  དེང་དུས་ཤེས་ཡོན་ལམ་ལུགས་ནང་གཙོ་བོ་ཕྱི་དངོས་པོ་དཔལ་འབྱོར་ཡར་རྒྱས་ཇི་ལྟར་བཏང་དགོས་པའི་ཐོག་ཤུགས་བརྒྱབ་བཞིན་ཡོད་པ་མ་གཏོགས་ནང་བཤིས་རྒྱུས་གཤིས་རྒྱུད་དང་འབྲེལ་བའི་བཟང་པོའི་རིན་ཐང་གོང་མཐོར་བཏང་རྒྱུད་ཐད་སྐད་ཆ་བཤད་ཀྱི་མེད།    ཅེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ།

A view of the hall at Teen Murti Bhavan at the conclusion of the Editor's Guild's Rajendra Mathur Memorial Lecture in New Delhi, India on August 9, 2017. Photo by Tenzin Choejor/OHHDL
Share with your friends










Submit