མདུན་ཤོག » བརྒྱུད་ལམ་གཞན་གྱི་གསར་གནས། »

རྒྱ་གཞུང་གིས་བོད་ཁུལ་དུ་ལྟ་རྟོག་དོ་དམ་གྱི་ལས་དོན་ལོ་དྲུག་ཕར་འགྱང་བྱས་འདུག

Share with your friends










Submit

ཕྱི་ལོ་ ༢༠༡༦ ཟླ་ ༡༢ ཚེས་ ༣ རེས་གཟའ་སྤེན་པ།

༄༅། །བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཕྱི་ལོ་ ༢༠༡༦ ཟླ་ ༡༢ ཚེས་ ༡ ཉིན་གནས་ཚུལ་སྤེལ་གསལ་ལྟར་ན། རྒྱ་གཞུང་གིས་བོད་རང་སྐྱོང་ལྗོངས་སུ་ཚད་མཐོའི་གནོད་སྐྱོན་ཅན་གྱི་གྲོང་ཚོར་ལྟ་རྟོག་རུ་ཁག་སྐོར་དྲུག་པ་དེ་ཉིད་སྤེལ་འགོ་ཚུགས་ཤིང་། ལས་རིམ་དེར་ལོ་རེ་བཞིན་རྒྱ་གཞུང་གི་ཏང་ཡོན་མི་སྣ་སྟོང་ཕྲག་མང་བོ་བོད་ཁུལ་གྱི་གྲོང་ཚོ་དང་། དགོན་སྡེ། དུད་སྤྲེལ་གྲོང་རྡལ་ཁག་བཅས་ལ་བཏང་ནས་ཡུལ་མིར་ལྟ་རྟོག་དང་དོ་དམ་བྱ་རྒྱུའི་མཚོན། ༧གོང་ས་མཆོག་ལ་ངོ་རྒོལ་ལས་འགུལ་གོ་སྒྲིག་སོགས་ཀྱི་ཆབ་སྲིད་གོ་རྟོགས་སྤེལ་བའི་སྒོ་ནས། རྒྱ་གཞུང་གི་དམར་པོའི་ལྟ་བ་བོད་དུ་ཤུགས་རྐྱེན་ཇེ་ཆེར་ཇེ་བརྟན་དུ་གཏོང་རྒྱུ་བཅས་རེད་འདུག

རྒྱ་གཞུང་གི་གཞུང་འབྲེལ་དྲ་ཚིགས་ཤིག་གིས་ཉེ་ལམ་གནས་ཚུལ་བཏོན་གསལ་ལྟར་ན། ལོ་འདིའི་ཕྱི་ཟླ་ ༡༡ ཚེས་ ༢༥ ཉིན། ལྷ་སར་གྲོང་ཚོ་བཅའ་སྡོད་རུ་ཁག་སྐོར་དྲུག་པའི་འདེམས་གཏོང་གསལ་བསྒྲགས་དང་སྐབས་ལྔ་པའི་ལས་དོན་གྲུབ་འབྲས་གཟེངས་ཐོན་ཅན་ལ་བྱ་དགའ་སྤྲད་པའི་ཚོགས་འདུ་བསྐོང་ཚོགས་བྱས་འདུག གྲོང་ཚོར་བཅའ་སྡོད་ལས་དོན་རུ་ཁག་སྐོར་དྲུག་པར་ཁྱོན་བསྡོམས་ལས་བྱེད་པ་མི་གྲངས་༢༢༠༠༠ འདེམས་གཏོང་གནང་ཡོད་ཅིང་། དེའི་ཁྲོད་ལྗོངས་ཐད་གཏོགས་ལས་ཁུངས་ཀྱི་མི་སྣ་ ༢༤༠༨ དང་། ས་ཁུལ་དང་ཐེངས་རིམ་པའི་ལས་བྱེད་ ༥༥ གྲོང་ཚོར་བཅའ་སྡོད་ལས་དོན་རུ་ཁག་གི་རུ་དཔོན་གྱི་འགན་ཁུར་དང་། ཁོང་ཚོ་བོད་རང་སྐྱོང་ལྗོངས་ཀྱི་སྲིད་འཛིན་གྲོང་ཚོ་དང་གྲོང་མི་ཨུ་ལྷན་ ༥༤༦༧ ལ་ཕྱིན་ཏེ་གྲོང་ཚོ་དང་དགོན་སྡེ་བཅའ་སྡོད་ལས་དོན་སྤེལ་རྒྱུ་རེད་འདུག

village-cadres-conference-2རྒྱ་གཞུང་གིས་ཕྱི་ལོ་ ༢༠༡༡ ནས་བཟུང་། གཞུང་འབྲེལ་ལས་བྱེད་དང་ཏང་ཡོན་མི་སྣ་བོད་ཀྱི་གཞི་རིམ་ས་ཁུལ་དུ་གཏོང་ནས་༼ཆུ་མ་ཡོང་གོང་གི་རགས། ༽ཞེས། བོད་ཁུལ་དུ་བསྐྱར་དུ་ཕྱི་ལོ་ ༢༠༠༨ ལྟ་བུ་ཟིང་འཁྲུག་མ་ཡོང་བའི་ཆེད་དུ་གཞུང་ལ་བློ་དཀར་གཞུང་དྲང་མིན་པ་དང་། ཡང་ན་གཞུང་ལ་སྐྱོན་བརྗོད་བྱེད་མཁན་ཞེས་དོགས་ཡོད་ལ་ལྟ་རྟོག་ནན་ཏན་བྱ་རྒྱུ་རེད་འདུག

རྒྱ་གཞུང་གིས་མངགས་གཏོང་བྱས་པའི་བློ་མཐུན་ལས་བྱེད་དེ་དག་གིས་བོད་ཁུལ་དུ་ ༼སྔོན་གཏོད་ལེགས་བརྩོན་དང་རྨང་བརྟན་དམངས་ཕན་བྱེད་སྒོ།༽ ཞེས་བོད་མིའི་འཚོ་གནས་ཡར་རྒྱས་ལ་ཕན་ཐོགས་དང་གྲུབ་འབྲས་རླབས་ཆེན་བླངས་ཡོད་ལུགས་དྲིལ་བསྒྲགས་ཤུགས་ཆེར་བྱས་མིན་ལ་མ་ལྟོས་པར། འདི་ནི་བོད་ཁུལ་དུ་ལྟ་རྟོག་བྱ་ར་བྱེད་སྟངས་སྣ་ཚོགས་ལག་བསྟར་བྱེད་ཀྱི་ཡོད་པའི་ཁོངས་ནས་གཅིག་ཡིན་པར་ཐེ་ཚོམ་གང་ཡང་མི་དགོས་པ་ཞིག་ཡིན། ཕྱི་ལོ་ ༢༠༡༡ ལོར་གྲོང་ཚོར་བཅའ་སྡོད་ལྟ་རྟོག་ལས་དོན་ལས་རིམ་འདི་ཉིད་ཐོག་མར་ལག་བསྟར་གྱིས་མུ་མཐུད་ལོ་གསུམ་རྗེས་ཕྱི་ལོ་༢༠༡༤ ཕྱི་ཟླ་ ༡༢ ནང་བསྐྱར་དུ་ལས་དོན་འདི་ཉིད་འགོ་བཙུགས་གསལ་བསྒྲགས་ཀྱི་སྐབས་སུ། བོད་རང་སྐྱོང་ལྗོངས་ཀྱི་འགོ་གཙོ་དཔོན་རིགས་རྣམས་ཀྱིས་ལས་དོན་༼སྲ་བརྟན་དང་གྲུབ་འབྲས་དབྱར་དུ་ཟ་བ།༽འདི་ཉིད་མུ་མཐུད་རྒྱུན་འཁྱོངས་བྱས་འོས་ལུགས་བཤད་ཡོད། བཤད་སྟངས་འདིའི་བརྒྱུད་བོད་རང་ལྗོངས་ས་ཁུལ་གྱི་བོད་མིའི་ཉིན་རེར་འཚོ་བར་ལྟ་རྟོག་བྱ་ར་བྱ་རྒྱུ་ནི་སྒྲིག་གཞི་ཞིག་དང་གཡོལ་ཐབས་མེད་པ་ལྟ་བུ་ངོས་བཟུང་བ་བསྟན་ཡོད་པ་མ་ཟད། གཞུང་འབྲེལ་གྱི་ཐལ་དྲགས་དོ་དམ་དང་དོགས་ཟོན་བརྒྱུད་ནས་འགྲོ་བ་མིའི་གཞི་རྩའི་ཐོབ་ཐང་དང་གཞི་རིམ་རང་དབང་ལ་བཀག་སྡོམ་དང་དམ་བསྒྲག་འཐེབ་ཟིན་པ་མཚོན་ཡོད།

དེའི་ཐད་ལ་འདི་ག་ལྟེ་གནས་ཁང་གི་ཉམས་ཞིབ་པ་བསྟན་འཛིན་ཟླ་བ་ལགས་ཀྱིས་༼ཕྱི་ལོ་ ༢༠༡༡ ལོ་ནས་ལྟ་རྟོག་ལས་དོན་ལས་རིམ་འདི་ཉིད་ལག་བསྟར་བྱས་པས་ཚད་མཐོའི་དམ་བསྒྲགས་དང་གནོད་འཚབ་ཆེན་པོ་བྱུང་ཡོད། དེ་ནི་ལས་དོན་མི་སྣ་དེ་དག་གིས་ས་གནས་བོད་མིའི་སྟེང་དུ་བསམ་བློ་སྟངས་འཛིན་བྱེད་མཁན་གྱི་ཉེན་རྟོག་པ་ལྟ་བུ་བྱས་སྟངས་ཐལ་དྲགས་ཡོད། གང་ཡིན་ཞེ་ན། ལས་དོན་རུ་ཁག་མི་སྣ་དེ་དག་ས་གནས་བོད་མིའི་ཁྱིམ་དུ་གང་བྱུང་འཛུལ་ནས་ཆབ་སྲིད་དང་འབྲེལ་བའི་གནས་ཚུལ་བསྡུ་རུབ་དང་། བཙན་ཤེད་ཀྱི་སྒོ་ནས་ཆབ་སྲིད་སློབ་སྦྱོང་གི་ལས་རིལ་དུ་ཞུགས་སུ་བཅུག་པ། བོད་མི་ངོས་ནས་དེ་དག་དང་མཉམ་རུབ་གཞོགས་འདེགས་བྱ་རྒྱུ་ལས། དེ་མིན་ཐོ་གཞུང་ནག་པོའི་ནང་དུ་བླུག་ཉེན་ཡོད་པ་རེད།༽ ཅེས་དང་། ཡང་ ༼བོད་ཁུལ་དུ་གཞི་རྩའི་འགྲོ་བ་མིའི་ཐོབ་ཐང་ཁག་བརྩི་མེད་རྡོག་རོལ་གཏོང་བ་ནི་རྒྱུན་ལྡན་ལྟ་བུ་དང་། ལས་དོན་རུ་ཁག་དེ་བརྒྱུད་བོད་མི་ནང་ཁུལ་མ་འཆམ་པ་དང་དཀའ་ངལ་འདྲ་མིན་འཕྲད་ཀྱི་ཡོད་འདུག༽

ཡང་བོད་ཁུལ་གྱི་ཞིང་གྲོང་ས་ཁུལ་དུའང་གྲོང་ཚོར་བཅའ་སྡོད་ལས་དོན་ཞེས་པ་འདིའི་བརྒྱུད་དྲ་མིག་ཅན་སྤྱི་ཚོགས་དོ་དམ་ལམ་ལུགས་ཞེས་པ་ཞིག་ལག་བསྟར་དུས་མཉམ་དུ་བྱས་ཡོད། ལོ་འདིའི་ཕྱི་ཟླ་ ༤ ནང་། ལྷ་ས་གྲོང་ཁྱེར་གྱི་དམར་ཤོག་དྲུང་ཆེ་ཆོས་བཀྲ་ལགས་ཞེས་པས། དྲ་མིག་ཅན་སྤྱི་ཚོགས་དོ་དམ་ལས་དོན་འདིས་ལྷ་ས་གྲོང་ཁྱེར་གྱི་ ༼བརྟན་ལྷིང་ཞི་འཇགས།༽ ལ་བྱས་རྗེས་བཞག་ཡོད་པའི་ཡི་རངས་བསྔགས་བརྗོད་བྱས་འདུག ཡང་ཆོས་ལུགས་ཀྱིས་ ༼མི་དམངས་རང་ཉིད་ཀྱིས་དོ་དམ་དང་རང་ཉིད་ལ་ཞབས་འདེགས་བྱ་རྒྱུ་ནི་ཀྲུང་གོའི་ཁྱད་ཆོས་ཤིག་ཡིན། ༽ ཞེས་བཤད་ཡོད། ཆོས་ལུགས་ཀྱིས་སྐད་ཆ་འདི་བརྒྱུད་ནས་ང་ཚོས་བོད་ཁུལ་ལ་ལྟ་རྟོག་ལས་དོན་འདིས་སྤྱི་ཚོགས་བརྟན་ལྷིང་བཅོས་མ་ཞིག་སྣ་འདྲེན་བྱས་ཡོད་པ་དང་། བོད་མིའི་ནང་ཁུལ་ལ་དོགས་ཟོན་དང་འཇིགས་ངོམ། ཞིབ་བཤེར་དང་བཀག་སྡོམ་འཐེབ་ཀྱི་ཡོད་པ་མཚོན་ཡོད།

བོད་ཀྱི་ས་ཁུལ་གཞན། དཔེར་ན། ཟི་ཁྲོན་དང་མཚོ་སྔོན། ཀན་ལྷོ་མཚོན་པའི་ཤིན་ཅིང་དུའང་གྲོང་ཚོ་བཅའ་སྡོད་ལྟ་རྟོག་ལས་དོན་དང་ཕྱོགས་མཚུངས་པའི་ལས་དོན་ ༼བརྟན་ལྷིང་བདེ་འཇགས།༽ ཞེས་པའི་མིང་བྱང་འོག་ནས་ལས་དོན་ཆེ་ཁག་ལྔ་ལག་བསྟར་བྱེད་བཞིན་ཡོད་འདུག་པ་མ་ཟད། ལྷག་པར་ཀཱ་ཤི་གྷར་ས་གནས་གྲོང་ཚོར་བཅའ་སྡོད་ལས་དོན་རུ་ཁག་གི་མི་སྣ་བོད་རང་སྐྱོང་ལྗོངས་ཀྱི་ས་ཁུལ་དུ་ལྟ་སྐོར་ལ་ཕྱིན་པ་ལྟར་ན། བོད་རང་སྐྱོང་ལྗོངས་ཀྱིི་དམར་ཤོག་དྲུང་ཆེ་ཁྲེན་གོ་ཆིན་གྱི་ལས་ཡུན་རིང་ལག་བསྟར་དོན་འཁྱོལ་བྱས་པའི་ལས་དོན་ཆེན་མོ་དྲུག་ནི། ༡། དྲ་མིག་ཅན་སྤྱི་ཚོགས་དོ་དམ་ལམ་ལུགས་དང། ༢། དམངས་བདེ་ཉེན་རྟོག་ས་ཚུགས། ༣། དགོན་པར་བཅའ་སྡོད་ལས་དོན་རུ་ཁག ༤། གྲོང་ཚོར་བཅའ་སྡོད་རུ་ཁག ༥། རྨང་བརྟན་མང་ཕན་ལས་འགུལ། ༦། དུད་སྤྲེལ་དོ་དམ་བཅས་སོ།

དུད་སྦྲེལ་དྲ་མིག་ཅན་དོ་དམ་འདི་ལ་ད་དུང་ཆ་རིགས་གཉིས་ལྡན་དུད་སྦྲེལ་ཟེར་ལ། དེ་ནི་སྲིད་གཞུང་གི་ལྟ་རྟོག་ལས་རིམ་ཚད་གཞི་དམའ་ཤོས་ཀྱི་སྡེ་ཁག་ཅིག་ཡིན། ཡང་ལས་རིམ་འདིའི་ཐད་རྒྱ་གཞུང་གི་གཞུང་འབྲེལ་བརྒྱུད་ལམ་ཁག་ཏུ་དྲིལ་བསྒྲགས་བྱས་པ་ལྟར་ན། དབུལ་སྒྲོལ་འགག་སྒྲོལ་ཞེས་ལས་དོན་རུ་ཁག་གི་མི་སྣས་ཁྱིམ་ཚང་དབུལ་བོར་ཁག་ལ་རོགས་རམ་གྱི་ཕྱུག་པོར་འགྱུར་བའི་ལམ་ཀར་འཁྲིད་ནས་ཕྱུག་པོར་འགྱུར་དུ་བཅུག་གི་ཡོད་རབས་གསལ།

ཕྱི་ལོ་ ༢༠༡༣ ཟླ་ ༧ ཚེས་ ༢༥ ཉིན། རྒྱ་གཞུང་གི་གཞུང་འབྲེལ་གསར་ཁང་ཞིག་གིས། བོད་རང་ལྗོངས་ཀྱི་ཏང་ཡོན་ཚོགས་མི་དང་རང་སྐྱོང་ལྗོངས་ཀྱི་འཐབ་ཕྱོགས་གཅིག་གྱུར་གྱི་འགོ་གཙོ་ཆོས་གྲགས་ཞེས་པ་ཁོང་གི་སྐད་ཆ་ལུང་འདྲེན་བྱས་པའི་ནང་དུ། ཁོང་གིས་དྲ་མིག་ཅན་དོ་དམ་ལས་དོན་གྱི་དམིགས་ཡུལ་ནི་ ༼བོད་ཁུལ་གྱི་ཏཱ་ལའི་བླ་མ་དང་ཕྱི་བསྡོད་བོད་མི། ཕྱི་རྒྱལ་བཅས་ཀྱི་ཤུགས་རྐྱེན་ལ་ཁ་གཏད་ངོ་རྒོལ་བྱ་རྒྱུ་དེ་ཡིན།༽ ཡང་ཁོང་གིས་བོད་ཁུལ་དམངས་སེམས་བརྟན་ལྷིང་བྱས་པའི་སྒོ་ནས་ཕུགས་རྒྱང་རིང་བའི་བདེ་འཇགས་ལེགས་གྲུབ་དང་། དྲ་མིག་ཅན་གྱི་སྤྱི་ཚོགས་དོ་དམ་གྱི་རྨང་བརྟན་སྲ་ཚུགས་གྱི་གནས་རིམ་དུ་སླེབས་པ་བྱེད་རྒྱུ་དེ་ཡིན་ཞེས་བཤད་ཡོད། །

Share with your friends










Submit