མདུན་ཤོག » བརྒྱུད་ལམ་གཞན་གྱི་གསར་གནས། »

རྒྱ་གར་དུ་གནས་སྐོར་ཡོང་མཁན་བོད་མི་ ༤༡ ས་མཚམས་ནས་བལ་ཡུལ་དུ་ཕྱིར་སློག་བྱས་པ།

༢༠༡༦ ཟླ་ ༡༡ ཚེས་ ༡༦ རེས་གཟའ་ལྷག་པ།

༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༡༥ ཉིན་ནོར་ཝེ་བོད་ཀྱི་རླུང་འཕྲིན་ཁང་ནས་གནས་ཚུལ་སྤེལ་བའི་ནང་འཁོད་དོན། བོད་མི་ ༤༡ ཙམ་རྒྱ་གར་དང་བལ་ས་མཚམས་ Kailali ས་ཁུལ་ནས་བལ་པོའི་ཉེན་རྟོག་པས་འཛིན་བཟུང་འོག་རྒྱལ་ས་ཀ་ཐ་མན་གྲུར་ཕྱིར་སློག་བྱས་འདུག  དེ་ཡང་བལ་ཡུལ་ནང་གི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཟླ་ ༡༡ ཚེས་ ༡༤ ཉིན་བོད་ནས་གསར་དུ་འབྱོར་བའི་བོད་མི་སྐྱ་སེར་ཁྱོན་ ༤༡ སྐོར་ཞིག་བལ་ཡུལ་དང་རྒྱ་གར་གཉིས་ཀྱི་ས་མཚམས་ Kailali ས་ཁུལ་གྱི་ Dhangadhi དགག་སྒོ་ནས་བལ་པོའི་ཉེན་རྟོག་པས་འཛིན་བཟུང་བྱས་པ་དང་འདི་བཞིན་ཁོང་རྣམས་བལ་ཡུལ་ནང་དུ་ཕྱིར་སློག་བྱས་ཡོད་འདུག

ཤེས་རྟོགས་བྱུང་བར་གཞིགས་ན། བོད་མི་དེ་དག་རྒྱ་གར་གྱི་ནང་པའི་གནས་ཆེན་རྡོ་རྗེ་ལྡན་དང་། ཝཱ་རཱ་ཎ་སཱི། རྩ་མཆོག་གྲོང་སོགས་སུ་གནས་མཇལ་དུ་བསྐྱོད་འཆར་ཡོད་ཀྱང་། ཁོང་རྣམས་ལ་རྒྱ་གར་དུ་བསྐྱོད་ཆོག་པའི་རང་ཉིད་དོ་བདག་སོ་སོའི་ངོ་སྤྲོད་ལག་འཁྱེར་དང་ཕྱིར་བསྐྱོད་ལག་འཁྱེར་སོགས་གང་ཡང་མེད་རྐྱེན་གྱིས་འཛིན་བཟུང་བྱས་འདུག

གཞི་རྩའི་བལ་ཡུལ་དེ་རྒྱ་གར་དང་བོད་གཉིས་ཀྱི་བར་ལ་ཆགས་ཡོད་པ་དང། བོད་ནས་རྒྱ་གར་ནང་དུ་ཕེབས་མཁན་བོད་མི་རྣམས་བལ་ཡུལ་བརྒྱུད་ནས་ཡོང་དགོས་ཀྱི་ཡོད་པ་རེད། བལ་ཡུལ་གཞུང་གིས་ངོས་ནས་ལོ་མང་རིང་བོད་མིའི་རྣམས་ལ་རྒྱ་གར་དུ་བསྐྱོད་རྒྱུར་མཐུན་འགྱུར་གནང་ཡོད་ཀྱང། ལོ་ཤས་གོང་ནས་རྒྱ་གཞུང་གིས་གནོན་ཤུགས་རྐྱེན་པས་བོད་ནས་བལ་ཡུལ་དུ་ཡོང་མཁན་བོད་མི་དེ་དག་ལ་བལ་ཡུལ་བརྒྱུད་རྒྱ་གར་དུ་བསྐྱོད་པར་ཆེས་དམ་བསྒྲགས་བྱེད་ཤུགས་ཆེ་རུ་བཏང་ཡོད་པའི་ཁྲོད། དེ་སྔོན་ཡང་བལ་ཡུལ་ས་མཚམས་ཉེན་རྟོག་པས་བོད་མི་ཁག་ཅིག་ཕྱིར་སློག་བཏང་བའི་གནས་ཚུལ་ཐོན་མྱོང་ཡོད་པ་རེད།

དེ་བཞིན་བལ་ཡུལ་ནང་དུ་བོད་མི་མང་དག་ཞིག་ལ་ཁུལ་དེར་གནས་སྡོད་ཆོག་པའི་ལག་འཁྱེར་མ་རག་པའི་དཀའ་ངལ་དུ་མ་འཕྲད་བཞིན་ཡོད་པ་མ་ཟད། ལྷག་དོན་བལ་པོའི་ཉིན་རྟོག་པས་ས་གནས་སུ་༸གོང་ས་མཆོག་གི་འཁྲུངས་སྐར་སྲུང་བརྩི་ཞུ་རྒྱུ་དང་། རྒྱ་གཞུང་ལ་ངོ་རྒོལ་སོགས་ཀྱི་གནང་སྒོ་ཁག་ལ་དམ་བསྒྲགས་ཤུགས་ཆེ་བྱས་དང་བྱེད་མུས་ཡིན་པ་རེད། དེ་སྔ་ཕྱི་ལོ་ ༢༠༡༣ ལོའི་ཟླ་ ༨ ཚེས་ ༦ ཉིན་རང་ལོ་ ༣༩ ཡིན་པའི་དགེ་འདུན་པ་ཀརྨ་ངེས་དོན་རྒྱ་མཚོ་ལགས་ཀྱིས་བལ་ཡུལ་གྱི་མཆོད་རྟེན་བྱ་རུང་ཁ་ཤོར་མདུན་དུ་རྒྱ་གཞུང་ལ་ངོ་རྒོལ་གྱི་རང་ལུས་མེར་བསྲེགས་གནང་ཡོད་པ་རེད། རྩ་བའི་བོད་མི་དེ་དག་དེ་རིང་ཚེས་ ༡༥ ཉིན་རྒྱབ་བལ་ཡུལ་གྱི་རྒྱལ་ས་ Kathmandu ནང་དུ་འབྱོར་གྱི་འདུག །

Share with your friends










Submit