མདུན་ཤོག » གསར་གནས། » གསར་འགོད་གསལ་བསྒྲགས། »

རྒྱ་གཞུང་གིས་རྒྱབ་ཤ་དཀར་པོའི་དེབ་ཟེར་བ་ཞིག་འདོན་སྤེལ་བྱས་ཏེ་བོད་ནང་གི་ཡ་ང་བའི་དངོས་ཡོད་གནས་སྟངས་འགེབས་སྲུང་བྱས་པ།

Share with your friends










Submit

༢༠༡༥ ཟླ་ ༤ ཚེས་ ༡༦ རེས་གཟའ་ཕུར་བུ།                                       

གསར་འགོད་གསལ་བསྒྲགས།

༄༅། །བོད་འདི་མུ་མཐུད་ནས་རྒྱ་ནག་གི་དབང་བསྒྱུར་འོག་གནས་ཐུབ་པའི་གདེང་སྤོབས་མེད་སྟབས།  ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་གི་གསར་འགྱུར་གཞུང་ལས་ཁང་ནས་ཐེངས་འདིར་སླར་ཡང་སེམས་འཁྲུག་དང་བྲེལ་ཟིང་ཆེན་པོའི་ཐོག་ནས་བོད་ལྗོངས་ཀྱི་རྒྱབ་ཤ་དཀར་པོའི་དེབ། ཟེར་བ་བཏོན་ཡོད། བོད་པའི་བཙུན་མ་ཞིག་གིས་གཙོས་བོད་མི་ ༡༣༧ གིས་རང་ལུས་མེར་སྲེག་བཏང་བ་དེ་དག་གིས་རང་ཡུལ་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དེར་བོད་མི་ཚོས་སེམས་སྡུག་ཆེན་པོ་བྱེད་བཞིན་ཡོད་པ་དང་། རྒྱ་གཞུང་ལ་མི་དགའ་བའི་བསམ་བློ་ཤུགས་ཆེ་ཡོད་པ་གསལ་སྟོན་བྱེད་བཞིན་ཡོད།

ཕྱི་ལོ་ ༡༩༩༠ འགོ་སྟོད་ནས་བཟུང་ད་བར་རྒྱ་ནག་གཞུང་གིས་བོད་ལྗོངས་ཀྱི་རྒྱབ་ཤ་དཀར་པོའི་དེབ། ཟེར་བ་ཐེངས་ ༡༣ བཏོན་ཡོད། དེ་ནི་པེ་ཅིང་གཞུང་གིས་ཕྱི་ལོ་ ༡༩༩༠ ནས་ད་བར་ལོ་གཉིས་རེའི་མཚམས་སུ་བོད་ཐོག་རྒྱབ་ཤ་དཀར་པོའི་དེབ་ཐེངས་རེ་བཏོན་པ་ལྟ་བུ་ཆགས་ཡོད། སྤྱིར་རྒྱབ་ཤ་དཀར་པོའི་དེབ་ཅེས་པའི་གོ་དོན་ནི། ཆེས་རྙོག་གཞི་ཅན་གྱི་གནད་དོན་ལ་གཞུང་གི་དབང་ཚད་ལྡན་པའི་ལམ་སྟོན་ཡིག་ཆའམ། དངོས་ཟོག་ཚོང་རྒྱུའི་དྲིལ་བསྒྲགས་ཡིག་ཆ་ཞིག་ལ་ཟེར་བ་ཡིན། བོད་ཐོག་རྒྱ་ནག་གཞུང་གིས་དབང་བསྒྱུར་བྱ་རྒྱུའི་ཐོབ་དབང་ཡོད་ཚུལ་བཤད་པ་དེར་ངོས་ལེན་བྱེད་མཁན་ཡོང་རྒྱུར་ཧ་ཅང་དཀའ་ངལ་འཕྲད་བཞིན་ཡོད་སྟབས། རྒྱ་ནག་གཞུང་གིས་བོད་ཐོག་རྒྱབ་ཤ་དཀར་པོའི་དེབ་ཟེར་བ་ཐེངས་ ༡༣ པ་དེ་འདོན་སྤེལ་བྱེད་དགོས་ཐུག་ཡོད། བོད་ལྗོངས་རྒྱབ་ཤ་དཀར་པོའི་དེབ་ཟེར་བ་དེ་ད་ཆ་ཧ་ཅང་མང་དྲགས་པ་དང་ཡིད་རྟོན་མི་རུང་ཞིང་། བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དེ་དག་འགེབས་སྲུང་བྱ་རྒྱུར་ཕྱིས་དྲགས་པ་རེད།

ཉེ་ལམ་ཨ་རིའི་ཕྱི་སྲིད་ལས་ཁུངས་དང་རྒྱ་ནག་ཐོག་ཨ་རིའི་གྲོས་ཚོགས་ཀྱི་རྟོག་ཞིབ་ཚོགས་པ། འགྲོ་བ་མིའི་ཐོབ་ཐང་རྟོག་ཞིབ་ཚོགས་པ། རྒྱལ་སྤྱིའི་ཉེས་ཡངས་ཚོགས་པ། རྒྱལ་མཚམས་མེད་པའི་གསར་འགོད་མཐུན་ཚོགས། དེ་བཞིན་གཞུང་འབྲེལ་མིན་པའི་ཚོགས་པ་བཅས་ཀྱིས་རྒྱ་ནག་གཞུང་གིས་བོད་མིའི་ཆབ་སྲིད་རང་དབང་ཐོག་དམ་བསྒྲགས་བྱས་པ་དང་། དཔལ་འབྱོར་དབྱེ་འབྱེད་དང་སྤྱི་ཚོགས་ཟུར་འབུད་བྱས་པ། དེ་བཞིན་བོད་མིའི་རིག་གཞུང་དང་ཁོར་ཡུག་རྩ་མེད་བཟོ་བཞིན་ཡོད་པ་གསལ་སྟོན་གནང་ཡོད་པ་མ་ཟད། རྒྱ་རིགས་ཚན་རིག་པ་ཚོས་ཀྱང་འཛམ་གླིང་གི་སྣེ་གསུམ་པའམ་མཐོ་སྒང་བོད་ཀྱི་ཁོར་ཡུག་ཤུགས་ཆེ་ཉམས་གུད་འགྲོ་བཞིན་པའི་གནད་དོན་གླེང་སློང་བྱས་ཡོད།

རྒྱ་ནག་གཞུང་གིས་ད་བར་བོད་ཐོག་བོད་ལྗོངས་རྒྱབ་ཤ་དཀར་པོའི་དེབ་ཟེར་བ་ ༡༢ བཏོན་ཟིན་པ་རྣམས་དང་མི་འདྲ་བར་ཐེངས་འདིའི་རྒྱབ་ཤ་དཀར་པོའི་ནང་། སྔ་ལོ་བོད་མིའི་སྒྲིག་འཛུགས་ཀྱིས་རྒྱལ་སྤྱིའི་སྟེང་རྣམ་པ་གསར་པའི་ཐོག་དབུ་མའི་ལམ་གྱི་གོ་རྟོགས་ལས་འགུལ་སྤེལ་ཡོད་པ་དེར་སྐྱོན་བརྗོད་ཤུགས་ཆེ་བྱས་ཡོད། འོན་ཀྱང་དེ་ནི་ཕྱིས་དྲགས་ཡོད། རྒྱ་ནག་གཞུང་གིས་དབུ་མའི་ལམ་གྱི་སྲིད་བྱུས་ཐོག་ནས་བོད་མི་ཚོས་རང་བཙན་རྩོད་བཞིན་ཡོད་སྐོར་ལོག་འགྲེལ་བྱས་ཡོད་པ་དེ་ནི་ཆེད་མངགས་གཞན་དག་མགོ་བོ་རྨོངས་སུ་འཇུག་རྒྱུའི་ཐབས་ལམ་ཞིག་ལས་མ་འདས། འཁྱོག་བཤད་འདི་ལྟ་བུ་བྱ་རྒྱུ་ལས་རྒྱ་ནག་གཞུང་ལ་ཐབས་ལམ་གཞན་རྙེད་མེད། དབུ་མའི་ལམ་གྱི་སྲིད་བྱུས་འདི་ནི་བོད་མི་ཚོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་གཅིག་ཐོབ་ཐབས་བྱེད་བཞིན་ཡོད་པ་དེ་ནི་གཉིས་སྨན་གྱི་ཐབས་ལམ་ཞིག་ཡིན། དེར་བརྟེན་སྲིད་གཞུང་མང་པོས་སྲིད་བྱུས་འདིར་སྔགས་བརྗོད་ཞུ་བཞིན་ཡོད་པ་མ་ཟད། འཛམ་གླིང་ཁྱོན་ཡོངས་སུ་ཐབས་ལམ་འདིར་དགའ་མོས་ཆེན་པོ་བྱེད་བཞིན་ཡོད། ལྷག་པར་དུ་དབུ་མའི་ལམ་གྱི་སྲིད་བྱུས་ཀྱི་དོན་ཚན་འགའ་ཤས་གླེང་སློང་བྱས་ཡོད་པ་རྣམས་དྲ་ཐག་  འདི་དང་། འདི་ནས་གཟིགས་ཐུབ།

ཐེངས་འདིར་དེ་སྔའི་བོད་ལྗོངས་རྒྱབ་ཤ་དཀར་པོའི་དེབ་ཟེར་བ་དེ་དག་དང་མི་འདྲ་བར་༸གོང་ས་མཆོག་ནས་རྒྱ་ནག་གཞུང་དང་ལྷན་འབྲེལ་བ་མཛད་རྒྱུའི་ཀུན་སློང་ལ་ཟུར་ཟ་དང་མཚན་སྨད་བྱས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནི་བོད་མི་ཙམ་མ་ཟད། འཛམ་གླིང་ཁྱོན་ཡོངས་སུ་ཧ་ཅང་གུས་བཀུར་དང་ཆེ་བསྟོད་ཞུ་ཡུལ་གྱི་སྐྱེས་ཆེན་དམ་པ་ཞིག་ཡིན་སྟབས། ༸གོང་ས་མཆོག་གི་ཀུན་སློང་དང་དགོངས་པ་བཞེས་ཕྱོགས་ལ་རྒྱ་ནག་གཞུང་ནས་ངོས་འབྱོར་གང་ཡང་ཐོབ་དགོས་ཀྱི་མེད། ༸གོང་ས་ཏཱ་ལའི་བླ་མ་མཆོག་ནི་རྩོད་མེད་ཡོངས་གྲགས་ཀྱི་བོད་མིའི་དབུ་ཁྲིད་གཅིག་ཡིན་པ་མ་ཟད། འཛམ་གླིང་ཁྱོན་དུ་རྒྱ་རིགས་ཚོས་ཀྱང་ཡིད་སྨོན་ཞུ་ཡུལ་ཞིག་ཡིན།

གསར་འགོད་ཚན་པ་ཁག་གིས་ཡང་སེ་འགྲེལ་བརྗོད་བྱས་ཡོད་པ་ལྟར་ན། གསར་འགོད་པ་རྣམས་བྱང་ཀོ་རི་ཡ་ལས་བོད་ནང་དུ་འགྲོ་རྒྱུར་དམ་བསྒྲགས་ཆེ་བ་ཡོད་སྐོར་བརྗོད་བཞིན་ཡོད། བྱང་ཀོ་རི་ཡ་ནི་རྒྱ་ནག་གི་མཐུན་ཕྱོགས་རྒྱལ་ཁབ་གཅིག་ཡིན། བོད་ཐོག་རྒྱབ་ཤ་དཀར་པོའི་དེབ་འདོན་རྒྱུའི་ཚབ་ཏུ་རྒྱ་ནག་གཞུང་གིས་བོད་ནང་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པ་དང་གསར་འགོད་པ་འགྲོ་རྒྱུའི་ཐོབ་ཐང་སྤྲད་ནས་ཁོང་རྣམ་པས་འཛམ་གླིང་མི་མང་ཚོར་བོད་ནང་གི་དངོས་ཡོད་གནས་སྟངས་ཇི་ཡིན་གྱི་སྙན་ཐོ་དང་དཔང་པོ་བྱེད་འཇུག་དགོས།

དབུས་བོད་མིའི་སྒྲིག་འཛུགས་ནས་ཕྱི་ལོ་ ༢༠༡༥ ཟླ་ ༤ ཚེས་ ༡༥ ལ།

Share with your friends










Submit