ཤེས་རིག་ལས་ཁུངས།
༄༅།། བོད་གཞུང་ཤེས་རིག་ལས་ཁུངས་ནི་བཙན་བྱོལ་བོད་མིའི་ཤེས་ཡོན་ཐོག་གཟིགས་སྐྱོང་གནང་མཁན་གྱི་བློན་ཆེན་ལས་ཁུངས་དེ་ཡིན་ཞིང་། དེས་རྒྱ་གར་དང་བལ་ཡུལ་འབྲུག་བཅས་སུ་འཁོད་པའི་བོད་མིའི་སློབ་གྲྭ་ ༧༧ ནང་ཡོད་པའི་བོད་ཕྲུག་ ༢༨༠༠༠ སྐོར་གྱི་ཤེས་ཡོན་དང་བདེ་དོན་ལ་གཟིགས་སྐྱོང་གནང་གི་ཡོད། གོང་བརྗོད་སློབ་གྲྭ་དེ་དག་སོ་སོའི་གནས་ཡུལ་རྒྱལ་ཁབ་ཀྱི་ཤེས་ཡོན་ལམ་ལུགས་འོག་འགྲོ་བཞིན་ཡོད་པ་དང་། ཤེས་ཡོན་གྱི་སྒྲོམ་གཞི་དང་། སློབ་ཚན་འཆར་གོད་དང་ལག་ལེན། སློབ་འཁྲིད་ཐབས་ལམ། སློབ་གྲྭ་འཛིན་སྐྱོང་བྱེད་སྟངས་བཅས་ཕལ་ཆེ་བ་འདྲ་མཚུངས་ཡིན། སློབ་གྲྭ་དེ་དག་ཐམས་ཅད་དུ་བོད་ཀྱི་སྐད་ཡིད་དང་རིག་གནས་གལ་ཆེའི་སློབ་ཚན་ངོ་བོར་སློབ་འཁྲིད་བྱེད་བཞིན་ཡོད།
ཤེས་རིག་ལས་ཁུངས་ཀྱི་སྤྱི་ཁྱབ་ལྟ་སྐྱོང་འོག་ཡོད་པའི་སློབ་གྲྭ་ ༧༧ ཁོངས་ནས་སློབ་གྲྭ་ ༢༨ རྒྱ་གར་དབུས་གཞུང་ཤེས་རིག་ལས་ཁུངས་ཀྱི་འོག་ཏུ་དབུས་བོད་སློབ་འཛིན་སྐྱོང་ཚོགས་པ་ཞེས་པའི་རང་སྐྱོང་སྒྲིག་འཛུགས་ཤིག་ཡོད་པ་དེའི་རོགས་གྲོན་དང་འཛིན་སྐྱོང་འོག་ཡོད་པ་དང་། བོད་མི་རང་ཉིད་ཀྱིས་འཛིན་སྐྱོང་བྱེད་པའི་སློབ་གྲྭ་ ༤༩ ཡོད་ཁོངས་ནས་ལྷ་ས་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ ༡༧ ནང་སློབ་ཕྲུག་ ༡༡༥༠༠ ལྷག་ཙམ་དང་། མ་སུ་རི་བོད་ཁྱིམ་ཁྱབ་ཁོངས་སློབ་གྲྭ་མ་ལག་གཉིས་ནང་སློབ་ཕྲུག་ ༢༢༠༠ ལྷག་ཙམ། བལ་ཡུལ་གངས་ཅན་བདེ་རྩའི་ཁྱབ་ཁོངས་སློབ་གྲྭ་ ༡༣ ནང་སློབ་ཕྲུག་ ༣༠༠༠ ལྷག་ཙམ། བོད་གཞུང་ཤེས་རིག་ལས་ཁུངས་ཀྱི་རོགས་གྲོན་འོག་ས་བྷོ་ཊ་བོད་སློབ་སྒྲིག་འཛུགས་ཀྱིས་འཛིན་སྐྱོང་བྱེད་པའི་སློབ་གྲྭ་ ༡༣ ནང་སློབ་ཕྲུག ༢༡༥༠ ལྷག་ཙམ། ས་གནས་བོད་མི་ཚོགས་སྒེར་གྱིས་འཛིན་སྐྱོང་བྱེད་པའི་སློབ་གྲྭ་ ༤ ནང་སློབ་ཕྲུག་ ༦༥༠ ལྷག་ཙམ་བཅས་ཡོད།
ཤེས་རིག་ལས་ཁུངས་ཀྱི་ད་ལྟའི་བསྒྲུབ་བྱ་ལས་དོན་རྒྱ་ཆེ་སྣ་མང་ཞིག་ཡོད་པའི་ཁོངས་བཙན་བྱོལ་བོད་མིའི་སློབ་གྲྭ་སྤྱི་ཡོངས་ལ་རང་གཞུང་གི་སྲིད་བྱུས་དང་ཁྲིམས་གཞི་ཁག་ཁྱབ་བསྒྱུར་དང་། ཇུས་འགོད། ལག་བསྟར། རྟོག་ཞིབ་བཅས་བྱ་རྒྱུ་དང་། དགོས་མཁོ་ཅན་གྱི་སློབ་ཁག་ལ་བོད་རིགས་སློབ་སྤྱི་དང་དགེ་རྒན་བསྐོ་གཏོང་། ཆེད་ལས་དང་མཐོ་རིམ་སློབ་གྲྭར་སྐྱོད་མཁན་སློབ་ཕྲུག་རྣམས་ལ་སློབ་ཡོན་ཐབས་འཚོལ་དང་འབྲེལ་བའི་གཟིགས་རྟོག ཕ་མ་ཉམ་ཐག་ལ་སློབ་ཡོན་དང་འཚོ་དོད་ཐབས་འཚོལ། སྤྱི་ཡོངས་སློབ་ཚན་འཆར་འགོད། སློབ་གཞི་བསྐྱར་ཞིབ་དང་གཏན་འབེབས། དགེ་སློབ་གཉིས་ཀར་གཞོགས་འདེགས་རྒྱུ་ཆ་མཁོ་འདོན། བོད་ཀྱི་རིག་གནས་སྦྱོང་སའི་མཐོ་རིམ་སློབ་གྲྭ་དང་དེའི་སློབ་ཚན་ངོས་འཛིན། དགེ་རྒན་འོས་སྦྱོང་དང་ཟབ་སྦྱོང་འཛུགས་སྐྱོང་སོགས་བཙན་བྱོལ་བོད་གཞུང་གི་གཞི་རིམ་ཤེས་ཡོན་སྲིད་བྱུས་ལག་ལེན་དོན་འཁེལ་ཡོང་བའི་ལས་དོན་སྒྲུབ་བཞིན་ཡོད།
PDF 
